افلاس سے بے مہر ٹکرائو!

یوں محسوس ہو رہا ہے کہ ملکی سیاست کا انتشار ایک بار پھر کسی بڑے خلفشار کی طرف بڑھ رہا ہے۔ لاہور سے روانہ ہونے والے دو یا شاید ''ڈھائی‘‘ لانگ مارچوں نے مسلم لیگ نواز حکومت کو چکرا کے رکھ دیا ہے۔ ایک لانگ مارچ کی قیادت کرکٹ سے سیاست کی طرف آنے والے دائیں بازو کے پاپولسٹ رہنما عمران خان کر رہے ہیں۔ دوسرا مارچ شعلہ بار خطیب ڈاکٹر طاہرالقادری کا ہے۔ بچی کھچی ق لیگ کا ''لٹا پٹا‘‘ قافلہ ان دونوں مارچوں کے بیچ میں کہیں جگہ تلاش کرتا پھر رہا ہے۔ شدید متذبذب شریف برادران برسراقتدار رہنے پر بضد ہیں۔ 2013ء کے انتخابات میں نواز لیگ کو ملنے والا ''بھاری‘‘ مینڈیٹ ہوا ہو گیا ہے اور اقتدار کسی تنکے کی طرح سیاست کے سیلاب میں بہتا چلا جا رہا ہے۔

مشہور زمانہ ''جمہوریت کا تسلسل‘‘ بے معنی ہو کر رہ گیا ہے۔ موجودہ حکومت کی ساکھ پہلے چند مہینوں میں ہی گراوٹ کی انتہائوں کو چھونے لگی تھی۔ اپنے منشور، روایات اور میراث کو کوڑے دان میں پھینک کر پانچ سال تک عوام پر بد ترین معاشی حملے کرنے والی پیپلز پارٹی کا سیاسی کردار اپوزیشن میں اور بھی زیادہ مکروہ ہو گیا ہے۔ بعض اوقات یوں محسوس ہوتا ہے کہ حکومت کی فکر نواز شریف سے زیادہ پیپلز پارٹی پر قابض ٹولے کو ہے۔ شاید اس جماعت کی قیادت کا ''جمہوری انتقام‘‘ ابھی ختم نہیں ہوا۔

عمران خان کی جانب سے مخصوص حلقوں میں ووٹوں کی دوبارہ گنتی کے مطالبے پر مسلسل پسپائی اختیار کرنے والی نواز لیگ نے ''یوم آزادی‘‘ کی تقریبات کو فوج سے ''قربت‘‘ کا تاثر دینے کے لئے خوب استعمال کیا ہے۔ ٹیلی وژن کیمروں کے سامنے میاں صاحب کی جانب سے جنرل راحیل شریف کے قریب نظر آنے کوششیں عجیب تھیں۔ ان مناظر میں وزیر اعظم کے گرتے ہوئے اعتماد اور بڑھتے ہوئے خوف کی جھلک نمایاں تھی۔ ڈیڑھ سال پہلے انتخابات میں لینڈ سلائیڈ وکٹری حاصل کرنے کے بعد حلف اٹھاتے وقت بھی میاں صاحب کی باڈی لینگویج نحیف اور پژمردہ تھی۔ معیشت دیوالیہ، ریاست داخلی تضادات سے لبریز، سیاست غیر مستحکم اور سماج برباد ہو تو بڑی اکثریت بری طرح گلے پڑ جایا کرتی ہے جس کا ادراک نواز لیگ کی قیادت کو ہو گیا تھا۔

