جو شے کی حقیقت کو نہ سمجھے ، وہ نظر کیا؟

تعصبات کے مارے ہوئے ۔ پہلے سوویت یونین اور اب امریکہ کے کاسہ لیس ۔کیاخاک وہ بحث کریں گے ؟ کشکول بردار ، این جی اوز کے فرزند ۔

اے اہلِ نظر ذوقِ نظر خوب ہے لیکن

جو شے کی حقیقت کو نہ سمجھے ، وہ نظر کیا

خیال تھا کہ یہ موضوع سمٹ جائے گا ۔ جنرل اشفاق پرویز کیانی مگر اب بھی موضوعِ بحث ہیں ۔ دلائل دیے جا چکے اور اکثریت نے اتفاق کر لیا کہ کارروائی کے لیے وہ موزوں وقت نہ تھا۔ اس کے باوجود کہ جنرل کے موقف کو مسترد کرنے والوں کے پاس شواہد برائے نام ہیں ، وہ مصر کیوں ہیں؟

تین برس ہوتے ہیں ، ایک سیاسی پارٹی سے تعلق رکھنے والی شعلہ بیان دانش ور نے فتویٰ دیا کہ جنرل امریکی ایجنٹ ہے ۔ ایک ایک کر کے سب دلائل کا جواب دیا جا چکا تو ارشاد فرمایا: وہ مجھے بریفنگ میں کیوں نہیں بلاتے ؟ ہاں، یہ واقعی ایک زبردست ثبوت تھا ۔

جنرل کی بریفنگ کے لیے جب بھی مدعوئین کو دیکھا ، احساس ہوا کہ یہ تقریب ناتمام ہے ۔ بعض موزوں لوگ مدعو نہیں ۔ پھر یہ خیال آیا کہ کتنی ہی احتیاط کی جائے، اعتراض باقی رہے گا۔ ایک بار کچھ زیادہ لوگ بلائے گئے ۔ ایک ڈیڑھ گھنٹہ گزر چکا تو ایک کالم نگار اور ایک ٹی وی میزبان بے چین ہونے لگے ۔

جنرل کی یادداشت غیر معمولی ہے ۔ ایک بار انہوں نے بتایا کہ دو گھنٹے کا لیکچر دینے کے لیے وہ دس منٹ کے اندر ذہن میں نوٹس بنالیتے ہیں ۔ آخری مہینوں میں پیہم میں ان سے کہتا رہا کہ وہ اپنی خودنوشت لکھیں ۔مغربی ممالک کا دورہ کریں اور لیکچر دیں ۔ پاکستان کا مقدمہ انہیں لڑنا چاہیے ۔ ایسا لگتاہے کہ اپنی عزتِ نفس اور ذمہ داریوں کے باب میں آخری درجے کی احتیاط کرنے والا آدمی تھک چکا ہے ۔ وہ ایک تنہا آدمی ہیں ۔ ان کی ساری معرکہ آرائی ان کے باطن میں ہوتی ہے ۔ یہ جنگ اپنے ہی دل میں تمام ہوتی رہی ؎

اے جذبۂ دل تیری جزا ہے ،نہ سزا ہے

احساسِ غمِ دل ہی غمِ دل کا صلہ ہے

ایک بے حد صابر اور مرتّب آدمی ۔ ہوش کی آنکھ کھولی تو زمانہ ایک بھیڑیے کی طرح اس پہ پل پڑا۔ اس نے مگر طرح دے دی اور اپنے فرائض کی انجام دہی میں جت گیا۔ اس میں آدمی کو پناہ مل جاتی ہے اور بھدّی کشمکش سے رہائی ۔ قائد اعظمؒ کی اہلیہ محترمہ رتّی جناح کو ان سے شکایت تھی کہ ہمہ وقت وہ خود کو مصروف رکھتے ہیں ۔ کبھی وہ میز کے مقابل آکر بیٹھ جاتیں اور انہیں متوجہ کرنے کی کوشش کرتیں ۔ اس وقت اگر وہ مقدمات کی فائلیں پڑھ رہے ہوتے تو نظر اٹھاکر بھی نہ دیکھتے ۔ سوانح نگار نے لکھا ہے : وہ ان سے محبت کرتے تھے اور ان کے باب میں ہمیشہ صبر وتحمل سے کام لیتے ۔

