جب کیک کا پیٹ چاک ہوا

فی زمانہ تقریباً ہر خرابی اور ''عجیب المفہوم‘‘ بات کا تعلق امریکا سے ہے۔ یا ثابت کیا جاسکتا ہے! امریکہ کے ڈسے ہوئے بہت سے ایسے بھی ہیں جو اب اُس کی طرف سے آنے والی کسی بھی خرابی کو حیرت سے نہیں دیکھتے۔ ع

رنج سے خوگر ہوا اِنساں تو مِٹ جاتا ہے رنج

نیو یارک کے نزدیک لانگ آئی لینڈ پر سالگرہ کی ایک تقریب کے لیے منگوائے جانے والے خصوصی کیک کو جب کاٹا گیا تو کیک کاٹنے والوں کے دِلوں پر بھی چُھری چل گئی! کیوں نہ چلتی؟ جس طور بِلّی تھیلے سے باہر آ جایا کرتی ہے بالکل اُسی طرح کیک کا پیٹ چاک کئے جانے پر چُوہا نکل آیا! قصہ یہ ہے کہ 96 سال کا ہونے پر انکل جو کی سالگرہ منائی جارہی تھی۔ جرمن ایپل رِنگ کیک اُنہیں بہت پسند ہے اِس لیے اُسی کا آرڈر دیا گیا۔ جب انکل جو نے کیک کے دو تین ٹکڑے کھائے تو ذائقہ کچھ عجیب سا لگا۔ جب غور سے دیکھا تو اُنہیں کیک کے وسطی حِصّے میں چُوہے کی دُم دِکھائی دی۔ مزید غور سے دیکھنے پر کان کے علاوہ سَر کے کچھ اجزاء کے بھی درشن ہوئے۔ آن کی آن میں ہاہا کار مچ گیا۔ ''تم جیو ہزاروں سال‘‘ کے شور کی جگہ ''اوہ مائی گاڈ‘‘ کی دَبی دَبی آوازیں پردۂ سماعت سے ٹکرانے لگیں!

انکل جو کے بھتیجے نیل گولڈ نے بیکری کے خلاف غفلت برتنے کے الزام پر مبنی تحریری شکایت مقامی انتظامیہ کو دی ہے۔ چُوہے والا کیک کھانے سے انکل جو کی حالت تھوڑی سی بگڑی مگر پھر سنبھل گئی۔ کیوں نہ سنبھلتی؟ گزرتے ہوئے اَچّھے زمانوں کا کھایا ہوا خالص مال کام آگیا۔

اِس خبر کو پڑھتے ہی ہمارے ذہن میں سب سے پہلے یہ خیال بجلی کی طرح کوندا کہ شاید امریکیوں نے انتہائی مُعمّر اور کسی طور مرنے کا نام نہ لینے والے شہریوں سے گلوخلاصی کا کوئی طریقہ وضع کیا ہے! کیک میں سے چُوہے کے اجزاء برآمد ہوتے دیکھ کر انکل جو پر جو بیت گئی سو بیت گئی مگر کبھی اُنہوں نے اِس نُکتے پر غور نہیں کیا کہ وہ جو بے فِکری سے جئے ہی جارہے ہیں اُس سے لوگوں پر کیا بیت رہی ہے! چُوہے سے مُزیّن کیک کھانے پر انکل جو نے شاید یہ سوچا ہو کہ 96 سال کی عمر میں کیا کیا دیکھنا پڑ رہا ہے۔ وہ اپنی غلطی بھی تو مانیں کہ اُن کی اِتنی طویل عمر دوسروں کو کیا کیا دِکھا رہی ہے۔ جب کوئی دُنیا سے جانے پر آمادہ ہی نہ ہو تو لوگ چُوہے والے کیک اور اِسی قبیل کی دُوسری اشیاء ہی کو تو زحمت دیں گے!

96 سالہ بزرگ کے لیے چُوہے والے کیک کا تحفہ کوئی حیرت انگیز بات نہیں کیونکہ امریکیوں کو گزرے ہوئے زمانوں کی اقدار اور گزرتے ہوئے ادوار کے لوگوں سے کچھ خاص دلچسپی نہیں۔ بلکہ یوں کہیے کہ چِِڑ ہے۔ ہر معاملے میں جِدّت طرازی امریکیوں کا شعار ہے۔ ممکن ہے انکل جو کے معاملے میں بھی جِدّت کی راہ نکالی گئی ہو۔ کام ہوگیا تو ٹھیک ورنہ اسٹور کے خلاف مقدمہ دائر کرنے کی گنجائش تو ہے ہی! یعنی یہ کہ داؤ چل جائے تو بُزرگ سے گلو خلاصی ہوجائے اور اگر نہ چل سکے تو ہرجانے کی مَد میں معقول رقم ہاتھ لگے! امریکیوں کے لیے کوئی بھی معاملہ خسارے کا سَودا نہیں۔

