کاک ٹیل

نمونے کی وضاحت

ہرگاہ پارٹی قیادت نے مجھ سے جو وضاحت طلب کی ہے کہ میں نے این آر او اور جناب آصف علی زرداری کے دورۂ امریکہ کے مقاصد کے بارے میں بیان کیوں دیا ہے تو میں نے اصل بات تو بتائی ہی نہیں کہ صاحبِ موصوف کو وہاں انہوں نے ہی بھیجا ہے جو اپنی مستقل مزاجی کی وجہ سے جنرل مشرف کے بارے میں اپنے موقف پر قائم رہنا چاہتے ہیں اور اس وجہ سے انہیں مارشل لاء کا خطرہ بھی درپیش ہے کیونکہ اسٹیبلشمنٹ کے ساتھ انہوں نے دوسری بار بھی وعدہ کر لیا ہے کہ جنرل مذکور کو بیرون ملک بھجوانے کے لیے کوئی راستہ تلاش کر لیا جائے گا لیکن انہیں ایک بار پھر مکرنا پڑ رہا ہے جس پر زرداری صاحب کو امریکہ بھجوانا ضروری ہو گیا تھا؛ چنانچہ وہ صاحب موصوف کے مشن پر ہی امریکہ گئے ہیں اور اسی لیے انہیں وہاں پروٹوکول بھی دیا گیا اور سفیر پاکستان نے ان کا استقبال بھی کیا جبکہ پہلے کسی سابق صدر کو اس طرح کا پروٹوکول کبھی نہیں دیا گیا۔ لہٰذا وضاحت عرض ہے۔

خاکسار...ش۔ ر، عفی عنہ

قوم کو بے گھر متاثرین کی امداد کے لیے

متحرک نہیں کر سکے... عبدالقادر بلوچ

وزیر سیفرون لیفٹیننٹ جنرل (ر) عبدالقادر بلوچ نے کہا ہے کہ ''ہم قوم کو بے گھر متاثرین کی امداد کے لیے متحرک نہیں کر سکے‘‘ لیکن پریشانی کی کوئی بات نہیں کیونکہ خود وزیراعظم ہی اس قدر متحرک ہیں کہ ہر تیسرے دن کسی غیر ملکی دورے پر رواں ہوئے ہوتے ہیں‘ اس لیے پوری قوم کے کسی فرد کو بھی متحرک ہونے کی ضرورت نہیں ہے جبکہ سرمایہ دار طبقہ جو وزیراعظم کے پیٹی بھائی واقع ہوئے ہیں اور خود کو بھی حکمران ہی سمجھتے ہیں‘ صاحب موصوف کی ہی طرح قومی مفاد میں اپنی جمع پونجی میں اضافہ کرنے میں مصروف ہیں کہ برا وقت کسی وقت بھی آ سکتا ہے۔ انہوں نے کہا کہ ''آئی ڈی پیز کی ناراضی مسئلہ ہوگا‘‘ تاہم لوڈشیڈنگ وغیرہ کی وجہ سے جو پوری قوم ناراض ہے تو اس نے حکومت کا کیا بگاڑ لیا ہے‘ اس لیے ان مساکین سے خوفزدہ ہونے کی کوئی خاص ضرورت نہیں ہے۔ انہوں نے کہا کہ ''امید ہے کہ نئی افغان حکومت مولوی فضل اللہ کو ہمارے حوالے کردے گی‘‘ اگرچہ باہمی حالات تو اس طرح کے ہیں کہ ہمیں لینے کے دینے بھی پڑ سکتے ہیں۔ آپ اگلے روز اسلام آباد میں ایک پریس بریفنگ سے خطاب کر رہے تھے۔

وزیراعظم مشکل وقت میں باہر

چلے گئے ہیں... عمران خان

پاکستان تحریک انصاف کے چیئرمین عمران خان نے کہا ہے کہ ''وزیراعظم مشکل وقت میں باہر چلے گئے ہیں‘‘ بالکل اسی طرح جیسے میں باہر چلا جایا کرتا ہوں اور جس سے ثابت ہوتا ہے کہ موصوف میری ہی پالیسیوں کی نقل اتارا کرتے ہیں حالانکہ انہیں کوئی اپنی پالیسی بھی وضع کرنی چاہیے۔ انہوں نے کہا کہ ''یوم آزادی کو ملک بادشاہت سے آزاد کرائیں گے‘‘ جبکہ اس کا طریقِ کار ابھی طے کرنا ہے کیونکہ صرف اسلام آباد پہنچنے اور واپس آجانے سے بادشاہت ختم نہیں ہو سکتی البتہ اگر اس دوران قادری صاحب کا انقلاب آ گیا تو میرا کام بھی آسان ہو جائے گا‘ اگرچہ وہ خود بھی نہیں جانتے کہ انقلاب کہاں سے اور کس راستے سے آئے گا۔ انہوں نے کہا کہ ''ہو سکتا ہے کہ اگلی باری جلد آ جائے‘‘ اور دونوں شرفاء اسی کے لیے ساری بھاگ دوڑ کر رہے ہیں‘ البتہ اگر انقلاب پہلے آ گیا تو باری بھی قادری صاحب ہی کے حصے میں آئے گی اور ان سے جان خلاصی کے لیے مجھے ایک اور مارچ کرنا پڑے گا۔ آپ اگلے روز پشاور میں سستا آٹا سکیم کا افتتاح کر رہے تھے۔

