ایک مثالی اسلامی مملکت کا مثالی منشور (1)

حضرت ابوبکر صدیق،عبداللہ بن عثمان بن عامر بن عمرو بن کعب بن سعد بن تیم بن مرہ بن کعب بن لؤی القرشی التیمی رضی اللہ عنہ ، رحمۃ للعٰلمین خاتم النیین حضرت محمد مصطفی ﷺ کے وصال فرمانے کے بعد ربیع الاول 13؁ھ کو مہاجرین وانصار صحابۂ کرام رضی اللہ عنھم کے اتفاقِ رائے سے خلیفہ منتخب ہوئے،یہ عہدِ رسالت کے بعد اجماعِ امت (Consensus)کی سب سے نمایاں اور اولین مثال ہے۔

رفاقت دوام:اعلان نبوت کے پہلے لمحے سے لے کرآفتاب نبوت کے پردہ فرمانے تک تئیس سالہ نبوی زندگی میں ہر آن، ہر پل، ہر لمحے اور ہر موڑ پر صُحبت ورفاقت ، تائید وحمایت اور جاں نثاری وجاں سپاری کی جو تابندہ روایت حضرت ابوبکر صدیقؓ نے قائم کی، اس کی مثال کہیں اور نہیں ملتی۔ سفر ہو یا حَضَر، بزم ہویارزم، خَلوت ہویاجَلوت ،الغرض وہ کسی بھی لمحے اپنے محبوب ﷺ سے جدا نہ ہوئے۔ یہاں تک کہ روضۂ رسول میں آج بھی آپ کا سرِنیاز تاجدارِ نبوت ﷺ کے قدموں میں ہے، بقول شاعر ؎

پائے رسول پاک پہ سر ہو رکھا ہؤا

ایسے میں آ اَجَل، تو کہاں جا کے مر گئی

یعنی وفات اور بعدالوفات کی جس سعادت عظمیٰ کی کوئی صاحبِ ایمان ،سچا عاشق رسول تمنا کر سکتا ہے، وہ انہیں بفضلہ تعالیٰ نصیب ہے اور ؎

این سعادت بزور بازو نیست

تا نہ بخشد خدائے بخشندہ

غارِ ثور کے تین دن اور تین راتیں ایسی بھی گزریں کہ آفتاب نبوت کے جلوے تھے اور لذت دیدار سے فیض یاب ہونے والی جناب ابوبکر صدیق رضی اللہ عنہ کی نگاہیں تھیں، اس شرف وسعادت میں کواکب ونجوم، آفتاب وماہتاب حتیّٰ کہ چشمِ فلک بھی ان کی شریک وسہیم نہیں تھی، کوئی تیسرا فرد تو تھا ہی نہیں۔

منفرد اعزاز: یوں تو روایات کے مطابق ختم المرسلین ﷺ کے صحابۂ کرام کی تعداد سوالاکھ سے متجاوز تھی لیکن قرآن مجید نے صراحت کے ساتھ جس ہستی کو ''صاحبِ رسول‘‘ کے لقب سے نوازا، وہ صرف اور صرف حضرت ابوبکر صدیق رضی اللہ عنہ ہیں، چنانچہ ارشادِ باری تعالیٰ ہے:''اگر تم نے اس رسول کی مدد نہ کی تو یقینااللہ نے ان کی مدد فرمائی، جب کافروں نے انہیں بے وطن کیا، اس حال میں کہ وہ دومیں سے دوسرے تھے، جب وہ دونوں غار (ثور) میں تھے، جب وہ (رسول مکرم ﷺ) اپنے''صاحب‘‘سے فرما رہے تھے:غم نہ کرو بلاشبہ اللہ ہمارے ساتھ ہے،تو اللہ نے ان پر اپنی تسکین نازل فرمائی، (توبہ: 40)‘‘ ۔اس آیت میں اللہ تعالیٰ نے مختلف پیرائے میں 6مرتبہ حضرت ابوبکر صدیق کا ذکر فرمایا۔حضرت ابو بکر صدیق رضی اللہ عنہ کاایک منفرد اعزاز یہ بھی ہے کہ ان کی چار پشتیں شرفِ صحابیت سے مشرف ہوئیں۔

