تکبر واِستکبار

انسان کے اَخلاقی، روحانی اور مُہلک نفسانی عَوارض میں سے ایک عُجب (Arrogance)، تکبُّر اور اِستکبارہے ۔ اسی قبیح خصلت نے شیطان کو ہمیشہ کے لئے راندۂ درگاہ کیا، اﷲ عزّوجلّ کا ارشاد ہے:''اور جب ہم نے فرشتوں سے فرمایا:آدم کو سجدہ کرو، تو ابلیس کے سوا سب فرشتوں نے سجدہ کیا ، اس نے انکار کیا اور تکبّرکیااور کافر ہوگیا،(البقرہ:44)‘‘۔عُجب کے معنی ہیں :''غرور میں مبتلا ہونا‘‘ اور'' تکبُّر واِستکبار‘‘کے معنی ہیں:''خود کو بڑا گرداننا یا بڑا سمجھنا‘‘۔'' اَلْمُتَکَبِّرْ‘‘ اللہ تعالیٰ کی صفتِ جلیلہ ہے ، حقیقی کبریائی اور بڑائی صرف اسی کی شان ہے ، اسی لئے سورۃ الحشر آیت :23میں جہاں اﷲتعالیٰ کی ایک سے زائد صفاتِ جلیلہ کو ایک مقام پر بیان فرمایا ہے ، ان میں'' اَلْمُتَکَبِّر‘‘کی صفت بھی ہے، اس کے معنی ہیں :'' بڑائی والا، عظمت والا‘‘۔ بقولِ شاعر ؎

سر وری زیبا فقط اُس ذاتِ بے ہمتا کو ہے

حکمراں ہے اک وہی ، باقی بتانِ آزری

حدیثِ قدسی میں رب ذوالجلال فرماتاہے:''کبریائی میری ''رِداء‘‘ اور عظمت میری ''اِزار‘‘ ہے ، سو (بندوں میں سے) جو ان صفات میں مجھے چیلنج کرے گا، تو میں اسے جہنم میں داخل کردوں گااور ایک روایت میں ہے : جہنم میں پھینک دوں گا،(سنن ابن ماجہ:4175)‘‘۔جب ''رِداء‘‘ اور ''اِزار‘‘ کی نسبت اﷲ کی ذات کی طرف کی جائے ، تو اس کے وہی معنی مراد ہوں گے جو اس کے شایانِ شان ہیں۔ اﷲتعالیٰ کی ذات جسم، جسمانیات ، اِن کے عَوارض، لَوازِم اور مُتعلِّقات سے پاک ہے، مقدَّس ہے اور مُعَرَّیٰ ہے ۔ قرآن وحدیث میں اس طرح کی نسبتیں انسانوں کو سمجھانے کے لئے ارشاد فرمائی گئی ہیں، ان سے ان کے حقیقی معنی مراد نہیں ہوتے بلکہ ذاتِ اُلوہیّت جلّ وعلاء کے شایانِ شان جو بھی معنی مراد ہوں ، ان پر ہمارا ایمان ہے۔ یہ ایسا ہی ہے جیسے ہماری مثالی دنیا میں اعلیٰ مناصِب کے لئے ایک خاص یونیفارم یا لباس ہوتاہے۔حدیثِ پاک سے مراد یہ ہے کہ''مُتَکَبِّر‘‘ گویا اللہ تعالیٰ کی شانِ کبریائی کوچیلنج کرتاہے یا اس جیسا بننے کا دعویٰ کرتاہے یا اپنے آپ کو ایسا سمجھتا ہے ، اسی بناپر اس کا ٹھکانا جہنم کو قرار دیا گیا ہے۔