کیک سے چُوہا نکلنے سے زیادہ حیرت ہمیں اِس بات پر ہے کہ فوڈ ٹیکنالوجی کے ماہرین نے اب تک متعلقہ اسٹور پر مقدمہ دائر نہیں کیا۔ بات یہ ہے صاحب کہ اِس نوعیت کے تجربے کرنا فوڈ ٹیکنالوجی کے ماہرین کا خاصہ ہے! وہ رات دن نئے فوڈ آئٹمز متعارف کرانے کے بارے میں سوچتے رہتے ہیں۔ اپنی سوچ کو عملی شکل دینے کے لیے وہ انتہائی متضاد صفات والی اشیاء کو اُسی طرح یکجا کرتے ہیں جس طور گن پوائنٹ پر نکاح کرایا جاتا ہے! فوڈ ٹیکنالوجی کے ماہرین کا دَم غنیمت ہے کہ اُن کی کاوشوں کے طفیل ''غیر روایتی‘‘ ڈِشوں کی تیاری کے نام پر مختلف خطوں کے درمیان ''ہم آہنگی‘‘ بڑھتی ہے اور اہلِ جہاں کو مختلف النوع حشرت الارض

کی افادیت کے نئے پہلوؤں سے رُو شناس ہونے کا موقع ملتا ہے! فوڈ ٹیکنالوجی کے ماہرین کو یقیناً اِس بات پر جُزبُز ہونا چاہیے کہ اُن کے میدان میں بیکری کے معمولی کاری گروں نے قدم رکھ دیا۔ اگر اِس معیار کے تحت پرکھا جائے تو ہمارے ہاں بیشتر کاری گر صفِ اوّل کے ماہرین ثابت ہوں گے! ہمیں اُن کے ''کمالات‘‘ دِکھائی نہیں دیتے؟ کیونکر دِکھائی دیں؟ بے ذوقی نے بصارت کا ''حُسن‘‘ زائل کردیا ہے۔ ''دیکھنے والا دیدۂ بینا‘‘ میسر ہو تو کچھ دِکھائی دے نا! ہم کھاتے وقت مقدار کے ایسے دیوانے ہوجاتے ہیں کہ معیار کو طاقِ نِسیاں پر رکھ دیتے ہیں۔

شریف امروہوی نے جب امریکی کیک والی خبر پڑھی تو حیران ہوئے کہ امریکہ میں بھی فوڈ آئٹمز کی تیاری میں غفلت اِس حد تک بڑھ گئی ہے۔ مگر پھر اُنہیں تھوڑا سا سُکونِ قلب بھی میسر ہوا کہ فوڈ آئٹمز تیار کرنے والے امریکی اور اُن کے پاکستانی ''ہم منصب‘‘ اب ایک ہی پیج پر ہیں!

شریف امروہوی خوب پَکی ہوئی اشیاء کھانا پسند کرتے ہیں۔ اُنہیں مغرب اور مشرقِ وُسطیٰ کی کوکنگ پسند نہیں جس میں چیزوں کو اُبالنے کے مرحلے سے گزارنے کے فوراً بعد گارنش کرکے دستر خوان کی زینت بنادیا جاتا ہے۔ اُن کی نظر میں کوکنگ کا یہ طریقہ خطرناک ہے کیونکہ جو اِضافی اجزاء یا مخلوق پتیلی میں گِر جاتی ہے وہ دیگر اجزاء میں پوری طرح شیر و شکر نہیں ہو پاتی اور پکانے والے کا بھونڈا پن ظاہر ہو جاتا ہے! ہمارے ہاں، خیر سے، پکانے کا ڈھنگ ایسا پَکّا ہے کہ لوگ کھاتے وقت اُنگلیاں چاٹتے تو رہ جاتے ہیں مگر یہ اندازہ نہیں لگا پاتے کہ چولھے پر چڑھانے سے پہلے پتیلی میں کیا کیا ڈالا گیا تھا! ع

تیری سَرکار میں پہنچے تو سبھی ایک ہوئے!

بصارت سے محرومی کے معاملے میں تو خیر امریکی بھی ہمارے ہم پَلّہ ہیں۔ اُنہیں اپنے فوڈ آئٹمز میں جانوروں کے اجزاء یا بال وغیرہ تو نظر آ جاتے ہیں مگر دُنیا بھر میں غصب کئے جانے والے بُنیادی حقوق کے ریزے دِکھائی نہیں دیتے! امریکی فوجیوں کے ہاتھوں بہنے والے مظلوموں کے خُون اور زیرِ دست معاشروں میں بکھرے ہوئے گوشت کے لوتھڑوں پر بھی اُن کی نظر نہیں پڑتی!

انکل جو کے لیے سالگرہ کا کیک تیار کرنے والی بیکری ہمیں تو امریکی محکمۂ خارجہ کا ذیلی ادارہ معلوم ہوتی ہے کیونکہ آج تک امریکی خارجہ پالیسی بھی چُوہے والے کیک تیار کرنے کے اُصول کی بُنیاد پر وضع کی جاتی رہی ہے۔ جن ممالک سے امریکہ کی نہیں بنتی اُنہیں اپنی شرائط پر دی جانے والی امداد کے پردے میں ایسے ہی غیر معیاری کیک کِھلائے جاتے رہے ہیں! اور جس کسی کی مَت ماری جاتی ہے وہ ہرجانے کی بات کر بیٹھتا ہے۔ ہرجانہ تو کیا مِلنا ہے، پھر گھٹیا کیک کا آسرا بھی ختم ہو جاتا ہے!