ہمارا اسلوب جنگ

گزشتہ روزقومی سلامتی کمیٹی کے اجلاس کے بعد‘وزیرداخلہ چودھری نثار علی خان نے بتایا کہ قومی سلامتی اور اندرونی سکیورٹی سے متعلق حکمت عملی اور افغانستان کے ساتھ تعلقات پر بات چیت کی گئی۔ اجلاس میں داخلہ اور دفاع کے وزراء کے علاوہ‘ مشیر برائے قومی سلامتی و خارجہ امور‘ مسلح افواج کے سربراہوں‘ چیئرمین جوائنٹ چیفس آف سٹاف کمیٹی اور آئی ایس آئی کے ڈائریکٹر جنرل شریک تھے۔ وزیرداخلہ نے بتایا کہ جو پالیسی ہم لے کر آئے ہیں‘ اس کا پہلا باضابطہ مسودہ آج تیار ہوگیا ہے، جو تین حصوں پر مشتمل ہے۔ پہلا حصہ خفیہ رکھا جائے گا کیونکہ قومی سلامتی کے معاملات سب کے سامنے نہیں لائے جا سکتے۔ دوسرا سٹریٹیجک معاملات سے متعلق ہے، جس میں طے کیا جائے گا کہ موجودہ حالات میں ہی آگے بڑھنا ہے یا امن کے لیے مختلف لائحہ عمل تیار کرنا ہے؟ اور تیسرا حصہ آپریشنل ہے، جس میں ہمیں پاکستان کے گلی کوچوں کو محفوظ بنانا ہے۔ سٹریٹیجک معاملات کے حوالے سے چودھری نثار نے کہا کہ ''ہم نے امن کے لیے مذاکرات کا راستہ اپنانے کا فیصلہ کیا ہے، لیکن اگر طالبان کے ساتھ مذاکرات کی راہ کامیاب نہ ہوئی تو پھر ظاہر ہے ہمارے پاس دوسرے آپشنز بھی موجود ہیں‘‘۔ حکومت کی طرف سے اس اعلان کے چند ہی گھنٹے بعد‘ طالبان نے مذاکرات کی آپشن کو مسترد کر دیا اور طالبان کے نئے راہنما ملا فضل اللہ نے اپنا ایجنڈا یوں بیان کیا: ''حکومت سے امن مذاکرات بے معنی ہیں۔ ہم پاکستان کی حکومت کو ہٹانے اور ملک میں شرعی نظام نافذ کرنے کی جدوجہد کو آگے بڑھانے کے لئے اپنی کارروائیاں جاری رکھیں گے‘‘۔ رائٹر کے مطابق طالبان کے ترجمان شاہد اللہ شاہد نے کہا: ''سابقہ حکومتوں کی طرح موجودہ پاکستانی حکومت بھی امریکہ کی کٹھ پتلی‘ ڈالر کی بھوکی اور کمزور ہے۔ ہمیں علم ہے کہ حکومت اندرون خانہ فوجی کارروائی کرنے کے منصوبے بنا رہی ہے۔ طالبان ان حملوں کا مقابلہ کرنے کے لیے تیار ہیں۔حکومت خوشی سے فوجی کارروائی کرے، ہم نے ماضی میں بھی فوجی آپریشنوں کا مقابلہ کیا ہے اور اب بھی ان کا انتظار کر رہے ہیں‘‘۔ طالبان کے قول و فعل میں کوئی تضاد نہیں۔ جو وہ کہتے ہیں‘ کر دکھاتے ہیں اور جو کرتے ہیں‘ اس کی ذمہ داری اٹھانے سے انکار نہیں کرتے۔

پاکستان کی طرف دیکھیں تو سب کی ڈفلی الگ الگ ہے۔ مشترکہ کانفرنسیں کرتے ہیں تو ایک ہی مسودے پردستخط کر دیتے ہیں، مگر باہر آ کر سب کی بولیاں جدا جدا ہو جاتی ہیں۔ جمہوریت اجتماعی فیصلوںکے ذریعے کام کرتی ہے اور اس میں یہ فرق ملحوظ رکھا جاتا ہے کہ مشترکہ مفادات پرکامل اتفاق رائے سے فیصلے کیے جاتے ہیں اور دیگر امور میں اختلاف رائے سے کیے گئے فیصلوں پر عملی اقدامات کی طرف پیش قدمی ہوتی ہے۔ اس کا عملی مظاہرہ آپ ہر جمہوری حکومت کی پالیسیوں میں دیکھ سکتے ہیں۔ امریکہ میں سکیورٹی کے معاملات پر ہونے والے فیصلے جب عملدرآمد کے مرحلے میں داخل ہو جائیں تو پھر ان پر بحث نہیں ہوتی۔ سارا بحث و مباحثہ عملدرآمد کے مرحلے میں داخل ہونے سے پہلے کر لیا جاتا ہے۔ یہی طریقہ کار آپ کو برطانیہ‘ فرانس‘ جرمنی اور بھارت میں نظر آئے گا۔ پاکستان واحد ملک ہے جہاں کے حکمران جنگ کا فیصلہ آج تک نہیں کر پائے‘ ہمیشہ دست و گریبان رہتے ہیں اور جنگ مسلط ہو جائے تو پھر دشمن سے لڑنے کے ساتھ ساتھ آپس میں لڑنا بھی نہیں بھولتے۔ قومی تاریخ کی ساری جنگیں یاد کر کے دیکھ لیجئے‘ ہم دشمن کے ساتھ بھی لڑ رہے تھے اور آپس میں بھی۔ کشمیر کی پہلی جنگ میں تو باہمی اختلافات کی انتہا یہ تھی کہ حکومت سرکاری طور پر جنگ میں شریک ہی نہ ہوئی۔ دوسری جنگ 1965ء میں آئی، جس میں پورا مشرقی پاکستان گلہ کرتا رہا کہ ہمیں دفاعی تحفظ کے بغیر اکیلے بے یارومددگار چھوڑ دیا گیا۔ 1971ء میں ہم روایتی دشمن بھارت کے ساتھ بھی لڑ رہے تھے اور آپس میں بھی۔ دو سیاسی فریق ایک دوسرے پر باہم الزام تراشی کرتے ہوئے''بھٹو ذمہ دار ہے‘ بھٹو ذمہ دار ہے‘‘ چلا رہے تھے اور دوسرا فریق ''شیخ مجیب‘ شیخ مجیب‘‘ کی گردان کر رہا تھا اور اس باہمی توتکار میں پاک فوج جنگ لڑ رہی تھی۔فوج کو ایسی جنگوں میں دھکیلنے کا جو انجام ہوتا ہے‘ اسی سے ہماری فوج کو دوچار ہونا پڑا۔ ساری جنگوں میں اگر کوئی متفق‘ متحد اور یکسو تھا تو وہ ہمارا دشمن تھا۔ ہمارا اوپرکا دھڑ جنگ لڑ رہا تھا اور نچلا دھڑ اپنے بچائو کے لیے دہائی دے رہا تھا۔ یوں سمجھ لیں کہ ہاتھ تلوار چلا رہے تھے اور نیچے سے شلوارکھسک رہی تھی۔شلوار بھی کھسک گئی‘ تلوار بھی رک گئی۔ یہ ہے ہمارا اسلوب جنگ۔

جب ہم نے 1978ء میں افغانستان کے اندر اقتدار کی رسہ کشی میں ٹانگ اڑائی‘ تو ہماری آوازیں یوں بلند ہو رہی تھیں کہ کان پڑی آواز سنائی نہیں دیتی تھی۔ ہر ایک کا اپنا موقف‘ اپنی آواز اور اپنی رائے تھی۔ حدیہ ہے کہ جب سوویت یونین نے ہمارا مطالبہ مانتے ہوئے فوجیں واپس بلانے کا فیصلہ کیا‘ ہم اس وقت بھی اس سوال پر باہم دست و گریباں تھے کہ سوویت افواج کی واپسی یا پسپائی کا فائدہ کیا اٹھایا جائے؟ ہم فتح کی شرائط پر بحث مباحثہ کرتے رہ گئے اور ہارنے والے واپسی کا یکطرفہ فیصلہ کر کے چلتے بنے۔ سوویت فوجوں کی واپسی کے بعد ہم فتح کے نعرے بھی لگاتے رہے اور ایک دوسرے کی ٹانگ بھی کھینچتے رہے۔جونام نہاد مجاہدین ہماری مدد کے بل بوتے پرافغانستان میں حکمران بنے‘ انہوں نے ہم سے بھی دو قدم آگے بڑھ کے‘ ایک دوسرے کا خون بہانا شروع کر دیا۔ ہمیں آپس میں ایک دوسرے کو مارنا اوراس کی ٹانگ کھینچنا تو اچھا لگتا ہے،لیکن ہماری امداد لینے والے ایک دوسرے سے لڑیں‘ تو ہمیں اچھے نہیں لگتے۔ چنانچہ ہم نے باہم برسرپیکار اپنے پالے ہوئے تمام مجاہدین کو سبق سکھانے کے لیے طالبان تیار کیے اور ان پر حملہ آور ہو گئے۔ طالبان کامیاب ہو گئے مگر ہم نے آپس کا لڑنا نہیں چھوڑا۔ طالبان نے افغانستان میں موثر حکومت قائم کر لی، مگر ہمارے ہاں اقتدار کی رسہ کشی ہوتی رہی اور آخر کار جنرل پرویزمشرف نے ایک چھوٹے سے ٹولے کی مدد سے اقتدار پر قبضہ کر لیا اور ملک میں ایک مرتبہ پھر سیاستدانوں اور حکمران جنرلوں کے درمیان رسہ کشی کا سلسلہ پھر وہیں سے شروع ہو گیا جہاں سے وہ ٹوٹا تھا۔ امریکہ میں 9/11 کے واقعات ہوئے اور مغربی بلاک نے اسامہ بن لادن کے خلاف فیصلہ کن جنگ کا ارادہ کیا تو عوام سے خوفزدہ‘ پرویز مشرف نے لپک کر امریکہ سے پناہ طلب کر لی۔کرسی پراپنا قبضہ مضبوط رکھنے کے عوض اس نے پاکستان کے سارے وسائل امریکہ کے سپرد کر دیے۔ القاعدہ اور طالبان کے خلاف لڑائی کا چارج امریکہ نے سنبھال لیا اور ہم حسب روایت ایک دوسرے کی ٹانگ کھینچنے کا دیرینہ مشغلہ شروع کر کے‘ خوشی سے ہنستے بستے‘ لڑنے بھڑنے میں لگے رہے۔ آپس میں لڑتے بھڑتے پرویزمشرف کو نکالا جو اپنے اقتدار کی عمر پوری کرتے ہوئے ناتواں ہو چکا تھا۔ آپ کو یادہو گا کہ جب عوامی مینڈیٹ لے کر آنے والے دونوں بڑے لیڈر مشرف کو ہٹانے میں مصروف تھے تو ایک دوسرے کی ٹانگیں بھی کھینچ رہے تھے۔ دنیا میں ایسی لڑائیاں کم ہی لڑی جاتی ہیں کہ آپس میں حلیف بھی ہیں‘حریف کو شکست بھی دینا چاہتے ہیں اورایک دوسرے کو لات مکے مارنا بھی نہیں بھولتے۔آپس میں لڑتے لڑتے‘ دوسروں کے ساتھ برسرپیکار رہنے کا شوق بیک وقت پورا کرنے میں ہمارا کوئی ثانی نہیں۔

گزشتہ سات آٹھ برس سے دہشت گردوں نے ہم پر یکطرفہ جنگ مسلط کر رکھی ہے۔ ہم اپنے 45ہزار بے گناہ معصوم شہریوں اور 5ہزار سے زیادہ فوجی افسروں اور جوانوں کی زندگیاں قربان کر چکے ہیں۔ ہمارے شہر‘ ہماری بستیاں اور ہمارے دیہات کوئی دہشت گردی سے محفوظ نہیں۔ ہم مرتے بھی جا رہے ہیں اور لڑتے بھی جا رہے ہیں اور اس پر بحث بھی کرتے جا رہے ہیں کہ ہمارا دشمن کون ہے؟ طالبان برملا اعلان کرتے ہیں کہ ہماری آپ کے ساتھ جنگ ہے۔ وہ دہشت گردی کی ہر واردات کے بعد اس کی ذمہ داری قبول کرتے ہیں، مگر ہم یہ فیصلہ نہیں کر پا رہے کہ ہم پر حملے کرنے والا ہمارا دشمن ہے یا دوست؟ کل ایک بار پھر ہماری حکومت نے اعلان کیا کہ ہم سکیورٹی کے نئے منصوبے کے مطابق پہلے مرحلے میں طالبات سے مذاکرات کریں گے۔پہلے مرحلے کے آغاز سے بھی قبل‘ ملا فضل اللہ نے جواب دیا ''مذاکرات بے معنی (یعنی بیہودہ) ہیں۔ ہم پاکستان کی حکومت کو ہٹانے اور ملک میں شرعی نظام نافذ کرنے کی جدوجہد میں اپنی کارروائیاں جاری رکھیں گے‘‘۔ شاہد اللہ شاہد نے بتایا کہ ''پاکستان کی حکومت اندرون خانہ فوجی کارروائی کے منصوبے بنا رہی ہے۔ ہم نے پہلے بھی فوجی آپریشنز کا مقابلہ کیا ہے اور اب بھی ان کا انتظار کر رہے ہیں‘‘۔ دشمن کے ارادے واضح ہیں۔سوچ غیرمبہم ہے۔دہشت گردی میں وہ تکلفاً بھی تعطل کی بات نہیں کرتا، مگر ہم آج بھی یہ فیصلہ کرنے سے قاصر ہیں کہ طالبان ہمارے اپنے ہیں یاغیر؟ ہم یہ جنگ بھی سابقہ جنگوں کی طرح لڑنا چاہتے ہیں اور امید کرتے ہیں کہ انجام اس مرتبہ مختلف ہو گا۔ کیسے ہو گا؟ اس سوال کے جواب پھر الگ الگ ملیں گے۔