نہ صرف پاکستان بلکہ تیسری دنیا کے بیشتر سابق نوآبادیاتی ممالک میں حکمران طبقہ سیاسی قیادت کے بحران سے دوچار ہے۔ جنگ عظیم دوم کے بعد تین دہائیوں تک جاری رہنے والے عالمی سرمایہ داری کے طویل عروج کے دوران، تیسری دنیا کی معیشتیں کم از کم اتنی مستحکم ضرور تھیں کہ حکمران طبقہ سیاست کا بالائی ڈھانچہ اپنی ضرورت کے مطابق توڑ مروڑ کر نظام ریاست کو چلا سکتا تھا۔ اس دور میں ہمیں فوجی آمریتیں، پاپولسٹ اصلاح پسندانہ حکومتیں اور نیم جمہوری اقتدار کی کئی شکلیں ملتی ہیں‘ لیکن 1970ء کی دہائی کے وسط تک کینشین ازم اور ریاستی سرمایہ داری کی متروکیت سے جنم لینے والے معاشی بحران کے بعد ترقی یافتہ سرمایہ دارانہ ممالک میں بھی صحت مند بنیادوں پر معاشی نمو ممکن نہ رہی۔ سرمایہ داری کو چلانے کے لئے ایک بار پھر ''لبرل ازم‘‘ (نیو لبرل ازم) کا ماڈل اپنایا گیا‘ جس سے مغرب میں معیار زندگی جمود کا شکار ہو گیا اور تیسری دنیا میں سماجی حالات بدتری کی طرف گامزن ہوئے۔

1980ء کے بعد محنت کش عوام کی بغاوتوں کو خونخوار آمریتوں کے ذریعے دبانا ممکن نہ رہا کیونکہ ریاستی جبر تحریکوں کو کچلنے کے بجائے زیادہ شدت سے بھڑکانے کا موجب بن رہا تھا۔ ان حالات میں سامراج اور اس کی کاسہ لیس مقامی اشرافیہ نے اپنی لوٹ مار اور ڈاکہ زنی کو جاری رکھنے کے لئے روایتی اور پاپولسٹ ''جمہوری‘‘ پارٹیوں اور حکومتوں کو استعمال کرنے کی پالیسی وضع کی، لیکن پاکستان میں یہ واردات بھی زیادہ قابل عمل نہ تھی۔ 1990ء کی دہائی میں ایک کے بعد دوسری ''منتخب‘‘ حکومت، ریاست اور حکمران طبقے کے مختلف دھڑوں کے باہمی تصادم کی بھینٹ چڑھ کر مدت پوری کئے بغیر معزول ہوتی رہی۔ پھر قرضوں پر قائم عالمی سرمایہ داری کے مصنوعی عروج کے دوران مشرف کی نیم آمریت نیم جمہوریت مسلط کی گئی۔ اس دور کی نسبتاً بلند معاشی شرح نمو کے ثمرات انتہائی غیر ہموار تھے جس سے سماجی تضادات کم ہونے کی بجائے زیادہ شدید ہو گئے۔

موجودہ صدی کی پہلی دہائی میں سامراج کے گھاگ پالیسی سازوں نے ''مصالحت‘‘ کا فارمولا ایجاد کیا‘ جس کا مقصد مخلوط حکومتوں کی تشکیل تھا۔ پیپلز پارٹی کا گزشتہ اقتدار اسی فارمولے کی پیداوار تھا‘ جس میں تمام بڑی سیاسی جماعتیں بیک وقت حکومت اور اپوزیشن میں موجود تھیں۔ نتیجہ معیشت میں بد ترین کرپشن کی شکل میں برآمد ہوا۔ بعض اوقات تو سامراجی آقا بھی بدعنوانی کی اس شدت پر دانت پیستے دکھائی دیے۔ استحصالی نظام کو چلانے کا یہ سیاسی طریقہ بھی ناکام ثابت ہوا جس کے بعد حکمران طبقے کے حاوی دھڑے ایک مضبوط اور مستحکم حکومت کے قیام پر مصر دکھائی دیے تاکہ مرتی ہوئی سرمایہ داری میں جان ڈالنے کے لئے جارحانہ اقدامات کئے جا سکیں‘ لیکن عالمی سطح پر بالعموم اور پاکستان جیسے ممالک میں بالخصوص، سرمایہ دارانہ نظام اس حد تک گل سڑ چکا ہے کہ کسی بھی سیاسی اور معاشی طریقے سے اس کی بحالی اور صحت یابی ناممکن ہے۔

