دعاکی اہمیت

اللہ تبارک و تعالیٰ نے رمضان المبارک میں روزوں کی فرضیت کے حوالے سے سورہ بقرہ کی آیت 183سے 185تک کا نزول فرمایا۔اسی سورت کی آیت نمبر 186میں اللہ تعالیٰ ارشاد فرماتے ہیں''جب میرے بندے آپ سے میرے بارے میں سوال کرتے ہیں پس میں قریب ہوں ،میں جواب دیتا ہوں ہر پکارنے والے کی پکارکا‘ جب وہ مجھے پکارتا ہے‘‘۔

قرآن مجید میں اللہ تبارک و تعالیٰ نے مختلف انبیاء علیہم السلام کی دعاؤں کا ذکر کیا ہے ۔حضرت آدم ؑ شجر ممنوعہ کا دانہ کھانے کے بعداللہ کے حکم سے زمین پر اتارے گئے تو انہوں نے اپنی بیوی سیدہ حواؑ کے ہمراہ دعا مانگی ''اے ہمارے پروردگار ! ہم نے اپنی جانوں پر ظلم کیا۔ اگر آپ نے ہم پر رحم نہ کیا اور ہمیں معاف نہ کیا تو یقینا ہم خسارہ پانے والوں میں شامل ہو جائیں گے ‘‘۔اس دعا پر اللہ تبار ک و تعالیٰ نے آپ ؑ کی توبہ کو فوراً قبول فرما کر آپ پر اپنے فضل عظیم کا نزول فرما دیا تھا ۔اسی طرح اللہ تبارک و تعالیٰ نے حضرت نوح ؑ کے واقعہ کا قرآن مجید کے متعددمقامات پرذکر کیا ہے ۔سورہ قمر میںاللہ تبارک و تعالیٰ ارشاد فرماتے ہیں کہ جب آپ ؑ کی قوم کے لوگو ں نے آپ ؑ کو جھٹلایاتو آپ ؑنے اپنے پروردگار سے دعا مانگی ''میں مغلوب ہوں پس تو میری مدد فرما‘‘۔ اللہ تبارک و تعالیٰ نے آپ ؑ کی دعا قبول فرماتے ہوئے آسمان اور زمین سے پانی جاری فرما دیا۔ آسمان سے اترنے اور زمین سے نکلنے والے پانی کی زد میں آکر کافر تباہ و برباد ہوگئے جبکہ آپ ؑ کی دعوت قبول کرنے والے لوگ کشتی میں بیٹھ کر آپ ؑ کی ہمراہی میں نجات پا گئے ۔

اسی طرح اللہ تعالیٰ نے حضرت موسیٰ ؑ کی متعدد دعاؤں کا ذکر بھی قرآن مجید میں کیا ہے۔اللہ تعالیٰ نے سورہ قصص میں یہ واقعہ بیان فرمایا کہ جب فرعونی قوم کے ایک فرد کے قتل کی وجہ سے فرعون کے ہرکارے آپ ؑ کا تعاقب کرتے ہیں تو جناب موسیٰ ؑ اپنی بستی چھوڑ کر مدین کی طرف روانہ ہو جاتے ہیں ۔مدین کے گھاٹ پر پہنچ کر آپ ؑ نے ایک عجیب منظر دیکھا کہ لوگ پانی نکال رہے ہیںاور دو لڑکیا ں پانی نکالنے سے قاصر ہیں۔ حضرت موسیٰ ؑ نے اس موقع پران لڑکیوں کے لیے پانی نکالا اور سائے میں آکر پروردگارعالم کی بارگاہ سے خیر طلب کی۔ اجنبی شہر میں اللہ تعالیٰ نے جنا ب موسیٰ ؑ کی اس طرح مدد فرمائی کہ آپ ؑ کے لیے رشتے کا بندوبست فرما دیا اورپردیس کو آپ ؑ کے لیے دیس بنا دیا ۔

