’’ہم‘‘ سے اچھا کون ہے؟

ہمارے گرد ہر سمت وسیع و بسیط کائنات ہے۔ یہ ایسی حقیقت ہے جسے ہم اب درخورِ اعتناء نہیں سمجھتے۔ کسی نے خوب کہا ہے ع

قدر کھو دیتا ہے ہر روز کا آنا جانا

اور کائنات کہاں روز آتی جاتی ہے؟ یہ تو دَم بہ دَم برقرار ہی رہتی ہے۔ یہ کبھی ہمارے گرد و پیش سے معدوم، ناپید یا نادیدہ نہیں ہوتی۔ چار دیواری سے نکلیے، پلکیں اُٹھائیے اور کائنات کی پہنائیوں میں پنہاں ہوجائیے!

مگر یہ کوئی ''ون وے ٹریفک‘‘ نہیں۔ ایسا نہیں ہے کہ صرف ہم کائنات میں گم ہیں۔ کائنات بھی تو ہم میں گم ہے۔ کیا ہمارے اپنے وجود میں کوئی کائنات نہیں؟ حقیقت، بلکہ ابدی حقیقت یہ ہے کہ ہم خود اپنی ذات میں ایک مکمل کائنات ہیں۔ کائنات اگر ہم پر محیط ہے تو ہم خود بھی اِس کائنات کا احاطہ کئے ہوئے ہیں۔ اگر پوری کائنات ہم میں جھلک رہی ہے تو کیا ہوا؟ ہم بھی تو ہر شے میں، ہر ذَرّے میں منعکس ہو رہے ہیں۔ غور سے، بلکہ ذرا پیار سے دیکھیے تو پوری کائنات شیش محل کی سی ہے جس میں ہمیں ہر طرف اپنی ہی ذات منعکس ہوتی دکھائی دے گی۔

اپنی ذات کا پھیلاؤ اٹل حقیقت ہے مگر مشکل تب کھڑی ہوتی ہے جب اپنی ذات کے پھیلاؤ میں پوری کائنات سُکڑتی دکھائی دیتی ہے۔ وسعت پذیر ہونا بڑا وصف ہے مگر توسیع اتنی ہو کہ سنبھالی جاسکے۔ ایسا نہ ہو کہ اپنے سے بڑھ کر کچھ بھی، کوئی بھی اہم محسوس نہ ہو۔

پاکستانی معاشرہ اُس مرحلے سے گزر رہا ہے جس میں ہر شخص اپنی ذات کے پھیلاؤ میں پوری کائنات کو سمیٹ لینے کے درپے ہے۔مٹھی میں دُنیا بند کرنے کا زمانہ گزر گیا۔ اب تو لوگ ہتھیلی کے کھیت میں پوری کائنات اُگانا چاہتے ہیں! رائی اگر پربت بننے کا خواب دیکھے تو جائز ہے۔ ذَرّہ اگر خورشیدِ جہاں تاب کا سا رتبہ پانے کا آرزو مند ہو تو کچھ مضائقہ نہیں۔ مگر یہ کیا کہ کچھ نہ ہونے پر بھی بہت کچھ، بلکہ سب کچھ ہونے کا خبط سَروں پر سوار ہے! خالی برتن خوب کھنکتا ہے۔ باطن کمزور ہو تو ظاہر بھی بھونڈے پن کی تصویر بن جایا کرتا ہے۔ اور پھر اِس میں تصنع اور بے ہودگی کی بھی آمیزش ہوتی جاتی ہے۔ اِن اجزائے ترکیبی سے چلتے پھرتے، سانس لیتے تماشے تشکیل پاتے ہیں!

فہمِ ذات کے مرحلے میں دوسری انتہا یہ ہے کہ انسان خود کو بہت کچھ، بلکہ سب کچھ سمجھ بیٹھتا ہے۔ جب یہ مقام آ جائے تب بھی بے عملی ہی درشن دیتی ہے۔ ضیاءؔ جالندھری مرحوم نے خوب کہا ہے ؎

اُفتادِ طبیعت سے اِس حال کو ہم پہنچے

شِدّت کی محبت میں شِدّت ہی کے غم پہنچے

اپنی ذات کو کچھ نہ گرداننے کا انجام؟ تباہی! اور خود کو سب کچھ سمجھ بیٹھنے کے خبط کا نتیجہ بھی بربادی! انتہا خواہ کسی معاملے میں ہو اور کسی بھی چیز کی ہو، ایسے ہی گل کھلایا کرتی ہے!

ستم ڈھانے میں آئینے کا حریف کوئی ہوسکتا ہے؟ آپ کا جواب نفی میں ہونا چاہیے۔ آئینے کے سامنے کھڑے ہوجائیے اور پھر دیکھیے کہ یہ کس کس طرح آپ کو شیشے میں اُتارتا ہے! آئینے میں اپنے وجود کا جائزہ لیجیے اور اپنی آنکھوں کے عکس میں جھانک کر دیکھیے، کئی داستانیں خاصی بُلند آواز سے خود کو دُہراتی محسوس ہوں گی۔ آئینے میں اپنے ہی وجود کا عکس کچھ کا کچھ دکھائی دیتا ہے۔ اپنی آنکھوں کے عکس میں جھانک کر خود کو تلاش کیجیے تو سرگوشی شروع ہو جاتی ہے۔ کیسی سرگوشی؟ یہی کہ ''ہم‘‘ سے اچھا کون ہے! اور ہو بھی کون سکتا ہے؟ لیجیے، بات ہی ختم ہوگئی۔ آئینہ پلک جھپکتے میں آپ کو ''فوٹو فنش‘‘ کی منزل تک پہنچاکر میچ جتوا دیتا ہے! جب آئینے نے طے کردیا کہ آپ سے اچھا، آپ سے بہتر اور آپ سے بڑھ کر کوئی ہے ہی نہیں تو پھر کسی کو، کسی بھی چیز کو کیوں اہمیت دی جائے؟