اﷲتعالیٰ کو اپنے بندوں میں عَجز ونیازاور تواضع وانکسار کی صفات پسند ہیں، بلکہ عبادت کے معنی ہی اﷲتعالیٰ کی بارگاہ میں انتہائی تذلُّل (Submissiveness)کے ہیں، ارشادِ باری تعالیٰ ہے: ''بے شک اﷲتعالیٰ مغرور ، متکبر کو پسند نہیں فرماتا، (النساء:36)‘‘۔ (2) ''اسی طرح اﷲ ہر جبار متکبرکے دل پر (اس کی سرکشی کے وبال کے طور )مہر لگا دیتا ہے،(المؤمن:35)‘‘۔رسول اللہ ﷺ نے فرمایا :''قیامت کے دن متکبر ین کو (انسانی شکل میں )چھوٹی چھوٹی چیونٹیاں بنا کر اٹھایا جائے گا ، لوگ انہیں روندیں گے ، ہر چھوٹی چیز بھی ان پر مسلط ہوگی ، پھر انہیں جہنم کے اُس قید خانے کی طرف لے جایا جائے گا ، جسے''بُولَس‘‘ کہتے ہیں اور ایسی آگ کے شعلے ان پر بلند ہوں گے ، جو آگ کو بھی جلا ڈالے ، انہیں زہریلی مٹی اور جہنمیوں کے زخموں کی پیپ پلائی جائے گی، (ترمذی:2492)‘‘۔اس کے برعکس جو اﷲ کے حضور تواضع کرے ، اللہ تعالیٰ اسے سربلندی عطا فرماتاہے ، ارشادِ نبوی ہے:''جو شخص اﷲتعالیٰ کے لئے ایک درجہ تواضع کرتا ہے ،اللہ اس کا ایک درجہ بلند فرماتاہے اورجو شخص اللہ کے سامنے ایک درجہ تکبّر کرتاہے ،اللہ اس کو ایک درجہ پست کردیتاہے ،حتیٰ کہ اللہ تعالیٰ اس کو سب سے نچلے طبقہ میں کردیتاہے ،(سُنن ابن ماجہ:4176)‘‘۔رسول اللہ ﷺ نے ارشاد فرمایا: بدترین بندہ وہ ہے جو تکبر کرے اور حد سے تجاوز کرے اور ''جبّارِ اعلیٰ‘‘ کی ہستی کو بھول جائے، جو گھمنڈ میں مبتلا ہو اور اترائے اور خداوندِ کبیر ومُتَعال کو بھول جائے اور جو (احکامِ خداوندی سے) غافل ہوجائے اور انہیں نظراندازکردے اور قبر اور اس میں گلنے سڑنے کو بھول جائے ، جو سرکشی اختیار کرے اور(احکامِ الٰہی سے )بغاوت کرے اور اپنے آغاز وانجام کو بھول جائے،(ترمذی:2448)‘‘۔

''عبداللہ بن مبارک نے کہا:کمالِ تواضع یہ ہے کہ انسان دنیاوی اعتبار سے اپنے سے کم تر کے ساتھ تواضع کرے ، یہاں تک کہ اسے احساس ہوجائے کہ دنیاوی جاہ ومنصب کی بنا پر آپ کو اس پر کوئی فضیلت حاصل نہیںہے اور یہ کہ جو دنیاوی اعتبار سے اس سے برتر ہے ، اپنے آپ کو اس کے آگے ذلیل نہ کرے تاکہ اسے معلوم ہوجائے کہ اس کی دنیاوی برتری حقیقت میں فضل وکمال نہیں ہے۔ قتادہ نے کہا : جسے اﷲتعالیٰ نے مال یا جمال یا علم یا اسبابِ ظاہری سے نوازا ہو اور پھر وہ تواضع نہ کرے تو قیامت کے دن یہی نعمتیں اس کے لئے وبال بنیں گی۔ ایک روایت میں ہے:اﷲتعالیٰ نے عیسیٰ علیہ السلام کو وحی فرمائی کہ جب میں آپ کو نعمتوں سے نواز وں تو آپ عاجزی اختیار کریں تاکہ میں تکمیلِ نعمت کروں،(اِحیاء ُ علومِ الدین ، جلد:3، ص:419)‘‘۔

