رونق میلے کی خیر ہو!

موئن جو دڑو میں جو لوگ بھی رہتے تھے وہ بڑے خوش نصیب تھے کہ ہزاروں سال بعد بھی اُن کے گھر آنگن میں خوشیاں ناچ رہی ہیں، اقتدار کے ایوانوں میں بیٹھے ہوئے لوگ اُن پر مہربان ہیں اور سندھ کی ثقافت کو عروج بخشنے کے نام پر پندرہ روزہ پروگرام کے تحت جشن منائے گئے ہیں۔ اِس رونق میلے نے ہمارے دِل میں موئن جو دڑو کے آس پاس باقیات کی شکل میں بسے ہوئے قدیم سندھیوں کے لیے حسد کے جذبات پیدا کردیئے ہیں۔ جن کے بارے میں کوئی کچھ نہیں جانتا اُنہیں ایسے شاندار انداز سے پُوجا جارہا ہے کہ دیکھنے والے انگشت بہ دنداں ہیں۔ دوسری طرف انتہا یہ ہے کہ تھر کے زندہ غریب حالات کی چَکّی میں پستے ہوئے زندہ در گور ہیں۔ مَرے ہوؤں کے نام پر جشن ... اور زندوں کی خاطر تھوڑا سا سوگ بھی نہیں! اِسی کو تو کہتے ہیںکُھلا تضاد ۔

تھر کے مجبور و لاچار باشندوں پر موسم کی اُفتاد ایسی پڑی کہ اُن کے پُھول سے بَچّے خزاں کی نذر ہوئے۔ خوراک کی شدید قِلّت نے تھر کے ریگستان کو کچھ اِس طرح لپیٹ میں لیا کہ معصوم زندگیاں بھی ریت کے ذَرّوں کی سی ہوگئیں۔ اِس سے پہلے کہ کسی کی سمجھ میں کچھ آتا یا ہوش آتا، ڈیڑھ سے زائد پُھول مُرجھا چکے تھے۔ جہاں بچوں کی کِلکاریاں گونجا کرتی تھیں وہاں آہوں اور سِسکیوں کے سِوا کچھ نہ بچا۔

سندھ کے وزیر اعلیٰ سید قائم علی شاہ کو خاصی دیر سے یاد آیا کہ تھر کا علاقہ بھی اُن کی قلمرو کا حصہ ہے اور وہاں جو کچھ ہو رہا ہے اُس کے لیے اُن سے بھی باز پُرس ہوگی۔ کسی بڑے کو تو کیا پُوچھنا تھا اور قیامت کا حساب کتاب ابھی دور ہے۔ ایسے میں میڈیا والوں نے چند سوالات داغ کر شاہ صاحب کو لب کُشائی پر مجبور کیا۔ انتظامیہ کی نااہلی کا ملبہ موسم پر گِراتے ہوئے شاہ صاحب نے فرمایا کہ تھر کے بَچّے نمونیا سے ہلاک ہوئے ہیں۔ ایک رپورٹر نے یہ سُن کر سوال داغا کہ کیا اب سردی کے خلاف تحقیقات کی جائے گی تو شاہ صاحب برہم ہوگئے اور پریس کانفرنس درہم برہم کردی۔ پاکستانی معاشرے اور حکومتی مشینری کو آزاد کہنا اُن کی توہین ہے کیونکہ یہ آزاد نہیں، مادر پدر آزاد ہیں۔ اب کسی پر کوئی پابندی نہیں۔ کسی کے لیے من مانی کی راہ میں کوئی رکاوٹ نہیں۔ جو سیاہ و سفید کے مالک ہیں اُن کی رگوں میں خون سفید تر ہوتا جاتا ہے اور تمام معاملات کو وہ سیاہ تر کرنے پر تُلے رہتے ہیں! یہ نہ سمجھا جائے کہ کسی کو ہوش نہیں آتا۔ ہوش ضرور آتا ہے مگر پانی سَر سے گزر جانے کے بعد۔ سبھی جانتے ہیں کہ مون سُون میں سیلاب کا خطرہ برقرار رہتا ہے مگر پیش بندی کوئی نہیں کرتا۔ اور جب بہت کچھ زیر آب آچکا ہوتا ہے تب اربابِ بست و کُشاد کے ماتھے پر ندامت کی چند بُوندیں نمودار ہوتی ہیں۔

