کچن آف لائن

ایک زمانہ تھا جب خواتین خانہ واقعی خواتین خانہ ہوا کرتی تھیں۔ یہ تب کی بات ہے کہ جب ٹی وی چینلز کی دُنیا کا آتش جوان نہیں ہوا تھا۔ زمانہ ایسا بدلا ہے کہ اب خواتین کو کھانا پکانے سے زیادہ فکر اِس بات کی ہوتی ہے کہ گِھسی پِٹی ڈش کو بھی کیسے تیار کریں کہ شوہر اپنی انگلیاں چاٹتے رہ جائیں! اِس فکر نے جِدّت طرازی کا ایسا بازار گرم کیا ہے کہ اب کچھ سمجھ میں نہیں آتا کیا کھائیں اور جو کچھ کھائیں اُسے کیسے ہضم کر پائیں۔

ابھی کل تک ملک کی حالت یہ تھی کہ لڑکیاں سیانی ہوتے ہی ماں یا بڑی بہن سے جو کچھ پکانا سیکھا کرتیں اُسی پر اکتفا کرتی تھیں اور شوہروں کو زیادہ آزمائش میں نہیں ڈالتی تھیں! ۔نصیب میں لکھا ہے کہ خواتین کو نئے سِرے سے کھانا پکانا سِکھایا جائے اور کھانے بھی ایسے کہ جن کا سِرا ڈھونڈے سے نہ ملے! اب حالت یہ ہے کہ خواتین ٹی وی پر مختلف ڈِشوں کی تراکیب نوٹ کرکے کچن میں مسالوں سے ڈِھشُم ڈِھشُم کرتی ہیں اور اُن کے تجربات کا نتیجہ گھر کے تمام افراد کو بھگتنا پڑتا ہے۔

ہم نے کئی بار اہلیہ کو ٹوکا کہ ٹی وی پر پیش کی جانے والی تراکیب نوٹ کرکے کچھ نہ پکایا کریں کیونکہ اب ہمارے صبر کا پیمانہ لب ریز ہوچکا ہے۔ اِس میں کوئی شک نہیں کہ دوسرے شوہروں کی طرح ہم بھی گھر کے سُکون کی خاطر ہر وہ چیز خوشی خوشی کھا لیتے ہیں جسے پہلی پہلی بار پکایا گیا ہو۔ ہم نے محسوس کیا ہے کہ ایسے لمحات میں کیا جانے والا صبر ہی شاید ہمیں جنت میں داخلے کا حقدار بنائے گا!

ایک دن ہم نے اپنی گناہ گار آنکھوں سے یہ منظر دیکھا کہ ٹی وی پر کوئی کوکنگ ایکسپرٹ آلو گوشت پکانا سکھا رہی تھی اور اہلیہ بہت انہماک سے ڈِش تیار کرنے کے مختلف مراحل دیکھ رہی تھیں۔ ہم نے حیران ہوکر پوچھا کہ آپ کو آلو گوشت پکانا آتا تو ہے پھر اِس میں نیا کیا ہے جو اِس قدر انہماک سے دیکھا جارہا ہے۔ اہلیہ نے ''جواب عرض ہے‘‘ کے طور پر فرمایا کہ ہے تو آلو گوشت ہی مگر محترمہ نئے طریقے سے سکھا رہی ہیں۔ ہم نے پوچھا نیا طریقہ کون سا ہے۔ جواب ملا کہ گوشت کو ذرا سا کَچّا رکھا جا رہا ہے کہ ذائقے میں نئی بات (!) پیدا ہو۔ ہم نے مزید حیران ہوکر اہلیہ کو یاد دلایا کہ ٹی وی چینل کی کوکنگ ایکسپرٹ نے کون سا کمال کیا ہے۔ یہ کمال تو آپ تقریباً روز ہی دکھاتی ہیں! اہلیہ نے خشمگیں نظروں سے ہمیں گھورتے ہوئے پوچھا۔ ''کون سا کمال ہے جو میں روز دکھاتی ہوں؟‘‘ ہم نے انجان بننے کی عمدہ اداکاری کرتے ہوئے کہا کہ آپ جو کچھ پکاتی ہیں اُس میں ایک آدھ آنچ کی کسر رہ جاتی ہے مگر اب شکایت اِس لیے نہیں کرتے کہ ایک تو ہم عادی ہوچکے ہیں اور دوسرے یہ کہ اب ہمیں اِس میں لُطف آنے لگا ہے۔

