مٹھی بھر دہشتگرد وں کو ملک کا امن تباہ نہیں کرنے دیں گے: پرویز خٹک
پاکستان
نوشہرہ:(دنیا نیوز) وزیر دفاع پرویز خٹک نے کہا ہے کہ مٹھی بھر دہشتگرد وں کو ملک کا امن تباہ نہیں کرنے دیں گے، سکیورٹی پالیسی کی منظوری پاکستان میں امن و امان کی ضامن ہے، افواج اور سکیورٹی ادارے دہشتگردی کے خلاف ہائی الرٹ ہیں۔
نوشہرہ میں گفتگو کرتے ہوئے پاکستان تحریک انصاف کے سینئر رہنما اور وزیر دفاع پرویز خٹک نے کہا کہ ملک میں بہت قربانیوں سے امن قائم ہوا ہے ، کسی کو امن تباہ کرنے نہیں دیں گے، افغانستان کے حالات کی وجہ سے ملک میں دہشتگردی کی لہر آئی ہے، نیشنل ایکشن پلان پر اس کی روح کے مطابق ادارے عمل پیرا ہیں اور دہشتگردی کا سرکچل کردم لیں گے۔
پرویز خٹک کا کہنا تھا کہ کرونا کی وجہ سے دنیا معاشی بحران کی شکار ہے، مہنگائی بھی کورونا کے بعد دنیا کے لیے بڑا چیلنج ہے، مہنگائی صرف پاکستان میں نہیں پوری دنیا اس سے دوچار ہے، عمران خان کی پالیسوں سے جلد عوام کو مہنگائی سے ریلیف ملے گا۔
وزیر دفاع نے مزید کہا کہ بلدیاتی الیکشن کے پہلے مرحلے میں سب سے زیادہ ووٹ حاصل کئے، دوسرے مرحلے میں خیبرپختونخوا میں کلین سویپ کریں گے ، تحریک انصاف کی تنظیم سازی کررہے ہیں، 2023 کے عام انتخابات میں سندھ سمیت پورے ملک میں تحریک انصاف بھاری اکثریت سے حکومت بنائے گی۔
انہوں نے کہا کہ اپوزیشن جماعتیں مسلسل پروپیگنڈہ کررہی ہیں کہ تحریک انصاف کی مقبولیت گررہی ہے، خیبرپختونخوا بلدیاتی الیکشن کے پہلے مرحلے میں تحریک انصاف کو شکست ہوئی جو کہ کھلا جھوٹ ہے، تحریک انصاف نے بلدیاتی الیکشن میں سب جماعتوں سے زیادہ ووٹ حاصل کئے، ہمارے سب سے زیادہ ممبران اور تحصیل میئر منتخب ہوئے اور تمام اپوزیشن جماعتیں صفر ہوکر رہ گئی ہیں۔
