اقتدار جاوید کی تازہ نظمیں

ذات باہر

میں نے اپنی شخصیت خود سے جدا کی

اور الف ننگا ہوا

جو آہنی پردہ تھا میرے اور میری شخصیت کے درمیاں

آخر ہٹا‘ جس اجنبیت نے مجھے

خود سے بھی اوجھل کر رکھا تھا‘ وہ اُڑی

میں خود پہ سارا آشکارا ہو گیا

خود سے سوالوں کا میں جویا، گنگ تھا

مجھ سے جدا اک بے حیا تن کر کھڑا تھا

میں سوالوں کے پرانے مستقل آزار سے آزاد

لب بستہ کھڑا تھا

خود سے کیا میں پوچھتا‘ اک شرم تھی

میں جس میں لحظہ لحظہ ڈوبتا جاتا تھا

جیسے سوچتا تھا کیسے اپنی شخصیت کو کھینچ کر لائوں

کہیں سے اور اس میں اپنا ننگا پن چھپا دوں

کیسی بخت آور گھڑی تھی

دست بستہ جس کے آگے میں کھڑا تھا‘ کہہ رہا تھا

منکشف ہونا خود اپنے آپ پر

اک ننگے پن پر منحصر ہے؟ شخصیت محتاج ہے

اک ننگے پن کی‘ ڈوب مرنے کی گھڑی ہے

دست بستہ جس کے آگے میں کھڑا ہوں

کیسی بخت آور گھڑی ہے!

آدمی رقص کر سکتا ہے

تیری مخروطی ہیروں سے جھلمل بھری انگلیوں نے

ذرا تار چھیڑے تو دکھ کیسے رِس رِس کے

تاروں سے بہنے لگا‘ اک ترے ساتھ رہنے سے

مجھ پر کھُلا کس طرح صبح ابھرنے سے پہلے

کہیں خود کو دھوتی ہے‘ دُھل کے تری سمت

کیسے لپکتی ہے! جب فصل پکتی ہے

بوڑھے کسانوں کے مجمع پہ کس رنگ کے پھول گرتے ہیں

کیسے بھلا آدمی اپنی تفہیم کرتا ہے

کیا چیز ایسی چمکتی ہے‘ وہ اپنی تعظیم کرتا ہے

جو کچھ فلک کے علاقوں میں پوشیدہ ہوتا ہے

ان پر وہ ایمان لاتا ہے‘ اک سینہ افگار

حلّاف ہنس ہنس کے حالت بتاتا ہے

آپے سے باہر نکل جاتا ہے، باغ میں

باغ کی پاک راہداریوں میں بھٹکتا ہے

پھولوں کی جانب نکلتا ہے، پتّوں کی گہری لکیروں کو

تکتا ہے، جھیلوں پہ جاتا ہے، گہری دوپہروں میں

جب پانی جلتا ہے‘ تب آدمی اپنے ہاتھوں سے

جھیلوں کو ڈھکتا ہے، اس کی نظر

پانی میں عکس پر پڑتی ہے، اور وہ جان لیتا ہے

پانی کے سیّال آئینے میں آدمی رقص کر سکتا ہے!!

صبح

صبحِ ماہ رُو، دھیرے دھیرے اک دلہن کی طرح

سج کے آ گئی اور اپنے ساتھ کتنے رنگ روپ لے کے آ گئی

فضا کو بھی دلہن بنا گئی، کہاں پہ تھی یہ سُرخ رو

ماہتاب کی عزیز رشتے دار ہے جو اتنی گلزار ہے

کہاں پہ اس کا رنگ سے لدا پھندا دیار ہے

یہ لاڈلی نشوں بھری ہوا کے ساتھ آئی ہے

نشوں بھری کی تھپکیوں سے پھول بے سکون ہیں مری طرح

عجیب ان کے بھی بطون ہیں

دلہن نقاب اتارنے لگی تو سڑے دھوئیں کی طرح

اپنا آپ کھولتی ہوا، زبانِ یار بولتی ہوا

معاً، ہلا، ہزار شاخچوں نے جھرجھری سی لی

تو پیڑ میں طیور جاگنے لگے

طیور مذہبی الاپ پیڑ کی کنشت میں

الاپنے لگے

ہوا جو پیڑ کے قریب آئی تو ہزار

شاخچوں سے برگِ سبز سے نفیس اوس

اک ادائے خاص سے ٹپک پڑی

ہوا نے پھول کو چھوا تو پھول

ایک سے ہزار ہو گیا، کنوئیں میں ڈول

اک جھپاک سے گرا، کنوئیں کی تہہ پھٹی

تو میں نثار ہو گیا!!

آج کا مطلع

بس ایک بار کسی نے گلے لگایا تھا

پھر اس کے بعد نہ میں تھا نہ میرا سایہ تھا