عام آدمی سے گفتگو

جب بھی عام آدمی کا ذکر ہوتا ہے، ذہن میں صرف پریشانیاں اُبھرتی ہیں۔ ایسا لگتا ہے عام آدمی کو پریشانیوں اور اُلجھنوں نے گود لے رکھا ہے! ہم رات دن عام آدمی کے حوالے سے خدا جانے کیا کیا کہتے اور سُنتے ہیں مگر حقیقت یہ ہے کہ ہم اُس کے بارے میں کم ہی جانتے ہیں۔ اُس کی زندگی کے بہت سے گوشے بے نقاب ہونے سے رہ گئے ہیں۔ سبب اِس کا شاید یہ ہے کہ اِس کام کے لیے اب تک این جی اوز کو مناسب فنڈنگ نہیں ہوسکی!

ہم نے سوچا کسی عام آدمی سے بات کریں اور اُس سے جو تبادلۂ خیالات ہو وہ آپ کی خدمت میں پیش کردیا جائے تاکہ آپ بھی مطمئن ہوسکیں کہ عام آدمی کے جذبات آپ تک پہنچ گئے۔

کل سڑک پر ایک عام آدمی سے ملاقات ہوئی۔ عام آدمی سڑک ہی پر ملتا ہے۔ اُس کے مقدر میں سڑکیں ناپنا لکھا ہے یا شاید اُس نے خود ہی اپنی تقدیر میں یہ کام فرض کرلیا ہے۔ ہم نے کہا فرض کیجیے آپ اِس وقت ٹی وی اسٹوڈیو میں بیٹھے ہیں اور آپ کا انٹرویو لاکھوں، بلکہ کروڑوں افراد دیکھ رہے ہیں تو آپ سب سے پہلے کیا کہنا چاہیں گے۔ عام آدمی بولا۔ ''سب سے پہلے تو شکریہ ادا کروں گا کہ کچھ بولنے کا اور اسکرین پر بہتر طریقے سے نمودار ہونے کا موقع فراہم کیا۔ بڑوں کی طرح بڑبولا پن تو مجھ میں ہے نہیں جو بولنے پر آؤں تو سوچے سمجھے بغیر بولتا ہی چلا جاؤں۔ میری حیثیت کچھ بھی سہی، اللہ نے ہزار مسائل کے باوجود تھوڑی بہت شرم اور غیرت رہنے دی ہے جو سوچ سمجھ کر بولنے میں مدد دیتی ہے!‘‘

ہم حیران رہ گئے کہ عام آدمی اِتنی اچھی گفتگو بھی کرسکتا ہے۔ ہم نے کہا کہ اینکر کیوں نہیں بن جاتے تو عام آدمی تیوری پر بَل چڑھاتے ہوئے بولا۔ ''آپ کیا چاہتے ہیں؟ میں بھی بولنے کے نام پر جانوروں کو شرمانے والی بولیاں بولنے لگوں؟ غریب ہوں تو کیا ہوا، میرے بھی کچھ اُصول ہیں جنہیں سینے سے لگائے زندہ ہوں۔ اور کچھ تو ہے نہیں اِس لیے اب اُصولوں ہی کو کُل اثاثہ گردانتا ہوں۔‘‘

عام آدمی کو تھوڑے سے اشتعال کے عالم میں دیکھ کر ہم نے یاد دلایا کہ آپ اپنے بارے میں کچھ بتا رہے تھے۔ وہ بولا۔ ''ہمارے بارے میں پتا نہیں کیا کیا بولا جاتا ہے مگر خود ہمیں بولنے نہیں دیا جاتا۔ لکھنے والے ہم پر ناول لکھ کر مال بھی کماتے ہیں اور ایوارڈ بھی لے اُڑتے ہیں مگر ہم سے ہماری کہانی کوئی نہیں سُنتا۔ سُنانے بیٹھو تو لوگ کہتے ہیں وہ دل کشی نہیں جو فکشن رائٹرز پیدا کرتے ہیں! لوگ مجھے ''ع‘‘ والا عام آدمی سمجھتے ہیں جبکہ میں خود کو ''الف‘‘ والا آم آدمی گردانتا ہوں۔ حالات نے مجھے چُوس کر گٹھلی کی طرح پھینک دیا ہے۔‘‘