بدمعاشوں کو انقلاب میں رکاوٹ

نہیں بننے دیں گے... طاہر القادری

پاکستان عوامی تحریک کے قائد ڈاکٹر طاہر القادری نے کہا ہے کہ ''بدمعاشوں کو انقلاب میں رکاوٹ نہیں بننے دیں گے‘‘ البتہ اگر انقلاب نے اپنی مصروفیات کی وجہ سے خود ہی آنے سے معذرت کر لی تو اور بات ہے کیونکہ انقلاب بھی میری طرح فارغ نہیں ہے کہ جب جی چاہے آنا جانا شروع کردے‘ جس صورت میں بدمعاش اپنا سا منہ لے کر رہ جائیں گے۔ انہوں نے کہا کہ ''انقلاب کے بعد ہٹلر اور مسولینی کو بھاگنے نہیں دیا جائے گا‘‘ اس لیے ان کے لیے بہتر ہے کہ اگر وہ بھاگنا چاہیں تو انقلاب آنے سے پہلے پہلے ہی بھاگ جائیں۔ انہوں نے کہا کہ ''وقت کے فرعونوں اور یزیدوں کے خاتمہ کا وقت قریب آ گیا ہے‘‘ تاہم یہ بھی وقت کی مرضی پر منحصر ہے اور وہ حسبِ معمول یزیدوں اور فرعونوں کے ساتھ سازباز بھی کر سکتا ہے جو کہ بہت بُری بات ہوگی۔ انہوں نے کہا کہ ''انقلاب کے بعد ملک میں حقیقی جمہوریت لائیں گے‘‘ جو میں کینیڈا سے ساتھ ہی لے کر آیا ہوں‘ بس انقلاب آنے کی دیر ہے‘ اسے بھی نافذ کردیا جائے گا۔ انہوں نے کہا کہ ''انتخابی عمل کا نام جمہوریت نہیں ہے‘‘ بلکہ یہ انتخابی عمل سے بہت بلند و بالا چیز ہے جسے دیکھ کر لوگ حیران رہ جائیں گے۔ آپ اگلے روز لاہور میں جھنگ اور چنیوٹ سے آئے ہوئے پارٹی عہدیداران کے مشاورتی اجلاس سے خطاب کر رہے تھے۔

گمراہ کُن

ہرگاہ بذریعہ اشتہار ہٰذا دلی اظہارِ افسوس سے اعلان کیا جاتا ہے کہ محترمہ شہلا رضا کے بیان سے جو کہ انتہائی گمراہ کن تھا‘ پارٹی مکمل طور پر گمراہ ہو گئی ہے جسے راہِ راست پر لانے کے لیے مختلف تجاویز پر سوچ بچار کیا جا رہا ہے اور جس میں وزیراعظم صاحب سے بھی مدد کی درخواست کی جائے گی کیونکہ وہ سوچ بچار کے ماہر کی حیثیت سے ایک امتیازی حیثیت رکھتے ہیں۔ نیز سابق وزرائے اعظم سمیت جناب امین فہیم اور میاں منظور خاں وٹو سے بھی اس سلسلے میں تعاون کی درخواست کی جائے گی جو سابقہ دور میں اپنی راست روی کے جھنڈے ایک دوسرے سے بڑھ کر گاڑ چکے ہیں۔ سب سے تشویشناک امر یہ ہے کہ اس بیان سے خود زرداری صاحب بھی خاصے متاثر ہوئے ہیں اور گمراہ ہو کر بہکی بہکی باتیں کرنے لگے ہیں اور جن کے نارمل ہونے میں خاصا وقت لگ سکتا ہے۔

المشتہر:سیاسی جماعت

آج کا مطلع

بس ایک بار کسی نے گلے لگایا تھا

پھر اُس کے بعد نہ میں تھا، نہ میرا سایا تھا