Disclaimer

آج کل ہمارے الیکٹرانک میڈیا پر بعض پروگراموں کے شروع میں Disclaimerلکھا ہواآتاہے اوراس کے مندرجات پلک جھپکتے میں نظروں کے سامنے اسکرین پر گزرجاتے ہیں۔ اس کا ہم اردو میں ترجمہ ''اظہارِ لاتعلقی‘‘ یا ''اعلانِ برأت‘‘ کرسکتے ہیں ۔ اس میں بتایا جاتاہے کہ پروگرام میں پیش کردہ مشمولات (Contents)میزبان کے ذاتی خیالات ہیں اور ہمارا فرض ہے کہ انہیں حقائق کے طور پر پیش نہ کریں یا اس میں پیش کیے گئے واقعات فرضی ہیں اور کسی سے مشابہت محض ''اتفاق‘‘ ہوگا اور یوں ادارہ ان خیالات وافکار کے لئے اپنا فورم یا پلیٹ فارم بھی فراہم کرتاہے اور اس کے ممکنہ قانونی نتائج سے بری الذّمہ بھی ہوجاتاہے۔

''اتفاق‘‘ سے یاد آیا کہ ہماری سیاست کے ایک مرنجا مرنج کرداراور ایک عرصے سے اپنی جماعت کے معتوب اور ناپسندیدہ حافظ حسین احمد صاحب ہیں ۔ 2002ء کے قومی انتخابات کے بعداُس وقت کے صدر جناب جنرل(ر) پرویز مشرف کو ایک عدد فرماں بردار اور بے ضرر وزیراعظم کی تلاش تھی اورمختلف شخصیات زیرغور تھیں، اُن میں سے ایک پاکستان پیپلز پارٹی پارلیمنٹیرین کے جناب مخدوم محمدامین فہیم بھی تھے۔''علیٰ رُؤوسِ الاَشھاد‘‘ یعنی آن دی ریکارڈ ملنے میں اپنی پارٹی کے حوالے سے انہیں مشکلات دَرپیش تھیں ۔چنانچہ رات کو مری روڈ پردامنِ کوہ میں ایک ریستوران میں یہ ملاقات ہوگئی۔ اخبارات کے تجسُّس اور رازہائے دروں جاننے کے ماہراور ہرآن چوکس رہنے والے رپورٹرزنے تعاقب کرکے اس کا کھوج لگالیا اور یوں یہ راز طشت اَزبام ہوگیا، چنانچہ فریقین نے اسے ''اتفاقیہ ملاقات‘‘ قرار دیا۔ اس پر حافظ صاحب نے بامعنی طنزیہ پھبتی کسی کہ ہاں واقعی یہ ''اتفاقیہ ملاقات‘‘ تھی، کیونکہ اس پر پیشگی ''اتفاق‘‘ ہوگیا تھا۔

گفتگو کا اصل موضوع ''Disclaimer‘‘تھا۔ سوال یہ پیدا ہوتاہے کہ جن زریں افکار وخیالات کے اَمرواقعہ اور نفس الامرکے مطابق ہونے کا خودادارے کو یقین نہیں ہے، ان کو نشر کرنااخلاقًا کس حدتک درست ہے؟،یہ ایک اہم سوال ہے۔ جب کہ اللہ تعالیٰ کا حکم یہ ہے:''اے ایمان والو! جب تمہارے پاس کوئی فاسق (یعنی بے اعتبار شخص) کوئی خبر لے کرآئے ، تو (فوری رَدِّ عمل سے پہلے اُس کی) تحقیق کرلیاکرو ، کہیں ایسا نہ ہو کہ تم حقیقت حال کو جانے بغیر کسی قوم کو نقصان پہنچادو اور پھر تمہیں اپنے کئے پر ندامت ہو، (الحجرات:6)‘‘۔ رسول اللہﷺ نے فرمایا: آدمی کے جھوٹا ہونے کے لئے اتنا ثبوت ہی کافی ہے کہ ہر سنی سنائی بات کو (تحقیق کے بغیر ہر ایک سے) بیان کرتاپھرے،(صحیح مسلم:07)‘‘۔

