’’جھلک‘‘ افضل گوہرؔ کا پانچواں مجموعۂ کلام

شاعر کسی تعارف کے محتاج نہیں‘ جگہ کم ہے اس لیے ان کے خوبصورت اشعار سے لُطف اندوز ہوں:

نیا نیا مجھے آیا ہے پائوں پر چلنا

ٹھہر ٹھہر کے مجھے اپنے راستے سے گُزار

اس بار کوئی اور تماشہ ہے گلی میں

ہر آنکھ جو کھڑی کے اشارے سے جُڑی ہے

ہر دن کسی سورج کے تعاقب میں ہے گوہر

ہر رات کسی اور ستارے سے جُڑی ہے

تصویر سے کوئی بھی سلامت نہیں نکلا

وہ سنگ یہاں آئینہ خانے پہ لگا ہے

کون کہتا ہے ہم نہیں رہیں گے

خاک ہو کر بھی ہم یہیں رہیں گے

ہم جو تبدیل ہو نہیں سکتے

جہاں رکھے گئے وہیں رہیں گے

معاملاتِ محبت کی بات اور ہے دوست

وگرنہ جُھک کے کہاں آسماں زمیں سے ملا

لہو ٹپکنے لگا ہے ہمارے ہاتھوں سے

سنبھالتے ہوئے اک پُھول شادمانی کا

گُم تھی کہیں زمین کہیں آسمان گیا

اس کشمکش میں میں تو یُونہی رائگاں گیا

کن منزلوں کے خواب دکھائے گئے ہیں

آگے زمین ختم تھی رستہ جہاں گیا

کیا ملا اُس کا تعاقب کر کے

گرد آنکھوں میں پڑی ہے ساری

اس لیے دیر تک جلا نہیں ہے

یہ دیا اِس منڈیر کا نہیں ہے

دشت کی سمت نکل آیا ہے میرا دریا

بس اسی پر ہیں خفا سارے سمندر مجھ سے

میں ترے سمندر تک آپ چل کے آیا ہوں

جیسے ایک دریا نے جستجو مکمل کی

پر نکلنے کی دیر ہے گوہر

لے اُڑیں گے یہ خاکداں ہم لوگ

میں کہیں اور نکل جائوں گا وحشت کرنے

میرا مولا تری جاگیر سلامت رکھّے

سلسلہ درد کا بس دل پہ نہیں ہے موقوف

رنج کے اور بھی اسباب نکل آتے ہیں

جانے کس جُرات و پندار سے آراستہ ہے

سر قلم ہوکے بھی دستار سے آراستہ ہے

چند لوگوں کی محبت بھی غنیمت ہے میاں

شہر کا شہر ہمارا تو نہیں ہو سکتا

عجیب رنگ و نور سے بھری ہوئی ہے کائنات

وہاں ترے نجوم سے‘ یہاں مرے چراغ سے

میں اب جنونِ عشق کے فریب میں نہ آئوں گا

کہ ابکے میرا دل بھی ہے دماغ سے جُڑا ہوا

تجھ سے ہر روز ملاقات ضروری تو نہیں

بعض اوقات تو میں خود میں نہیں بھی ہوتا

پُھول پھل سکتا تھا دیوار سے نکلا ہوا پیڑ

سلسلہ اس کا اگر زیرِ زمیں بھی ہوتا

تماشہ دیکھنے والوں سے شرمسار ہوں میں

بنا رہا تھا تماشہ‘ بنا نہیں مجھ سے

مٹی سے میں تو پُھوٹ پڑا پیڑ کی طرح

جو ہو گیا ہے رزقِ زمیں اور کوئی تھا

یہیں سے آپ ہیں تو پھر یہیں پہ دن گزاریے

فلک کی بات چھوڑیے‘ زمیں پہ دن گزاریے

میں کیا بتائوں کہ کیسا فراغ تھا میرا

کہیں پہ دل تو کہیں پر دماغ تھا میرا

ڈرے ہوئے ہیں ہوائوں سے کُوچہ و بازار

وگرنہ شہر کہاں بے چراغ تھا میرا

سلسلہ عشق کا بھی ٹوٹ گیا آخرِ کار

میری عجلت سے زیادہ‘ تری تاخیر سے کم

یہ جو ہر روز میں جی اُٹھتا ہوں مر کر گوہر

زہر ہی اُس نے دیا موت کی تاثیر سے کم

یہ لاجواب مجموعہ کلام مثال پبلشرز فیصل آباد نے چھاپا اور اس کی قیمت 200روپے رکھی ہے۔

آج کا مطلع

محبت کا تماشا وصل کی تاثیر جیسا ہے

کہ مل بیٹھے نہیں اور ذائقہ انجیر جیسا ہے