آپ بھی عام آدمی کے بارے میں بہت کچھ جاننا چاہتے ہوں گے۔ مثلاً یہ کہ انتہائی مشکل حالات کے باوجود وہ کس بات پر شکر ادا کرتا ہوگا۔ کیا واقعی عام آدمی شکر ادا کرنے کی پوزیشن میں رہا ہے؟ وہ کہتا ہے۔ ''کیوں نہیں؟ ویسے تو ہر حال میں اللہ کا شکر ادا کرنا چاہیے مگر اِس بات پر اللہ کا زیادہ شکر ادا کرتا ہوں کہ اب تک زندہ ہوں اور 'روشن مثال‘ کی طرح سب کے سامنے ہوں۔ میں اب تک زندہ ہوں تو یہ اللہ کا احسان، میرا کارنامہ اور حالات کی ناکامی ہے!‘‘

حکومت کی کوئی ایسی ''مہربانی‘‘ ہے جس پر عام آدمی اُس کا شکریہ ادا کرنا چاہے؟ وہ کہتا ہے۔ ''کیوں نہیں؟ کون کہتا ہے کہ ہمارے حکمرانوں کے سینے میں دِل نہیں؟ یہ کرم بھی کیا کم ہے کہ اب تک سانس لینے پر کوئی ٹیکس نہیں لگایا! سورج کی روشنی بھی اب تک بلا معاوضہ مل رہی ہے۔ اِن دونوں مَدوں میں حکومت کا ہم پر ٹیکس عائد نہ کرنا اِس بات کی بَیّن دلیل ہے کہ اللہ ہے اور ہم پر مہربان ہے!‘‘

عام آدمی کا بنیادی مسئلہ کیا ہے؟

عام آدمی ہی کی زبانی سُنیے۔ ''بہت سوں کی نظر میں تو ہم خود ایک بنیادی مسئلہ ہیں۔ ویسے ہمارے لیے بجلی اور پانی کا حصول سب سے بڑا مسئلہ ہے۔ پانی کا معاملہ تو ہم نے بہت پہلے اللہ پر چھوڑ دیا تھا۔ جب چاہیے برسا دے۔ بجلی کا معاملہ بھی اب مجبوراً اللہ ہی پر چھوڑا ہے۔ ٹھیک ہے، اللہ جو بجلی دیتا ہے وہ بہت خطرناک ہے مگر یہ بھی تو دیکھیے کہ اِنسان اپنی بنائی ہوئی بجلی کا جو بل بھیجتے ہیں وہ بھی کم تباہ کن نہیں ہوتا! سچ تو یہ ہے کہ تار میں دوڑتی بجلی میں کم اور اُس کے بل میں زیادہ کرنٹ پایا جاتا ہے!‘‘

ہم نے جب زندگی کے بارے میں نظریہ جاننا چاہا تو عام آدمی خاصا تُنک کر بولا۔ ''یہاں دو وقت کی روٹی کے لالے پڑے ہوئے ہیں۔ خالص حیوانی سطح پر زندگی بسر ہو رہے ہیں۔ جو ہم گزار رہے ہیں وہ زندگی ہی نہیں تو اُس کا نظریہ کہاں سے لائیں؟ کسی نہ کسی طرح صبح کو شام کرلیتے ہیں، بس۔ ہم کیا اور ہماری وقعت کیا؟‘‘

حکومت عام آدمی کے حالات بہتر بنانے کے لیے بہت سے اقدامات کرتی رہتی ہے۔ اِس حوالے سے عام آدمی کہتا ہے۔ ''ہمیں سستی چیزیں فراہم کرنے کے نام پر جو بچت بازار لگائے جاتے ہیں اُن میں چیزیں عام دکانوں سے زیادہ مہنگی ملتی ہیں۔ روز ایک بچت بازار لگ رہا ہے۔ اب یہ بازار خریداری سے زیادہ دل بہلانے کے مقامات ہیں۔ بہت سے مرد و زن صرف آنکھ مَٹکّے کے لیے بچت بازار کا رُخ کرتے ہیں!‘‘