لانگ مارچ کرنے والے مسیحا نہیں ہیں۔ عمران خان دائیں بازو کے ایک سیاستدان ہیں‘ جن کا 'نظریہ‘ مذہبی اور قومی شاونزم پر مشتمل ہے۔ ان کی باتیں اور دعوے کسی بھی انسان کے لئے ناقابل فہم ہیں۔ تحریک انصاف قدامت پرستی، لبرل ازم اور کنفیوژن کا ایک عجیب ملغوبہ ہے جس کی قیادت میں بیٹھے جاگیردار اور سرمایہ دار آزاد منڈی کی معیشت، بیرونی سرمایہ کاری اور نیولبرل سرمایہ داری کے علمبردار ہیں۔ وزیر اعظم بننے کے لئے خان صاحب کی بے صبری بے قابو ہو چکی ہے۔ ان کی تقاریر میں عام آدمی کے مسائل کا کوئی تذکرہ نہیں۔ وہ ایک ایسے معاشی نظام میں سے کرپشن کے خاتمے کے وعدے کر رہے ہیں جو چلتا اور پلتا ہی کرپشن پر ہے۔

دوسری طرف ایک ایسے صاحب ہیں جنہوں نے سیاست، تصوف، پیری مریدی اور اصلاح پسندی کا ایک ایسا ملغوبہ تیار کر رکھا ہے‘ جو شاید تحریک انصاف سے بھی زیادہ عجیب ہے۔ ڈاکٹر طاہرالقادری کے نسخے کا ہر جزو دوسرے کی نفی کرتا ہے۔ لگتا ہے کہ وہ خود اور ان کے مرید ایک دائرے میں گھوم رہے ہیں۔ عمران خان کے برعکس ڈاکٹر طاہرالقادری اگرچہ غربت، بیروزگاری اور محرومی وغیرہ کی بات کرتے ہیں لیکن یہ باتیں عوام کو نجات کا راستہ دکھانے والے کسی ٹھوس معاشی و سیاسی پروگرام اور لائحہ عمل سے عاری ہیں۔ دائیں بازو کے یہ دونوں ''انقلابی‘‘ طبقاتی تضاد اور جدوجہد سے دور بھاگتے ہیں۔

''انقلاب مارچ‘‘ اور ''آزادی مارچ‘‘ کا اسلام آباد پہنچنے کے بعد ادغام متوقع ہے۔ اس آمیزے میں سے کیا برآمد ہو گا اور یہ جذبات کب تک قائم رہ سکیں گے، یہ وقت ہی بتائے گا۔ عمران خان اور طاہرالقادری‘ دونوں کی سیاسی اور سماجی بنیادیں درمیانے اور نچلے درمیانے طبقے پر مشتمل ہیں لیکن معیشت کا بحران درمیانے طبقے کی اپنی معاشی بنیادوں کو ختم کرتا چلا جا رہا ہے۔

پیپلز پارٹی کی قیادت نواز حکومت کی خدمت اور حمایت میں جماعت اسلامی کے پاس منصورہ تک جا پہنچی ہے۔ یہ لوگ اس بنیادی اور آخری تضاد کو ہی ختم کر رہے ہیں‘ جو ان کے سیاسی وجود کی ضمانت ہے۔ زرداری صاحب ''مصالحت کی سیاست‘‘ کی تھیوری کے سب سے بڑے علمبردار بنے بیٹھے ہیں۔ پارٹی کو اپنے خون سے سینچنے والے عوام کو جابرانہ نظام کے رحم و کرم پر چھوڑ دیا گیا ہے۔ روایتی قیادت نے سرمایہ داری کی ذلت کو ہی حتمی اور آخری منزل قرار دے دیا ہے لیکن محنت کش طبقہ اس محرومی اور استحصال کو کبھی اپنا مقدر تسلیم نہیں کرے گا۔ طبقاتی تضاد نہ صرف موجود ہے بلکہ سلگ رہا ہے۔ حکمران طبقے اور اس نظام کے ساتھ ساتھ ''مصالحت‘‘ کے نام پر عوام کے زخموں کا سودا کرنے والوں اور ''انقلاب‘‘ کے نام پر ان زخموں پر نمک چھڑکنے والوں کے خلاف بھی نفرت بھڑک رہی ہے۔ یہ لاوا پھٹے گا۔ ایک انقلابی تحریک میں محنت کشوں کو اسلام آباد تک لانگ مارچ کرنے کی ضرورت نہیں پڑے گی۔ وہ اپنی فیکٹریوں، اداروں اور کھیتوں میں ہی اس نظام کا پہیہ جام کر دیں گے۔ 1968-69ء میں یہی ہوا تھا۔ اکیسویں صدی کی نئی نسل اس انقلاب کی روایات کو بلند پیمانے پر زندہ کرے گی!