اشفاق پرویز کیانی ایک جوان آدمی تھے کہ والد کی موت کا صدمہ سہناپڑا۔ سرما کی ایک سرد اور سیاہ رات میں ان دنوں کا ذکر کرتے ہوئے، ایک بار شدّتِ جذبات سے ان کی آواز کانپ اٹھی۔ اپنے بھائیوں کا ذکر کیا، کاروبار کو جنہوں نے شعار کیاکہ آسودگی کے آرزومند تھے۔ جنرل نے اپنی زندگی کمال سادگی میں بسر کی۔ ان کے گھر ایک سالن پکا کرتا۔اپنے سب سے چھوٹے بھائی کامران کو بالخصوص یاد کیا۔ کہا: اسے میں نے اولاد کی طرح پالا ہے ۔ پھر دہرایا: ہاں اولاد کی طرح ۔بتایا کہ جب وہ فوج کے سربراہ بنے، تو بھائیوں کو مدعو کیا اور یہ کہا "Now I belong to Pakistan army"

کالم نگار اور ٹی وی میزبان اس لیے بے چین ہوئے کہ گپ شپ کی امید میں وہ آئے تھے ۔ یہاں ٹھوس گفتگو تھی ،یہاں وہ آدمی تھا، جو وقت رائیگاں کرنے کا قائل ہی نہیں ۔ ان لوگوں کو زیادہ پسند نہیں کرتا جو تادیر توجہ مرکوز نہ رکھ سکتے ہوں ۔ تب ان سے درخواست کی گئی کہ وہ بریفنگ میں ذرا سا وقفہ کر دیں ۔ بعد میں ان دونوں کو بریفنگ میں شرکت کی آرزو کرتے نہ دیکھا گیا۔

ایک دوست نے سختی اور بے رحمی سے جنرل پر تنقید کی ہے ۔ اسے صدمہ پہنچا ہے کہ سبکدوشی کے ہنگام ان کی ستائش کیوں ہوئی۔ کیا اس شخص کی تعریف نہ کرنی چاہئے ، جو ایک طے شدہ منصوبے کے تحت فوج کو سیاست سے دور لے جاتا گیا۔ اپنے رفقا کو بار بار جس نے بتایا کہ مارشل لا کے نفا ذ سے اتنے مسائل حل نہیں ہوتے ، جتنے کہ پیدا ہو جاتے ہیں ۔ ایک زمانہ تھا کہ ٹیکنو کریٹس کی حکومت کے لیے دلائل کی بھرمار تھی ۔ جنرل مگر مائل نہ ہوا، ذرا بھی نہیں ۔ ایک بار فقط رنج سے اتنا کہا ''اس صبر کا فائدہ کیا؟‘‘یعنی اصولوں کو سختی سے تھام رکھنے کی کوشش ہے ۔ ا س کے باوجود عیب جوئی کا سلسلہ ہے۔ عرض کیا : تنقید کا تعلق آدمی کے کردار سے نہیں ، اس کی اہمیت سے ہوتاہے وگرنہ پیغمبران ِ عظامؑ پر یلغار نہ ہوا کرتی ۔صبر کرنا چاہیے کہ قرآنِ کریم صابروں کے حق میں ایک فریق بن جاتا ہے۔جب یہ جملہ کہا تو اطمینان کا ایک خوشگوار رنگ ان کے چہرے پہ اتر آیا۔