متکبر کی ایک پہچان اَڑیل پن ، ہٹ دھرمی اور کٹ حجتی ہوتی ہے، وہ حق کے آگے سرتسلیم خم نہیں کرتابلکہ عقلی دلائل سے اسے رد کرتاہے، حالانکہ ایمان کی حقیقت ا ورمومن کی پہچان یہ ہے کہ وہ اﷲتعالیٰ اور اس کے رسولِ مکرم ﷺ کے فرمان کے آگے بلاچوں وچرا سرتسلیم خم کردیتاہے۔ اسے عقل کی کسوٹی پر نہیں پرکھتا بلکہ عقل کی راستی اور اِصابت (Righteousness)کے لئے وحیِ ربانی کو کسوٹی بناتاہے اوراسی نتیجۂ فکر کو راست اور حق سمجھتا ہے ، جو وحی کی کسوٹی پر پورا اترے،جو عقل کو مطلقاً معرفتِ حق کے لئے میزان اور کسوٹی بنائے،و ہ زندیق ہے اوریہی ابلیس کا شِعار ہے۔اﷲتعالیٰ کا ارشاد ہے: ''اور(اے آدم!) ہم نے تم کو پیدا کیا ، پھر تمہاری صورت بنائی ، پھر ہم نے فرشتوں سے کہا: آدم کو سجدہ کرو تو ابلیس کے سوا سب نے سجدہ کیا (اور) وہ سجدہ کرنے والوں میں شامل نہ ہوا ، (اللہ تعالیٰ نے ) فرمایا: تجھ کو سجدہ کرنے سے کس چیز نے منع کیا، جبکہ میں نے تمہیں حکم دیا تھا؟، اُس نے کہا میں اس سے بہتر ہوں ، تو نے مجھے آگ سے پیدا کیا اور اسے مٹی سے ، (اﷲتعالیٰ نے ) فرمایا: تو یہاں سے اتر ، تجھے یہاں گھمنڈ کرنے کا کوئی حق نہیں پہنچتا، (الاعراف:12-13)‘‘۔یعنی آگ لطیف ہے اور مٹی کثیف ، اور لطیف چیز کثیف سے افضل ہے، تو میں اپنے جوہرِ تخلیق کے اعتبار سے افضل ہو کر اَدنیٰ کے سامنے سجدہ کیسے کروں؟، اسے عقل نہیں مانتی، دلیل اس کا ساتھ نہیں دیتی۔ سواُس نے عقلی دلیل سے اللہ تعالیٰ کے حکم کو رَد کردیا اور راندۂ درگاہ ہوا ۔اور فرشتوں نے بلاچوں وچرا اللہ تعالیٰ کے حکم کو تسلیم کیا اور آدم علیہ السلام کے سامنے سجدہ ریز ہوگئے۔ فرشتوں کو معلوم تھا کہ کمال نہ آگ میںہے ، نہ ذرۂ خاک میں ہے، کمال تو ربِّ ذوالجلال کی عطا میں ہے، وہ چاہے تو ذرّے کو آفتاب سے بالا کردے ، قطرے کو سمندر کردے اور خاک کے پتلے آدم کو رشک ملائک بنادے۔

پس متکبر کی ایک پہچان خود سری ، خود فریبی اوراپنی ذات کو راستیِ فکر (Self Righteousness)کا حامل سمجھنا ہے، ایسے شخص پر اﷲتعالیٰ معرفتِ حق کے دروازے بند کردیتا ہے اور فریبِ نفس میں مبتلا ہوکر وہ اپنی خطا کو صواب ، باطل کو حق ، ظلم کو عدل اور ناروا کو روا سمجھنے لگتاہے۔ آج ہم اپنے پورے ماحول اور نظام کا جائزہ لیں تو ہم پر عیاں ہوگا کہ بحیثیتِ مجموعی ہم اسی مرض میں مبتلا ہیں ۔ یہ فریبِ نفس انفرادی بھی ہوتاہے اور گروہی اور طبقاتی بھی ۔ یہی وجہ ہے کہ آج ہم میں کتنے ہی گروہ ہیں جنہوں نے شریعت کے مسلّمہ معیارات کو رد کرکے اپنے اپنے معیارات وضع کرلئے ہیں ، علامہ اقبال کا یہ فرمان سچ ہے ؎

حقیقت خرافات میں کھو گئی

یہ اُمّت روایات میں کھو گئی

بندہ جب خودرائی ، خود نگری ، خود فریبی اور عُجبِ نفس میں مبتلاہوتاہے ، تو خود کو بڑا سمجھنے لگتا ہے اور دوسروں کو اپنے مقابلے میں حقیر جاننے لگتا ہے، حدیثِ پاک میں ہے:(۱)''رسول اللہ ﷺ نے فرمایا: جس کے دل میں ذرہ بھر بھی تکبر ہوگا ، وہ جنت میں داخل نہیں ہوگا، ایک شخص نے عرض کی: (یارسول اﷲ صلی اﷲ علیک وسلم!) انسان چاہتا ہے کہ اس کا لباس اچھا ہو، جوتے اچھے ہوں،(کیا یہ تکبر ہے؟)، آپ ﷺ نے فرمایا: (نہیں)، بے شک اللہ تعالیٰ(اپنی ذات ، صفات اور افعال میں) جمیل ہے اوراپنی صفتِ جمال کا ظہور( اپنی مخلوق میں بھی ) پسند فرماتاہے ،تکبر تو حق کے انکار اور لوگوں کو (اپنے مقابلے میں) حقیر جاننے کا نام ہے،(مسلم:147)‘‘۔