خُلقِ رسول کا عکس تمام:جب محبت مرتبۂ کمال کو پہنچ جائے تومُحِبّ اپنے آپ کو ذات محبوب میں فنا کر دیتا ہے، طبیعت، طبیعت میں اور مزاج مزاج میں ڈھل جاتا ہے، یہی''مقامِ فنا‘‘حضرت ابوبکر صدیقؓ کاتھا۔ دیکھنے والوں کی نظر میں صورت ان کی تھی لیکن سیرت مصطفیؐ کی تھی، ذہن ان کا تھالیکن فکر مصطفیؐ کی تھی، الغرض وہ سراپا جمال ِمصطفوی کاعکسِ تمام تھے۔ جب سیدالانبیاء ﷺ غارِحرا سے پہلی بار ناموسِ وحی لے کر اضطراب کے عالم میں اپنے گھر تشریف لاتے ہیں، منصب نبوت کے بارامانت کے احساس سے آپ متفکر ہیں اور یہ عین تقاضائے فطرت ہے، تو ام المؤمنین حضرت خدیجۃ الکبریٰؓ، جو عُسر ویُسر کی ہر گھڑی میں آپ کی مُونِس وغمگسار تھیں، آپ کوان جچے تلے الفاظ میں تسلی دیتی ہیں:''قسم بخدا، اللہ تعالیٰ آپ کو کبھی شرمسار نہیں فرمائے گا، کیونکہ آپ رشتۂ قرابت کو جوڑتے ہیں، کمزوروںکا بوجھ اٹھاتے ہیں، ناداروں کے کام آتے ہیں، مہمان نوازی آپ کا شِعار ہے اورآپ حق کی خاطر مصائب میں مبتلا لوگوں کی مدد فرماتے ہیں‘‘۔یہ آپ ﷺ کی شریکِ حیات اور مَحرمِ راز حضرت خدیجہؓ کی زبان سے آپ کی سیرت وکردار کا ایک جامع تعارف تھا۔ اسی طرح ایک مرحلے پر کفارِ مکہ کے مظالم سے تنگ آکر حضرت ابوبکرؓ ترکِ وطن کے ارادے سے نکلتے ہیں کہ اچانک مکہ کے ایک رئیس ابن الدغنہ کا سامنا ہوجاتاہے، وہ آپ کے عزائم سے باخبر ہونے کے بعدآپ کا راستہ روک لیتا ہے اور کہتا ہے ''لاریب، آپ جیسے شخص کو اس بستی سے ہرگز نہیں جانا چاہئے اور نہ ہی ہم آپ کو کسی قیمت پر جانے دیں گے، کیونکہ آپ تو اَخلاقِ کریمہ کا پیکرہیں، آپ ناداروں کے کام آتے ہیں، رشتۂ قرابت کو جوڑتے ہیں، کمزوروں کا بوجھ اٹھاتے ہیں، مہمان نوازی آپ کا شیوہ ہے اور آپ راہِ حق میں مصیبت اٹھانے والوں کے مُعین ومددگار ہوتے ہیں‘‘۔

سیرتِ صدیق کی الفاظ میں یہ تصویر کشی کسی نظریاتی دوست اورجاں نثار کی نہیں بلکہ نظریاتی مخالف کی ہے اور وہ شہادت جو فریقِ مخالف کی طرف سے آئے، اپنے اور غیر سب پر حُجت ہوتی ہے۔یہ حسنِ اتفاق تھایا اَمرواقعی کا بیان کہ سیدہ خدیجۃ الکبریٰ رضی اللہ عنہا نے جن کلمات میں سیرت کو بیان فرمایا، کم وبیش انہی الفاظ میں مکہ کے ایک رئیس ابن الدغنہ نے سیرتِ صدیق کو بیان کیا ہے۔اس سے معلوم ہوا کہ سیرتِ صدیق سیرتِ مصطفیﷺ کے سانچے میں ڈھلی ہوئی تھی۔ بس یوں سمجھئے کہ وہ سراپا آئینۂ خُلقِ مصطفیﷺ تھے۔ قرآن مجید میں متعدد مقامات پر ذاتِ رسالت ِ مآبﷺ کے ذکرِمبارک کے ساتھ متصلاً ذکرِ صدیق بھی آیا ہے۔

12،ربیع الاول 13ھ کو سید المرسلین ﷺ کا وصال ہوااور ہدایت ونور کے اس آفتاب عالم تاب نے رضاء الٰہی سے پر دہ فرمایا، تو صحابۂ کرام میں عجیب کیفیتِ اضطراب تھی ، وہ اس صدمے کے لئے ذہنی طور پر تیا ر نہ تھے ۔ حضرت عمرفاروق رضی اللہ عنہ جیسے جلیل القدر صحابی اس خبر کو سننے کے لئے کسی طور پر بھی تیار نہیں تھے۔ ایسے عالم میں حضرت ابوبکر صدیق تشریف لائے ،کاشانۂ نبوت میں داخل ہوئے اور حضور انورﷺ کی جبینِ اقدس کو بوسہ دیا اور باہر مسجد نبوی میں تشریف لائے اور صحابۂ کرام کے لئے تسکین وطَمانیت کے کلمات ارشاد فرمائے کہ:''تم میں سے جو حضرت محمد ﷺ کی عبادت کرتا تھا تو سنو!وہ وصال فرماگئے ہیںاور جو اللہ کی عبادت کرتا تھا تو اسے یقینِ کامل رکھنا چاہئے کہ اس کا معبود مطلق اللہ تعالیٰ ہمیشہ سے صفتِ حیات کے ساتھ قائم ہے اور ہمیشہ رہے گا، اس پر فنا وزوال کبھی نہ آیا ہے نہ آئے گا‘‘۔اور پھر آپ نے قرآن مجید کی یہ آیت تلاوت فرمائی:ترجمہ:''محمد (خدا نہیں)صرف رسول ہیں، ان سے پہلے بھی رسول گزر چکے ہیں، تو کیا اگر وہ وفات پا جائیں یا(قضائے الٰہی سے) شہید ہوجائیں، تو تم الٹے پاؤں پھر جاؤ گے؟،(آل عمران:144)‘‘۔ ان پُراثر کلمات سے صحابۂ کرامؓ کو قلبی اطمینان نصیب ہوا،حضرت عبداللہؓ فرماتے ہیں ہمیں ایسا لگا جیسے یہ آیت آج ہی نازل ہوئی ہے۔