اللہ تعالیٰ نے سورہ انبیاء میں حضرت یونسؑ کا واقعہ بیان فرما یا کہ جب آپؑ تہ بحر ظلمات مچھلی کے پیٹ میں تھے‘ آپؑ نے اللہ تبارک و تعالیٰ کی بارگاہ میں آکر دعا مانگی ''اے اللہ ! تیرے سوا کوئی معبود نہیں ہے ۔تیری ذات پاک ہے اس تکلیف سے جو مجھ کو پہنچی ہے‘ بے شک میں ہی خطا کار تھا ‘‘۔ اللہ تعالیٰ نے سیدنا یونس ؑ کی دعا قبول فرماتے ہوئے آپ ؑکے غم کو دور فرما دیا اور ساتھ ہی یہ بھی واضح فرمایا کہ اللہ تعالیٰ اسی طرح اہل ایمان کے غموں کو دور فرماتے ہیں۔

اللہ تعالیٰ نے سورہ انبیاء میں حضرت ایوب ؑ کا واقعہ بھی بیان فرمایا ہے ۔حضرت ایوب ؑ کو طویل بیماری کا سامنا کرنا پڑا ۔ اس طویل بیماری کے نتیجے میں آپ ؑ کے اہلخانہ نے بھی آپ ؑ کی خدمت سے ہاتھ کھینچ لیے ۔چنانچہ حضرت ایوب ؑ نے اللہ تبارک و تعالیٰ کی بارگاہ سے رحمت طلب کی۔ اللہ تعالیٰ نے حضرت ایوب ؑ کو اپنے فضل سے تندرستی اور تونگری عطا فرمادی اور نقصان کو اس طرح پوراکیا کہ جو تلف ہوا وہ بھی واپس فرما دیا اور اتنا ہی اوربھی عطا فرما دیا۔حضرت سلیمان ؑ حضرت داؤد ؑ کے وارث اور جانشین تھے‘ سورہ ''ص ‘‘میں اللہ تبارک و تعالیٰ نے آپ ؑ کی دعا کا ذکر کیا کہ آپ ؑ نے پروردگار عالم سے دعا مانگی کہ ''اے میرے رب مجھ کو بخش دے اور مجھ کو ایسی حکومت عطا فرما جو میرے بعد کسی کو حاصل نہ ہو ‘‘۔اللہ تبارک و تعالیٰ نے آپ ؑ کی دعا کو اس انداز میں پورا فرمایا کہ اللہ تعالیٰ نے جانور وں، پرندوں ،جنوں اور حشرات الارض کو آپ ؑ کے تابع فرما دیا اور آپ کے دربار میںان تمام مخلوقات کے نمائندگان کو حاضری کا پابند بنا دیا ۔

حضرت زکریا ؑ سیدہ مریم ؑ کی کفالت کیا کرتے تھے ۔ سورہ آلِ عمران میںاللہ تعالیٰ نے ارشادفرمایاکہ جب آپؑ اس محراب میں داخل ہوئے جس میں سیدہ مریم ؑ اللہ تعالیٰ کی عبادت کیا کرتی تھیں، آپ ؑ نے سیدہ مریم ؑ کے پاس بے موسم کے پھل پائے ۔حضرت زکریا ؑ بے اولاد اور آپ ؑ کی بیوی بانجھ تھیں ۔جوانی میں اولاد کی نعمت حاصل نہ ہوسکی لیکن سیدہ مریم ؑ کے پاس بے موسم کے پھل دیکھ کر آپ ؑ کے ذہن میں خیال آیا کہ جو رب سیدہ مریم ؑکو بے موسم کے پھل دے سکتا ہے وہ رب بڑھاپے میں اولاد کیوں نہیں دے سکتا ۔ آپ ؑ نے اللہ عزوجل سے ایک نیک بیٹے کی دعا مانگی جوکہ نبوت و رسالت کے منصب جلیلہ پر بھی فائز ہو ۔اللہ تبارک و تعالیٰ نے آپؑ کی دعا قبول فرماتے ہو ئے آپؑ کو سیدنا یحییٰ ؑ جیسا عظیم بیٹا عطا فرما دیا ۔یحییٰ ؑ نام کا بیٹا اُس سے قبل بنی اسرائیل میں پیدا ہی نہیں ہوا تھا۔ اللہ تعالیٰ نے سورہ آلِ عمران میں سیدنا یحییٰ ؑ کے اوصاف بیان کرتے ہوئے کہا: وہ سردار تھے ،عورتوں سے بے رغبتی رکھنے والے ، سیدنا عیسیٰ ؑ کی تصدیق فرمانے والے اور صالح نبی تھے ۔