تھر کے ریگستان نے انسانوں کو بھی ریت کے ذَرّات سمجھ کر اپنانا شروع کردیا ہے۔ حکمرانوں کی عدم توجہ سے ایسا تو ہونا ہی تھا۔ بھوک سے بلکتے اور بیماریوں سے تڑپتے بَچّوں پر کسی نے توجہ نہ دی اور معاملات بگڑتے ہی چلے گئے۔ بھوک اور بیماری نے مفاہمت کی پالیسی اپنائی اور یوں اِس مشترکہ عفریت نے بَچّوں کو نگلنا شروع کیا۔ یہ سب کچھ ایسی خاموشی سے ہوا کہ کسی کا دھیان ہی اِس طرف نہیں گیا۔ تھر اور ایسے ہی دوسرے بہت سے علاقے بند پڑی ہوئی سِموں کی طرح ہیں۔ جن کے ہاتھ میں اقتدار اور اختیار ہے وہ اِن علاقوں کو Activate کرنا بھول گئے ہیں۔ یا پھر یوں ہے کہ نیٹ ورک پر دباؤ کم کرنے کے لیے اِن علاقوں کو De-Activated رکھا گیا ہے!

وزیر اعلیٰ کے دورۂ تھر کے موقع پر مِٹّھی کے سرکٹ ہاؤس میں جو کچھ ہوا وہ دیکھ کر قوم کے لیے شارٹ سرکٹ والی کیفیت نے جنم لیا ہے۔ جس علاقے میں بَچّے خوراک نہ ملنے سے مر رہے ہیںوہاں وزیر اعلیٰ اور ان کے رفقاء کے لیے شاندار و پُرتکلف ضیافت کا اہتمام کیا گیا۔ مِٹّھی کے سرکٹ ہاؤس میں ملائی بُوٹی، قورمہ، تِکّے، بریانی اور مچھلی کی ڈِشوں پر مشتمل ضیافت کے اہتمام نے ثابت کردیا کہ اب اہمیت صرف اس بات کی ہے کہ رونق میلہ چلتا رہنا چاہیے۔ اِنسانوںکا کیا ہے، وہ تو مرتے ہی رہتے ہیں۔یہ بیان بھی خوب ہے کہ تھر میں تو ہر سال یہی کچھ ہوتا ہے، نیا کچھ بھی نہیں۔ یعنی جو ہوتا آیا ہے اُسے ہوتے رہنے دیا جائے۔ وزیر اعلیٰ فرماتے ہیں کہ بَچّے بھوک سے نہیں، نمونیا سے مرے۔ عذرِ گناہ بدتر از گناہ۔ چلیے، یہی سہی۔ تو کیا نمونیا کے جن کو علاج کی بوتل میں بند کرنا محکمۂ صحت کی ذمہ داری نہیں؟ جب اہلِ اقتدار اور سرکاری مشینری کا یہ حال ہو تو لوگ زندگی پر موت کو ترجیح کیوں نہ دیں؟ ؎

موت کی راہ نہ دیکھوں؟ کہ بِن آئے نہ رہے

تم کو چاہوں؟ کہ نہ آؤ تو بُلائے نہ بنے!

جو کچھ تھر کے معاملے میں ہوا ہے وہی کچھ ہر سال مون سُون میں سیلاب کے حوالے سے ہوتا ہے۔ سیلاب سالانہ معمول ہے۔ اُسے تو آنا ہی ہے تو پھر پریشان کیوں ہوا جائے۔ یعنی ع

جو آئے آئے کہ ہم دِل کُشادہ رکھتے ہیں!

کسی بھی ہنگامی حالت کو سالانہ معمول قرار دے کر نظر انداز کردیا جائے؟ چشم پوشی برتی جائے؟ بلاول بھٹو زرداری کہتے ہیں کہ تھر سے ملحق بھارتی علاقے میں بھی ایسی ہی قیامت ٹوٹی ہے۔ گویا وہاں کچھ ہو تو اُس کی طرز پر یہاں بھی وہی کچھ ہونے دیا جائے؟ کیا تھر کے بَچّے اِس قوم کا حصہ نہیں؟ ریگستان میں رہنے سے کیا وہ ریت کے ذَرّے ہوگئے؟ کیا بہتر زندگی پر، اور اُس سے بڑھ کر زندگی پر اُن کا حق نہیں؟ تھر میں پانی نہیں مگر سوالات کا ریلا رواں ہے۔ مگر سوالوں کی فکر تو اُنہیں دامن گیر رہتی ہے جو جواب دینے کو اپنی ذمہ داری گردانتے ہوں اور اپنے گریبان میں جھانکنے کے لیے تیار ہوں۔ جب طے کرلیا گیا ہو کہ سوچنا ہی نہیں ہے اور کسی سوال کا جواب بھی نہیں دینا تو پھر کیسی شرم اور کیسی حیا؟

تَھر کے جو پُھول مُرجھاکر ابدی خزاں کی گود میں جا سوئے ہیں اُن کی عظمت کو سلام کہ اُنہوں نے جان دیکر رونق میلے میں کچھ جان ڈالی ہے، سرکاری مشینری کے چند بڑے پُرزے ہِلے ہیں اور ریت کے ٹیلوں کا رُخ کیا ہے!