لاہور: کمسن بچوں کو اغواء کر کے فروخت کرنے والا گروہ پکڑا گیا
لاہور: (دنیا نیوز) لاہور میں کمسن بچوں کو اغواء کر کے فروخت کرنے والا گروہ پکڑا گیا۔
پولیس حکام کے مطابق لاہور کے علاقے چوہنگ سے کمسن بچوں کو اغواء کر کے بیچنے والے گروہ کو گرفتار کر لیا گیا، خواتین اغواء کاروں سمیت 12 ملزمان کو حراست میں لیا گیا ہے۔
حکام کا کہنا ہے کہ ملزمان میں شہناز، ثناء، مشاعل، محمد رمضان، محمد شہباز، مطیع الرحمان، محمد یعقوب، انعام عباس، فاطمہ، کنزہ، زینب اور معراج بی بی شامل ہیں جبکہ ایک ملزم انعام یعقوب موقع سے فرار ہوگیا ہے۔
خواتین ملزمان نے ابتدائی تفتیش میں بچوں کی خریدو فروخت کا اعتراف کیا، پولیس نے ملزمان کے خلاف مقدمہ درج کر لیا۔
پولیس کے مطابق ملزمان سے دو بچے بازیاب کرا کے چائلڈ پروٹیکشن بیورو کے حوالے کر دیئے گئے، ملزمان اب تک 23 لاکھ روپے کے عوض کئی بچے فروخت کر چکے ہیں۔