الیکٹرانک میڈیاکو اب تک بلوغت کی منزل میں داخل ہوجاناچاہئے تھا،اُس کے انداز میں ٹھہراؤ آجانا چاہیے تھا۔ مسابقت(Competition) اگر تعمیری اور مثبت ہو تویہ ایک اچھی رَوِش اور قابلِ تحسین شِعار ہے، محض سنسنی خیزی کے لئے نہ ہو کہ لوگ سکتے میں آجائیں ، مبہوت ، حیرت زدہ اور دہشت زدہ ہوجائیں اور آپ کی اسکرین سے چپٹے رہیں ۔ا سی طرح صرف ایسی خبروں پر زور نہیں ہوناچاہئے جو پاکستان میں مایوسی پھیلائیں اور بیرون ملک پاکستان کا منفی چہرہ دکھائیںاور اپنے اور غیر سب کو یہ یقین ہونے لگے کہ پاکستان اب حکمرانی کے قابل نہیں رہا ۔ یا یہ کہ پاکستان ایک انتہائی خطرناک ملک ہے اور ہر پاکستانی دہشت گرد ہے اور انسانیت کے لئے خطرے کی علامت ہے۔ ایسے میں کون پاکستان میں سرمایہ کاری کے لئے آگے آئے گا اور غیر ملکی ٹیمیں کیسے پاکستان کے میدانوں کا رُخ کریں گی۔

نوبت یہاں تک آگئی کہ یہی Disclaimerاب الیکٹرانک میڈیاکے چینل ایک دوسرے کے خلاف استعمال کررہے ہیں۔ اب صورتِ حال یہ ہے کہ ہمارے تمام حدود وقیود اور اخلاقی بندھنوں سے آزاد بلکہ بہت زیادہ آزاد میڈیا کے لئے باہر سے اور اندر سے بھی آوازیں اٹھ رہی ہیں کہ :Enough is Enough، بہت ہوچکا ، اب کسی قانونی اوراخلاقی دائرے میں آجائیے اور قبل اس کے کہ پورے معاشرے میں ایک مزاحمتی تحریک برپاہو، خود اپنی غلطی کا اعتراف وادراک کرکے اپنے اندر ایک اصلاحی نظام قائم کریں اور توازن واعتدال کی راہ اپنائیں۔

اسی طرح لازم ہے کہ کسی کی تحقیر وتوہین اور طنز ومزاح میں فرق ملحوظ رکھا جائے۔ بقول شخصے: احتساب اور انتقام میں بہت خفیف سافرق ہے، اسی طرح میرے نزدیک تحقیر اور طنز میں بھی معمولی فرق ہے۔ اور اسلام کسی کی تحقیر ، تضحیک ، توہین اور تذلیل کی اجازت نہیں دیتا۔'' سُورۃُ الحجرات‘‘ میں اس حوالے سے تفصیلی احکام موجود ہیں۔ اللہ تعالیٰ ارشاد فرماتا ہے: (۱) ''اے ایمان والو! تم میں سے کچھ لوگ دوسرے لوگوں کا مذاق نہ اڑائیں، ہوسکتا ہے کہ جن کا مذاق اڑایا جارہا ہے، وہ (درحقیقت) مذاق اڑانے والوں سے بہتر ہوں ، اسی طرح عورتیں بھی دوسری عورتوں کا مذاق نہ اڑائیں ، بہت ممکن ہے کہ جن کا وہ مذاق اڑا رہی ہیں، وہ اُن سے بہتر ہوں اور اپنے (یعنی ایک دوسرے کے) عیب بیان نہ کرو اور ایک دوسرے کو برے ناموں سے نہ پکارو ، ایمان لانے کے بعد (اﷲتعالیٰ کی) حکم عدولی بدترین گناہ ہے اورجواس (یعنی واضح احکام آنے) کے بعد بھی (اپنی اِس رَوِش سے) رجوع نہ کرے، تو یہی لوگ ظالم ہیں، (الحجرات:11)‘‘۔اسی طرح سورۂ ''الھُمَزہ‘‘ میں دوسروں پر لفظاً یا اشارتاً طعن وتشنیع کرنے اور عیب جوئی کی شدید مذمت فرمائی گئی ہے اور اس پر بڑی وعید آئی ہے۔