یہ سُن کر اہلیہ کا پارہ چڑھ گیا۔ اُنہوں نے کریلوں کی کھال اُتارنے کا عمل موقوف رکھتے ہوئے زبان کی چھری سے ہماری کھال اُتارنے کا آغاز کیا! ہم نے سمجھایا کہ بات ہرگز وہ نہیں جو آپ کی سمجھ میں آئی ہے بلکہ ہم تو صرف یہ بتانا چاہتے ہیں کہ گھر کی آبرو برقرار رکھنے کے لیے اب ہم ہر اُس چیز کو کھلے دِل سے تسلیم اور قبول کرتے ہیں جو آپ کے ہاتھوں سے پک کر ہم تک پہنچے۔ ساتھ ہی یہ بھی عرض کیا کہ آلو گوشت جب پکانا آتا ہی ہے تو پھر خوامخواہ تجربات کرنے کی کیا ضرورت ہے۔ کیا ضروری ہے کہ کسی اچھی خاصی ڈِش کو تجربات کی نذر کرکے لَذّت سے محروم کیا جائے؟

ہم نے یاد دلایا کہ ٹی وی چینلز تو ابھی جمعہ جمعہ آٹھ دن کی سوغات ہیں۔ جب یہ آن لائن آپائیں نہیں تھیں تب بھی تو گھریلو خواتین کھانا پکایا ہی کرتی تھیں اور اُن کا کتابوں میں لکھی ہوئی ترکیبوں پر کم ہی انحصار تھا۔ یہی سبب ہے کہ شوہروں اور بچوں کو کچھ ڈھنگ کی ڈِشیں مل جایا کرتی تھیں!

ہم اللہ کا شکر ادا کرتے ہیں کہ ہمارے جوان ہونے تک ٹی وی چینلز کی بھرمار نہیں ہوئی تھی یعنی جو کچھ ہماری ماں نے ہماری خالہ یا نانی سے سیکھا تھا اُسی پر اکتفا کیا اور جب تک ہاتھوں دَم رہا، اچھا کھلایا۔ ہم یقین سے نہیں کہہ سکتے کہ اگر اُن کے دور میں ٹی وی چینلز آگئے ہوتے تو کیا وہ آن لائن کچن سے عجیب و غریب ڈِشوں کی ترکیبیں سیکھ کر ہم پر تجربے کرتیں۔ ہمارا خیال ہے کہ کوئی بھی ماں اِتنی سَفّاک نہیں ہوسکتی کہ کھانا پکانے کے نام پر اپنی اولاد کا صبر آزمائے! مگر پھر خیال آتا ہے کہ آج کل کی خواتین بھی تو مائیں ہیں۔ خُدا جانے یہ کیسی مائیں ہیں! آن لائن کچن نے گھر کے اچھے خاصے کچن کو آف لائن کردیا ہے۔