عام آدمی مہنگائی کا مقابلہ کس طرح کرتا ہے۔ جواب دیکھیے۔ ''مہنگائی کا تو یہ حال ہے کہ ایک صاحب نے انڈوں پر مُرغی بٹھائی۔ مدت پوری ہوئی تو وہ بے تاب ہوئے کہ انڈوں سے چُوزے باہر آئیں۔ مگر تین دن اوپر ہوگئے، نہ انڈے ٹوٹے نہ چُوزے باہر آئے۔ وہ صاحب حیران ہوئے کہ کیا کائنات کا نظام تبدیل ہوگیا ہے! انہوں نے تنگ آکر چُوزوں کو آواز دی کہ باہر کیوں نہیں آ رہے۔ اندر سے آواز آئی کہ ہم کہاں خیریت سے ہیں، باہر بہت مہنگائی ہے! سپیرے بین بجا بجاکر تھک جاتے ہیں مگر ناگ ٹَس سے مَس نہیں ہوتے۔ سپیرے پوچھتے ہیں کہ ناراض ہوں، جُھومتے کیوں نہیں؟ جواب میں ناگ کہتے ہیں ہم کیا تمہارے باپ کے نوکر ہیں کہ مُفت میں جُھومتے رہیں؟ دو سال سے پیسے تو بڑھائے نہیں، صرف بین بجائے جارہے ہو!‘‘

اگر واقعی یہ عالم ہے تو پھر گزارا کیسے ہوتا ہے؟

عام آدمی نے اِس سوال کے جواب میں پتے کی بات بتائی۔ ''جو اِتنی بڑی کائنات چلا رہا ہے وہ ہماری زندگی کی گاڑی بھی چلا رہا ہے! اِس دورِ پُرفتن میں عام آدمی کا زندہ رہ پانا اللہ کے کرم کے بغیر ممکن نہیں۔‘‘

حکومتیں یقین دلانے کی کوشش کرتی رہتی ہیں کہ عام آدمی کا بھی مستقبل ہے اور تابناک ہے۔ ہم نے پوچھا کہ بچوں کے مستقبل کے بارے میں کیا سوچا ہے تو عام آدمی نے کہا۔ ''ہم تو حال سے بے حال ہیں، مستقبل کا کیا سوچیں؟ گھر میں گوشت، سبزی اور پھلوں کے پوسٹرز لگا رکھے ہیں۔ ہمارے بچے اب پوسٹرز دیکھ کر ہی پیٹ بھر لیتے ہیں۔ اگر یہی حال رہا تو کچھ عرصے کے بعد ہم بھی پوسٹرز ہی میں ملا کریں گے کہ دیکھو، غریب آدمی ایسا ہوا کرتا تھا!‘‘

ہم نے کہا حکومت آپ لوگوں کو آباد کرنے کے لیے پلاٹس وغیرہ بھی تو دیتی رہتی ہے۔ اِس پر عام آدمی نے وضاحت کی۔ ''یہ پلاٹ صرف وعدوں کی نگری میں ہوتے ہیں۔ حکومت اور سیاست دانوں نے ہم سے جتنے وعدے کئے ہیں اُن کے حساب سے تو ہر آدمی کے پاس چار پانچ کروڑ روپے کی پراپرٹی ہونی چاہیے!‘‘

آپ کے پاس کوئی پلاٹ ہے؟

اِس سوال کا جواب عام آدمی نے یوں دیا۔ ''میں تو خود ایک پلاٹ ہوں جس پر وزیر، مشیر اور اپوزیشن لیڈر دعووں اور وعدوں کا اسکرپٹ لکھتے رہتے ہیں۔ ویسے یہ کہانی ہے بہت مختلف کیونکہ end سے شروع ہوتی ہے!‘‘

عام آدمی کس کام کا ہے؟ کیا وہ حکومت کے کام آسکتا ہے؟ اِس حوالے سے عام آدمی کہتا ہے۔ ''کیوں نہیں؟ ہم حکومت کے بہت کام آسکتے ہیں۔ اگر حکومت خلائی بستیاں بسانے کا پروگرام بنائے تو ہم ہراول دستے کا کردار ادا کرسکتے ہیں۔ خلا میں پانی ہے نہ بجلی۔ ہم بھی اِن دونوں کے بغیر جی رہے ہیں۔‘‘

عام آدمی کے دِل کو کسی بات سے سُکون ملتا ہے؟ اگر ہاں، تو کس بات سے؟

چشم کُشا جواب ملاحظہ فرمائیے۔ ''ہم یہی سوچ کر دل بہلا لیا کرتے ہیں کہ ہم ایک دن مِٹّی میں مل جائیں گے اور جنہوں نے ہمیں جیتے جی مِٹّی میں ملا رکھا ہے اُن کا بھی یہی انجام ہونا ہے!‘‘