حضرت رسول اللہﷺ بھی اللہ تعالیٰ سے بہت زیادہ دعائیں مانگا کرتے تھے ۔آپ ﷺ نے اپنی اُمت کے لوگوں کو ہر موقع کی دعا مانگنے کی تلقین فرمائی ۔ چنانچہ نبی علیہ السلام بستر پر جاتے ہوئے ،نیند سے بیدار ہوتے ہوئے ،سواری پر بیٹھتے ہوئے ، وضو کرتے ہوئے ،مسجد میں داخل ہوتے ہوئے ،مسجد سے نکلتے ہوئے اور سواری پر بیٹھتے ہوئے مختلف قسم کی دعائیں مانگا کرتے تھے ۔آپ ﷺ کی تمام دعائیں کتب احادیث میں موجود ہیں۔ ان تمام دعاؤں کو مانگنے کے نتیجے میںہمارے تمام معاملات میں اللہ تعالیٰ کی رحمتیں اور برکات شامل ہو سکتی ہیں جبکہ دعاؤں سے غفلت برتنے کی صورت میں ہم زندگی کے بہت سے معاملات میں خیر وبرکات سے محروم رہ جاتے ہیں۔

آج ہمارا معاشرہ بہت سے روحانی ،معاشی ،معاشرتی اور سیاسی مسائل کی زد میں ہے جس کی بہت بڑی وجہ اسلامی تعلیمات سے دوری ہے ۔ہمیں اپنے معاملات کو جہاں حسن تدبیرسے حل کرنے کی کوشش کرنی چاہیے وہیں پراللہ تعالیٰ کی تائید اور نصرت ضرور طلب کرنی چاہیے۔ جب انسان کی نیت نیک ہو اور اللہ تعالیٰ کی نصرت کی طلب ہو تو اللہ تعالیٰ مشکلات کو دور فرما کر منزلوں کو قریب کر دیتے ہیں۔

حضرت یونس ؑ اپنی قو م سے ناراض ہو کر چلے گئے تھے۔ حضرت یونس ؑکی قوم اپنی غلطی پر نادم ہوئی اور انہوں نے اجتماعی طور پر اللہ تبارک و تعالیٰ سے اپنے گناہوں کی معافی مانگی جس پر اللہ تعالیٰ نے اپنے بھیجے ہوئے عذاب کو ٹال دیا۔ اس کے بالمقابل حضرت نوحؑ، حضرت ہودؑ، حضرت صالحؑ، حضرت لوطؑ اور حضرت شعیب علیہم السلام کی اقوام اپنی غلطیوں پر بضد رہیں تو اللہ تعالیٰ نے ان کا وجود صفحۂ ہستی سے مٹاکر ان کو قصۂ پارینہ بنا دیا تھا ۔

دعا مومن کا ہتھیار اور اللہ تعالیٰ کی نصرت کے حصول کا عظیم ذریعہ ہے اور ہمیں اصلاح احوا ل کے لیے مادی تدابیر اختیار کرنے کے ساتھ ساتھ اس ہتھیار کو بھی فراوانی سے استعمال کرنا چاہیے اور اس کار خیر کا آغاز رمضان المبارک کے ماہ مبارک سے ہی کر لینا چاہیے۔ اس لیے کہ اللہ تعالیٰ نے جہاں اس مہینے میں روزوں کی فرضیت کاحکم دیا وہیں پر اس سے متصل آیت میں دعا مانگنے کا بھی حکم دیا ۔اللہ تبارک و تعالیٰ ہمیں اپنی بارگاہ میں کثرت سے دعائیں مانگنے والے لوگوں میں شامل فرمائے۔ آمین!