حضرت ابو بکرصدیق رضی اللہ عنہ کا خطبۂ خلافت : اس کے بعد مہاجرین وانصار صحابۂ کرام رضی اللہ عنھم نے متفقہ طور پر حضرت ابوبکر صدیق کو خلیفہ منتخب کیا، آپ مسجد نبوی میں تشریف لائے اور منبرِ رسول ﷺ پر بیٹھ کر ایک انتہائی اثر انگیر، دل نشیںاور جامع خطبہ ارشاد فرمایا۔چند جملوں پر مشتمل یہ خطبہ ''خلافت علی مِنہاج النبوۃ‘‘کی اولین ،مستند تاریخی دستاویز ہے اور جسے بلاشبہ''ایک مثالی اسلامی جمہوری فلاحی مملکت کا مثالی منشور‘‘قرار دیا جاسکتا ہے۔ معجزۂ ''جوامِعُ الکِلَم‘‘ کے براہِ راست فیض یافتہ حضرت ابو بکر صدیقؓ کی زبان مبارک سے نکلا ہوا ایک ایک لفظ نپا تلا ہے،حکمتوں کا خزینہ اور معانی ومطالب کا گنجینہ ہے۔اس خطبۂ خلافت میں نظامِ امارت وخلافت کے قیام کی ضرورت وحکمت ، اطاعتِ امیر کا دائرۂ کار، مامورین یعنی عوام کی ذمہ داری، انسدادِ فواحش کی اہمیت اور جہاد کی ترغیب وضرورت سب امور کا احاطہ کیا گیا ہے۔

چنانچہ آپؓ نے فرمایا:''لوگو!میں تم پر حاکم مقرر کیا گیا ہوں، حالانکہ میں تم لوگوں میں سب سے افضل(ہونے کامدعی) نہیں ہوں، اگر میں ٹھیک ٹھیک کام کروں توتم میری اعانت کرو، اور اگر میں برائی کی طرف جھکنے لگوں تو تم مجھے سیدھا کردو،سچائی امانت ہے اور جھوٹ خیانت ۔تم میں سے جو (بظاہر )کمزور ہے، وہی حقیقت میں میرے نزدیک طاقتور ہے تاوقتیکہ میں (ظالم سے) اُس کا حق واپس نہ دلا دوں، ان شاء اللہ تعالیٰ۔اور تم میں جوبظاہر بڑا طاقتور ہے وہی میرے نزدیک (سب سے)کمزور ہے تاوقتیکہ میں اُس سے (مظلوم کا) حق چھین نہ لوں،ان شاء اللہ تعالیٰ۔ جو قوم''جہاد فی سبیل اللہ‘‘کوچھوڑ دیتی ہے،اللہ تعالیٰ (اس کے وبال کے طور پر)اُس پر ذلت وخواری مسلّط فرما دیتا ہے، اور جس قوم میں بے حیائی وبدکاری کی وبا پھیل جاتی ہے، اللہ تعالیٰ اس پرمصیبتیں نازل فرما دیتا ہے۔ اور (سنو!)جب تک میں اللہ اور اس کے رسول کی اطاعت کے جادۂ مستقیم پر قائم رہوں، تم بھی میری اطاعت کرنا اور اگر کبھی میں (خدانخواستہ)اللہ تعالیٰ اور اس کے رسول مکرمؐ کی اطاعت کا بندھن توڑ کر نافرمانی کے رستے پر چل پڑوں، تو پھر تم پر میری اطاعت ہرگز لازم نہیں ہوگی، اچھا، اب نماز(باجماعت)کے لئے اٹھ کھڑے ہوجاؤ، اﷲتعالیٰ تم پر اپنی رحمتوں کا نزول فرمائے،(تاریخ الخلفاللسیوطی بحوالہ سیرۃ ابن اسحاق ) ‘‘۔ اس عظیم الشان خطبۂ خلافت میںاسلامی نظام امارت وخلافت کی حدود، دائرہ ٔ کاراور فرائض کا واضح طور پر تعین کردیا ہے،ہم سطور ذیل میں ان میں سے چند امور کی ضروری وضاحت درج کر رہے ہیں۔ (جاری )