ہم اکیسویں صدی میں جی رہے ہیں۔ ماہرین کا کہنا ہے کہ یہ زمانہ learn کرنے یعنی سیکھنے کا ہے۔ اور اِس سے بھی بڑھ کر relearn کا ہے یعنی نئے سِرے سے اور مزید سیکھنے کا ہے۔ مگر اِن دونوں مراحل سے گزرنے سے بہت پہلے آپ کو unlearn کی منزل سے گزرنا ہے۔ جو کچھ بہت پہلے سے بلکہ عشروں سے سیکھا ہوا ہے یعنی جو بُھوسا دِماغوں میں بھرا ہوا ہے اُسے نکال پھینکنا ہے۔ ہمارا خیال ہے ٹی وی چینلز نے خواتین کے دِماغوں سے بُھوسا نکال پھینکنے کا ٹاسک سنبھال لیا ہے۔ جو کچھ بڑی بوڑھیوں نے سِکھایا تھا اُسے ذہن سے کھرچ پھینکنے کے لیے خواتین انتہائی بے تاب دکھائی دیتی ہیں۔ حد یہ ہے کہ بعض اوقات اُمورِ خانہ داری کی کوئی ماہر مِنی اسکرین پر خواتین خانہ کو قالین سے دُھول نکالنے کا ہُنر بھی سِکھا رہی ہوتی ہیں! برتنوں کو صاف رکھنے اور چمکانے کے اِتنے ٹوٹکے ٹی وی چینلز پر پیش کئے جاتے ہیں کہ برتن اگر جان لیں تو حیرت کے مارے جان دے دیں!

کچن آن لائن کی وبا نے زندگی کو آسانی سے محروم کرنے میں اہم کردار ادا کیا ہے۔ ٹی وی پر پیش کی جانے والی ترکیبوں کی روشنی میں تیار کی جانے والی ایسی ایسی چیزیں کھانے کو ملی ہیں کہ ہمارا دِماغ پک گیا ہے۔ قابل ذکر بات یہ ہے کہ اگر کسی ڈِش میں کوئی کسر رہ جائے تو اُسے خصوصیات قرار دے کر تسلیم کرلیا جاتا ہے۔ مثلاً بریانی میں گوشت ذرا سا کَچّا رہ جائے تو یہ کہلائے گی کَچّے گوشت کی بریانی! اگر ٹی وی دیکھ کر گھر میں بنائے جانے والے پلاؤ کے چاول ٹوٹ جائیں تو یہ کہلائے گا ٹوٹے ہوئے چاولوں کا پُلاؤ۔ اگر دال میں مرچ ذرا زیادہ ہوجائے تو ''مِرچوں بھری دال‘‘ قرار دینے میں کیا ہرج ہے! اِسی صورت پراٹھا توے پر زیادہ دیر رہ جائے تو آپ کو پیش کیا جائے گا جَلا ہوا یا اَدھ جَلا پراٹھا!

خواتین خانہ کچن میں جتنے تجربات کرتی ہیں اُتنے ہی تجربات اگر وہ کسی باضابطہ لیبارٹری میں کیا کریں تو سائنس دان کے درجے پر فائز ہوں! آپ سوچیں گے خواتین خانہ لیبارٹری میں کیا ایجاد کریں گی۔ ٹھیک ہے، وہ کچھ بھی ایجاد نہیں کر پائیں گی مگر ہمارے سرکاری اداروں کے سائنس دانوں کا بھی تو یہی حال ہے! اُنہیں تو کوئی کچھ نہیں کہتا۔

تمام شوہروں کی بہبود کے پیش نظر ہم ملک بھر کی خواتین خانہ کو مشورہ دیں گے کہ ٹی وی پر کوکنگ شو کو محض دِل پشوری کے لیے دیکھیں، شوہروں کے معدے پر سینہ زوری کے لیے نہ دیکھیں۔ جو کچھ اچھی طرح پکا سکتی ہیں اُسے کوکنگ ایکسپرٹ کے مشوروں کی روشنی میں پکاکر ہمارے مُنہ کو لگا ہوا برسوں پُرانا ذائقہ برباد نہ کریں! کوکنگ ایکسپرٹس کا کیا ہے، اُنہیں تو انٹ شنٹ پکانے کا اچھا خاصا معاوضہ ملتا ہے۔ اور پھر اپنا پکایا ہوا اُنہیں کون سا کھانا پڑتا ہے! ذرا سا چکھ کر وہ تو ایک طرف ہٹ جاتی ہیں اور قوم کی مائیں، بہنیں، بیٹیاں لکیر پیٹتی رہتی ہیں!