العزیزیہ اور ایون فیلڈ ریفرنسز میں سزاؤں کیخلاف اپیلوں کی سماعت آج ہو گی

اسلام آباد: (دنیا نیوز) العزیزیہ اور ایون فیلڈ ریفرنسز میں سزاؤں کیخلاف سابق وزیر اعظم میاں نواز شریف کی اپیلوں کی سماعت آج ہو گی۔

چیف جسٹس عامر فاروق اور جسٹس میاں گل حسن اورنگ زیب پر مشتمل دو رکنی بینچ اپیلوں کی سماعت کرے گا، مسلم لیگ (ن) کے قائد اسلام آباد ہائیکورٹ میں آج پیش ہوں گے، نواز شریف مری میں اپنی رہائش گاہ پر موجود ہیں۔

نواز شریف کی ایون فیلڈ اور العزیزیہ ریفرنسز میں سزا کیخلاف اپیلوں پر پیشی کے حوالے سے اسلام آباد ہائیکورٹ کے رجسٹرار آفس نے قواعد و ضوابط سے متعلق سرکلر جاری کر دیا جس میں کہا گیا ہے کہ آئی جی اسلام آباد مناسب سکیورٹی انتظامات کو یقینی بنائیں۔

سرکلر کے مطابق کمرہ عدالت نمبر ایک میں داخلہ رجسٹرار آفس کی جانب سے جاری سکیورٹی پاسز سے مشروط ہوگا، درخواستگزار کی قانونی ٹیم کے 15 وکلاء اور اٹارنی جنرل، ایڈووکیٹ جنرل کے 5، 5 سرکاری وکلاء کو کمرہ عدالت میں داخلے کی اجازت ہوگی۔

اسلام آباد ہائی کورٹ جرنلسٹ ایسوسی ایشن کے 30 صحافی کمرہ عدالت میں داخل ہو سکیں گے، اسلام آباد ہائی کورٹ کے ملازمین انٹری پاسز سے مستثنیٰ ہوں گے، عدالت نے نواز شریف کی بیرون ملک سے پاکستان واپسی پر اپیلیں بحال کی تھیں، سابق وزیر اعظم نے احتساب عدالت کے فیصلوں کو 2018ء سے چیلنج کر رکھا ہے۔
 

Advertisement
روزنامہ دنیا ایپ انسٹال کریں