پرانی محفلیں یاد آ رہی ہیں

گزرے دنوں کے دوست یاد آتے ہیں اور دل سے اک ہوک سی اٹھتی ہے ؎

چراغوں کا دھواں دیکھا نہ جائے

ذہن پہ زور دیتا ہوں اور یاد نہیں آتا کہ فاروق حیدر سے پہلی ملاقات کب ہوئی تھی۔ جی ہاں وہی آزاد کشمیرکے سابق وزیر اعظم۔ کھلنڈرے اور لااُبالی مگر دیانت دار اور صداقت شعار۔ کیا سردار سکندر حیات سے تحفے میں ملے تھے یا اچانک کوئی آمنا سامنا۔ بہرحال دوستی اور بہت بے تکلف دوستی۔ اقتدار ملا تو کہا: روپیہ بنائوں گا اور نہ بنانے دوں گا۔ کھل کر بات کرتے، بعض اوقات تو خطرناک راز بھی بیان کر دیتے۔ سگریٹ پہ سگریٹ سلگاتا، خوش گفتار آدمی۔ اقتدار سے رخصت ہوئے تو معلوم نہیں، کیوں احباب کی زندگی سے بھی نکل بھاگے ؎

وہ لوگ جن سے تری بزم میں تھے ہنگامے

گئے تو کیا تری بزمِ خیال سے بھی گئے؟

زمانہ گزرا، سردار سکندر حیات کا حال پوچھا تو کہا: وزارتِ عظمیٰ سے مستعفی ہونے کا ارادہ ہے۔ ایجنسیوں والے سنتے ہیں اور نہ افسر لوگ۔ عرض کیا، توقف فرمائیے۔ کل شام اگر آپ میرے ہاں تشریف لا سکیں تو اس پر بات کریں گے کہ کیا کوئی حل موجود ہیں۔ اس طرح زچ ہو کر اگر آپ پیچھے ہٹے تو حریف کے مقاصد پورے کرنے کے سوا کیا کارنامہ آپ انجام دیں گے۔ خاموش وہ میری بات سنتے رہے۔ اگلی صبح عارف کے ہاں میں انہیں لے گیا۔ کہا: مسئلہ گھر میں ہے، پارلیمانی پارٹی میں نہیں۔ ثانیاً اپنے دل کی خبر لیجیے۔ بولے: پہلی بات تو آپ کی ٹھیک ہے۔ دل مگر سلامت

ہے۔ معالج سے ملنے کا مشورہ دیا۔ ہفتے بھر کے بعد آپریشن ہوا۔ پندرہ دن کے بعد ان کا فون آیا، جب بہت دور میں رحیم یار خان میں تھا۔ صحرائی شہر کا خوشگوار موسم اور ڈھلتا آفتاب۔ صحن میں والدہ ماجدہ کے پاس میں بیٹھا تھا۔ پوچھا: کیا پابندی کے ساتھ دعائیں آپ پڑھتے ہیں؟ بولے: اسی نے بچا لیا۔ سردار عتیق کو اکثریت کی حمایت حاصل ہو گئی۔ متعلقہ لوگوں نے ہر بار مگر یہ کہا: ارکانِ اسمبلی کو لے کر آئیے۔ وہ آمادہ نہ ہوئے۔ سردار صاحب نے اپنی مدّت پوری کی اور ٹھاٹ سے۔ یہ الگ بات کہ ایک آدھ مجبور افسر کے تبادلے کو کہا تو سن کر نہ دیا۔ بے نیاز آدمی ہیں اور لیڈروں کے باب میں اپنا حال بھی یہ ہے کہ ؎

اس بھری دنیا میں صنم تو اکیلا تو نہیں

تو نہیں اور سہی‘ اور نہیں اور سہی

اگلی بار سردار عتیق جیت گئے کہ سردار عبدالقیوم خان کی صحت برقرار تھی اور آزاد کشمیر نے ان سے بہتر سیاستدان پیدا نہیں کیا؛ اگرچہ اولاد نے بالآخر عاجز کر دیا۔ عتیق وزیر اعظم ہوئے تو بچگانہ باتیں کرتے، حرکتیں بھی۔ ایک بار فرمایا: اب تو پیشاب سے بجلی پیدا کی جا سکتی ہے۔ فاروق حیدر موجود تھے: بولے شروع کیجیے۔ ایک بار یہ کہا: مظفر آباد سے میرپور تک براہِ راست سڑک بنائوں گا۔ فاروق حیدر کو ایسا موقع اللہ دے۔ کہا: ایک شہر بہت بلندی پر واقع ہے۔ ایک طرف کا پٹرول بھی بچ رہے گا۔ بجلی پیدا کرنے کے لیے 550 ڈیم بنانے کا سردار صاحب نے اعلان کیا۔ ایک عدد ہی

