دہشتگردی کے مقدمات میں ملوث ملزمان کو 12 بار موت کی سزا سنادی گئی
کرائم
راولپنڈی:(دنیا نیوز) انسداد دہشتگردی کی خصوصی عدالت نے 5 مقدمات میں ملوث ملزمان کو موت اور عمر قید کی سزا سنادی ہے۔
راولپنڈی کی انسداد دہشتگردی کی خصوصی عدالت نے دہشتگردی کے کیس کے فیصلہ میں 3 ملزمان کو 12 بار سزائے موت اور 32 مرتبہ عمر قید کی سزا سنائی جبکہ دیگر جرائم میں ملزمان کو مجموعی طور پر 384 سال قید بھی سنائی گئی اور تمام ملزمان کو مجموعی طور پر 3 کروڑ 40 لاکھ 50 ہزار روپے جرمانہ اور1 کروڑ 88 لاکھ روپے معاوضہ مقتولین کے ورثا کو ادا کرنیکا حکم دیا۔
خیال رہے کہ ملزمان اڈیالہ روڈ، چیک پوسٹ ، پیرودھائی چنگ چی رکشہ میں دھماکہ میں ملوث تھے ، ملزمان صدر حیدر روڈ اور کباڑی بازار دھماکوں میں بھی ملوث تھے ۔
ملزمان شبیر احمد، بلال احمد اور داؤد کے خلاف مقدمات تھانہ سی ٹی ڈی نے درج کئے ، تینوں ملزمان کو سزا کے بعد اڈیالہ جیل منتقل کر دیا گیا جبکہ مقدمہ کا فیصلہ انسداد دہشت گردی عدالت کے جج شوکت کمال ڈار نے سنایا۔
