پٹرولیم مصنوعات کی قیمتوں میں ایک بار پھر اضافہ کر دیا گیا ہے جو یقیناً عوام کے مالی معاملات کو متاثر کرے گا لیکن وزیر اعظم کے معاون خصوصی برائے سیاسی امور شہباز گل اس اضافے کو بھی عوام کے لیے ’’ریلیف‘‘ قرار دے رہے ہیں۔ بقول ان کے وزیر اعظم نے اوگرا کی سفارشات کے برعکس عوام کو ’’حد درجہ ریلیف‘‘ دینے کا فیصلہ کیا۔ یہ ’’حد درجہ ریلیف‘‘ عوام‘ خصوصاً کم آمدنی والے طبقے کے مالی وسائل پر اضافی بوجھ کا سبب بنے گا۔ حکومتی عہدیدار تیل کی قیمتوں کا تعلق عالمی منڈی کے ساتھ جوڑ کر یہ ثابت کرنے کی کوشش کر رہے ہیں کہ اس میں اضافے کے سوا کوئی چارہ نہ تھا‘ مگر قیمتوں میں اضافے کا اصل سبب عالمی منڈی میں تیل کی قیمتیں نہیں بلکہ تیل پر حکومتی محصولات ہیں۔

جون میں عالمی منڈی میں تیل کی اوسط قیمت 73 ڈالر رہی جبکہ جولائی میں یہ 75 ڈالر کے قریب ہے اور تیل کی معیشت پر نظر رکھنے والے حلقے مستقبل قریب میں عالمی منڈی میں قیمتوں میں کمی کا عندیہ دے رہے ہیں۔ جب  عالمی منڈی میں تیل کی قیمتیں کم ہوتی ہیں تو عوام کو اس کا کون سا فائدہ ملتا ہے؟ پٹرولیم مصنوعات کو قابلِ برداشت حد میں رکھنے کیلئے ان پر عائد بے جا محصولات کو کم کرنا ہوگا۔ حکومت نے اپنا ریونیو بڑھانے کیلئے اگر تیل پر عائد ٹیکسز کو اسی طرح رکھا تو عوام کیلئے توانائی کا بوجھ ناقابل برداشت ہو جائے گا۔

روزنامہ دنیا ایپ انسٹال کریں