اسی طرح الیکٹرانک میڈیا کے اینکر پرسنزنے مصلح اعظم ہونے کے ساتھ عدالت کا منصب بھی اَزخود حاصل کرلیا ہے۔ اسلام آباد میں رمشامسیح کیس سامنے آیا تو ''وائس آف امریکہ‘‘ نے مجھے ''راؤنڈ ٹیلیفونک‘‘ کانفرنس میں شرکت کی دعوت دی۔ جب میری باری آئی تو میںنے پروگرام کے اینکریا میزبان سے گزارش کی کہ مجھے تھوڑی سی تمہیدی گفتگو کی اجازت دیں، انہوں نے اَزراہِ کرم اجازت دیدی۔ میں نے کہا : فرض کریں کہ ''قانونِ تحفظِ ناموسِ رسالت‘‘ امریکہ کا قانون ہوتا اور وہاں یہ واقعہ رونما ہوتا، تو کیا مقدمے کی تفتیش پولیس کا متعلقہ ادارہ کرتا یاکوئی پرائیویٹ مولانا صاحب یارپورٹر؟، اگر رمشامسیح نابالغہ تھی، تومولانا صاحب فیصلہ صادر کرتے یا عدالت اس معاملہ میں کسی ماہر طبیب کی رائے لیتی؟، اگر اُس کا دماغی توازن درست نہیں تھا، تو کوئی مولانا صاحب یا رپورٹر فیصلہ صادر کرتا یا عدالت کسی ماہر نفسیات سے باضابطہ رائے مانگتی؟۔ انہوں نے کہا: یقینا یہ پولیس اور عدالت کا کام تھا۔ میں نے عرض کیا: ہمارے ہاں تو 40منٹ میں یہ تمام مراحل کسی بھی چینل کے ٹاک شو میں حل ہوجاتے ہیںاور اس مسئلے میں بھی ایسا ہی ہوا کہ ایک مولانا صاحب نے بذاتِ خود تحقیق کرکے اسے مُد عی قاری صاحب کی سازش قرار دیا اور آخر میں اینکر پرسن نے سوال کیا: مولانا صاحب اُس مولوی کی سزا کیا ہونی چاہئے؟۔ بس آخر میں ایک یہی مرحلہ باقی رہ جاتاہے کہ اسے اسٹوڈیوز میںجکڑکر کھڑا کردیا جائے اور اینکر پرسن اسے نشانہ لگا کر فائر کھول دیں اور فوری انصاف کی مثال قائم ہوجائے۔ کہاں کی تحقیق اور کیسی عدالتیں ، اس لمبے بکھیڑے میں پڑنے کی کیا ضرورت ہے۔ میں نے اُن سے کہا: آپ بتائیں کیا امریکہ میں ماورائے عدالت یہ سارے مراحل طے ہوسکتے ہیں، انہوں نے کہا: ہرگز نہیں ، یہ سب تحقیقاتی اداروں اور پولیس کاکام ہے۔ میں نے عرض کیا : ہمارے ہاں یہی ہورہا ہے اور ہمیں بتایا جاتاہے کہ اسے میڈیا کی آزادی کہتے ہیں ۔ توایسے حالات میں جب میڈیاکسی واقعے کے بارے میں پہلے ہی ایک جذباتی فضا پیداکردے اور کیمرے تعاقب میں ہوں ، توپولیس کی کیا جرأت کہ وہ آزادانہ تحقیقات کا روگ پالے، اس کی ہمت ہے کہ میڈیا کے عادلانہ فیصلے کو چیلنج کرے۔

لہٰذا انتہائی مؤدبانہ گزارش ہے کہ مزاج، رَویوں اور اقدامات میں ٹھہراؤ پیدا کیا جائے۔ کسی کے پاس کسی واقعے کے بارے میں مصدّقہ معلومات ہیں تو متعلقہ ادارے کے سامنے پیش کرے۔ سردست صورتِ حال یہ ہے کہ آگے آگے میڈیا ہے اور پیچھے پیچھے حکومت، وہ بھی ڈری اور سہمی ہوئی۔ بعض میڈیا کے ماہرین عقل ودانش کے امام ہیں ، ہونا تو یہ چاہئے تھا کہ قوم انہیں فرائض حکومت تفویض کرتی تاکہ حکومتی نظام کی غلطیاں زیرو لیول پر آجائیں ، لیکن لگتا ہے کہ عوام میں دس بارہ سال سے اپنی آنکھوں سے انہیں دیکھتے ہوئے اور کانوں سے سنتے ہوئے بھی یہ شعورپیدا نہیں ہوا۔ آج کل ایک اور من پسند موضوع حکومت اور دفاعی اداروں کا اختلاف ہے اور میڈیا پرسنز کسی ناگہانی حادثے کے شدت سے منتظر ہیں ، اللہ خیرکرے۔