جنرل کیانی فرشتہ نہیں ۔ آدمی کو مگر اس کے مجموعی کردار میں دیکھا جا تاہے ۔ احساسِ فرض سے مغلوب ،مزدور کی طرح مشقّت کرنے والے ، ماتحتوں پر شفیق ، ساتھیوں پہ مہربان ، وہ ایک استاد کی شخصیت رکھتے ہیں ۔ امریکی انہیں پسند نہ کرتے تھے ۔ دو بار نیٹو کی سپلائی انہوں نے روک دی اور دوسری بار سات ماہ کے لیے ۔ کیسے وہ ان سے خوش ہو سکتے کہ اقتصادی اور اسلحی انحصار کے باوجود جنرل نے ان کی مزاحمت کی ۔ مائیکل ملن اسی لیے بگڑے تھے ۔ ہالبروک کے ساتھ ایک بارانہوں نے ملاقات سے انکار کر دیا تھا۔ ہلیری کلنٹن کو کمال حکمتِ سے نمٹایا ۔دیر تک وہ بولتی رہتیں ۔تو وہ بات کا آغاز کرتے۔ جنرل پیٹر سن کا مزاج جارحانہ تھا۔ وہ گویا پل پڑتے مگر ان کا علاج بھی آخر کار جنرل نے دریافت کر لیا۔ ''خطبہ ‘‘دے کر پیٹرسن فارغ ہوتے تو کیانی یہ کہتے "Sir, I don't agree with you"

مذہبی پارٹیاں ہی نہیں ، نون لیگ اور تحریکِ انصاف بھی آپریشن کی مخالف تھیں ۔ عوام کے ایک بڑے حصے کو انہوں نے قائل کرلیا تھا کہ یہ ایک تاریخی غلطی ہوگی ۔ پیپلز پارٹی کی لاتعلق حکومت ذمہ داری اٹھانے سے گریزاں تھی۔ ایسے میں میڈیا سے تعاون کی کس کتنی امید کی جا سکتی ؟ باخبرجانتے تھے کہ شمالی وزیرستان فساد کی جڑ ہے مگر ایک بڑی تصویر دیکھتے ہوئے، جنرل نے آپریشن کو ملتوی رکھا۔ یہی تجزیہ درست ہے ۔ فرض کیجیے ، ان کی رائے غلط تھی تو بھی اس میں بدنیتی کہاں سے آگئی ؟ جنرل اطہر عباس کا غصہ ذاتی ہے اور اسباب معلوم ۔ بعض سے میں نے بات کی، اس زمانے کے فارمیشن کمانڈر بالآخر جنرل کیانی سے متفق تھے ۔ بحث بے وقت ہے اور لاحاصل۔ جنرل کی مخالفت کرنے والوں پہ نظر ڈالو ۔ وہی پاکستانی فوج کے روایتی مخالفین ، خارجی پراپیگنڈے کا اثر قبول کرنے والے ۔

عسکری قیادت سے پہاڑ سی غلطیاں ہوئی ہیں ۔ پاکستانی تاریخ کا سبق یہ ہے کہ یکے بعد دیگرے نافذ رہنے والے مارشل لائوں کی بدولت پر اعتماد اور کارگر سیاسی قیادت نصیب نہ ہو سکی ۔ ہمیشہ کے لیے اب یہ باب بند ہو جانا چاہیے تاکہ جمہوریت جڑ پکڑے اور ثمر بار ہو ۔ دنیا کے کسی ملک میں دفاعی پالیسیوں پر ایسی بے رحمانہ بحث نہیں ہوتی ۔عسکری قیادت پر گاہے تنقید ہو سکتی ہے مگر بھارت اورامریکہ نہیں ، پاکستانی عوام کے نقطۂ نظر سے ۔

تعصبات کے مارے ہوئے ۔ پہلے سوویت یونین اور اب امریکہ کے کاسہ لیس ۔کیاخاک وہ بحث کریں گے ؟ کشکول بردار ، این جی اوز کے فرزند ؎

اے اہلِ نظر ذوقِ نظر خوب ہے لیکن

جو شے کی حقیقت کو نہ سمجھے ، وہ نظر کیا