آئینے نے کتنوں کو بگاڑا ہے، کوئی اندازہ نہیں لگاسکتا۔ اگر آپ کی خواہش ہے کہ آئینہ آپ کو کچھ کا کچھ بلکہ بہت کچھ بناکر پیش کرے تو بس اِتنی شرط ہے کہ اُس کے سامنے کھڑے ہوکر صرف اپنی آنکھوں کے عکس میں جھانکیے۔ پھر کوئی عیب دکھائی نہیں دے گا۔ اپنا سراپا دیکھیے گا تو دِل بیٹھتا چلا جائے گا۔ آئینے میں صرف چہرہ دیکھیے۔ اور ہوسکے تو قدِ آدم آئینے کے استعمال سے گریز کیجیے۔ یہ آئینہ آپ کے پورے وجود کو جُوں کا تُوں پیش کرکے حقیقت پر سے پردہ اُٹھانے کی گستاخی کر بیٹھے گا اور آپ کا دل دَورِ سحر کی شمع کی مانند بجھ جائے گا۔

جب اِنسان کچھ نہ ہونے پر بھی خود کو سب کچھ سمجھ بیٹھے تو ہر ایک کو اپنا بندۂ بے دام گرداننے لگتا ہے۔ میدان علم و فن کا ہو، سیاست کا یا پھر صنعت و تجارت کا، جب آپ نے ایک بار طے کرلیا کہ آپ سے بڑھ کر کوئی نہیں تو پھر کس کی مجال ہے کہ آپ سے بلند ہوکر دکھائے۔ اور کوئی بلند ہو بھی جائے تو آپ کیوں اُسے بلند ماننے لگے؟ کوئی کچھ بھی ہوجائے، جب تک آپ ''ہم سے اچھا کون ہے؟‘‘ کی ''خوشبو‘‘ کو جسم و جاں میں بسائے رکھیں گے، تب تک کوئی بھی اوجِ ثُریا کو چُھو نہ سکے گا۔ آپ خواہ تحت الثّریٰ میں ہوں۔جب اِنسان میں کوئی تعمیری وصف نہ ہو، کوئی خوبی نہ پائی جاتی ہو تب خود فریبی نعمتِ غیر مُترقّبہ معلوم ہوتی ہے۔ باقیؔ صدیقی مرحوم نے خوب کہا ہے ؎

خود فریبی سی خود فریبی ہے

پاس کے ڈھول بھی سُہانے لگے

اہلِ وطن اِسی عالم اور کیفیت سے گزر رہے ہیں۔ کسی میں لاکھ خوبیاں ہوں تو ہوا کریں، مدِ مقابل نہ مانے تو کس میں دم ہے کہ خود کون منوائے!

''ہم سے اچھا کون ہے؟‘‘ وہ جادو ہے جو اپنے ہی نہیں، دوسروں کے بھی سَر چڑھ کر بولتا ہے۔ چند سو افراد کو جمع کرنے میں کامیاب ہونے والا اپنے تئیں قوم کا نجات دہندہ اور مسیحا سمجھنے لگتا ہے۔ آئینہ اُسے مزید بانس پر چڑھاتا ہے۔ پارلیمنٹ میں ایک یا دو نشستیں حاصل کرنے میں کامیاب ہونے والے بھی وزارتِ عُظمٰی سے کم کا خواب دیکھنے پر راضی نہیں ہوتے۔

اپنے آپ سے گزر کر دیکھیے تو دنیا میں اور بھی کچھ ہے، بلکہ بہت کچھ ہے۔ مگر ہم تو سفر کی ابتدا ہی کو منزل قرار دے کر خوش ہولیتے ہیں۔ خود پسندی وبا ہے مگر ہم نے اِسے گلے لگایا ہے۔ کیوں؟ اِس لیے کہ اپنے آپ پر مَر مِٹنا سب سے آسان آپشن ہے۔ اپنے تئیں برتر سمجھنے میں کون سے زمانے لگتے ہیں۔ جب جی میں آئے اپنے آپ پر مَر مِٹیے، کس نے روکا ہے۔

خود پسندی اور خود فریبی کا زہر ہم نے ایسا پیا ہے کہ اب ڈھنگ سے جینے کے قابل نہیں رہے۔ ہر شعبے کی رگوں میں یہ زہر یوں اُترا ہے کہ رگیں کھنچ گئی ہیں، تشنّج کی کیفیت طاری ہے اور ہم اِس کیفیت سے نجات پانے کا سوچنے کے بجائے اِس سے محظوظ ہو رہے ہیں۔

اچھا ہے کہ آئینہ اپنا کام پوری ایمانداری سے کرے اور ہم اُس کام کا نتیجہ قبول بھی کریں۔ آئینے کا بیان کیا ہوا پورا سچ قبول کرنے ہی پر ہمارے قبول کئے جانے کی راہ بھی ہموار ہوگی۔ بہ صورتِ دیگر خود فریبی کا زہر تو ہر آن موجود ہے، پیجیے اور جیتے جی مَر رہیے۔