بنا سکے اور اس کا افتتاح جنریٹر کی روشنی میں ہوا۔

آزاد کشمیر کے وزیر اعظم کا سب سے بڑا مسئلہ خود اس کی پارلیمانی پارٹی ہوا کرتی ہے۔ ہر کشمیری سیاستدان، ہر ایک وزیر بننے پر تلا ہوا۔ ادھر کسی نے اکسایا، ادھر وہ انقلاب پر آمادہ۔ انقلاب نہیں تو تفریح۔ سردار عتیق کے خلاف بغاوت کا ڈول فاروق حیدر نے ڈالا۔ آخر کو کسی نے ان سے یہ کہا: اگر بغاوت کے سرغنہ آپ ہیں تو وزیر اعظم کیوں نہیں بن جاتے۔ یہ بات انہیں خوش آئی۔ پارلیمانی پارٹی کو بھی۔ ایک دن برسرِ اقتدار آ گئے۔ ''حیدر زدہ‘‘ ارکان بھی چین سے نہ بیٹھے۔ خفیہ والوں نے ساز باز شروع کر دی کہ فاروق حیدر سنتے کسی کی کم ہی تھے۔ انہی دنوں مجھ سے مفصل ملاقات ہوئی۔ میں اسی دیار میں انہیں لے گیا اور مصیبت ٹل گئی۔ جنرل اشفاق پرویز کیانی سے اسلام آباد کے وی آئی پی لائونج میں ان کی ملاقات ہوئی۔ اب وہ چیف آف آرمی سٹاف ہو چکے تھے۔ فاروق حیدرنے کہا: جناب انصاف ہونا چاہیے۔ جواب میں جنرل نے صرف یہ کہا: جی ہاں، انصاف ہو گا۔

یہی زمانہ تھا، جب ان سے گاڑھی چھننے لگی۔ میری فرمائش پر مظفر آباد سے دیسی مرغیاں لے کر آتے۔ کشمیر ہائوس میں پکائی جاتیں۔ پھر آئس کریم کا دور چلتا اور لطائف اور حکایات کا۔ انہی دنوں ایک بار مجھ سے پوچھا: تین لاکھ روپے میں کیا مکان بن سکتا ہے۔ عرض کیا: بہ آسانی۔ نواحِ شہر میں میری کچھ زمین ہے، کچّی اینٹیں منگوا لیجیے۔

اب ان کا جھگڑا چیف جسٹس سے ہوا اور اس وقت پاکستان میں جب افتخار محمد چوہدری بازی جیت گئے تھے۔ ایک عجیب سا چیف جسٹس، ایجنسیاں اور سیاستدان تو چھوڑیے، ریڑھی والوں کی یونین کے ساتھ بھی جس کی راہ و رسم تھی۔ رام کہانی سنی تو چیف جسٹس کے خلاف لکھنے کا فیصلہ کیا کہ قصوروار وہی تھے۔ خفیہ ایجنسی نے زور بہت لگایا۔ صاف ظاہر تھا کہ کیوں۔ روتے دھوتے وہ میرے مربّی کے پاس پہنچے۔ وہ مگر ایسے انصاف پسند کہ دخل دینے سے انکار کر دیا؛ اگرچہ بہت بعد میں مجھ سے کہا: دل جوئی کے لیے کسی وقت ان کے ہاں جائیں گے کہ اب وہ منصب پر نہیں۔ بڑا ہی سخت معرکہ تھا۔ دانتوں پسینہ آیا مگر فاروق حیدر ڈٹے رہے اور سرخرو ہوئے۔

آخری بغاوت کامیاب رہی۔ وہ اسلام آباد کے قہرمانوں کی سنتے اور نہ اپنے ان لوگوں کی، سرکاری دستر خوان سے ریزہ چینی کے جو عادی تھے۔ خواہ کسی بھی پارٹی سے تعلق ہو، آزاد کشمیر کے اکثر سیاستدان روکھی سوکھی نہیں کھا سکتے اور آرام سے بیٹھ نہیں سکتے۔ میاں محمد بخش کے بقول، اسی لیے تنکوں سے ہلکے ہو گئے ؎

ہوسِ لقمۂ تر کھا گئی لہجے کا جلال

اب کسی حرف کو حرمت نہیں ملنے والی

میاں محمد کا نام آتا ہے تو بھولے بسرے پرانے دوست گلوکار شوکت علی بہت یاد آتے ہیں۔ شوکت علی! کیا وہ محفلیں تمہیں بھی یاد ہیں۔ اسلام آباد سے لاہور کے سفر میں، تمہاری گائی ہوئی سیف الملوک سنتے ہی، کتنی ہی بار آنکھیں چھلک اٹھی ہیں ؎

خس خس جتنا قدر نہ میرا صاحب نوں وڈیائیاں

میں گلیاں دا روڑا کوڑا محل چڑھایا سائیاں

میرپور کے دوست کیا ہمیں بھول گئے؟ میاں صاحب کا مزار، دریائے جہلم کے پانی اور چھتنار درختوں کے سائے یاد آتے ہیں۔ چھائونی کے باہر بوگن ویلیا کی ہزارہا شاخوں پر دہکتے کروڑوں سرخ پھول ؎

گلشن میں آگ لگ رہی تھی رنگِ گل سے میرؔ

بلبل پکاری دیکھ کے صاحب پرے پرے

فاروق حیدر ایوانِ اقتدار سے کیا رخصت ہوئے، دوستوں کو بھول کر بھی یاد نہیں کرتے۔ غلطی ہم سے ہوئی کہ چار عدد دیسی مرغیوں کی شرط عائد کر دی۔ اس اثنا میں ایک بار پھر ان کے سوکھے دھان ہرے ہوئے کہ نون لیگ آزاد کشمیر کے صدر ہو گئے۔ مرغیوں کا بندوبست پھر بھی نہ ہو سکا۔ کچھ دن ہوئے کہ ڈھونڈ نکالا۔ پھر سے وعدہ کیا، پھر سے غائب۔ لو بھائی، مرغیوں کی شرط ہم نے واپس لی۔ لوٹ آئو، ضیافت ہم کریں گے۔

گزرے دنوں کے دوست یاد آتے ہیں اور دل سے اک ہوک سی اٹھتی ہے ؎

پرانی محفلیں یاد آ رہی ہیں

چراغوں کا دھواں دیکھا نہ جائے