فضل خالد اچھے ایڈمنسٹریٹر نہیں، چیئرمین ہائرایجوکیشن نہیں رہ سکتے : چیف جسٹس لاہور ہائیکورٹ
سیکرٹری ہائر ایجوکیشن آپ کیا جھک مارتے ہیں؟ اساتذہ کی تعداد مکمل نہ ہونا کوئی بڑا ایشو نہیں ہے :چیف جسٹس قاسم خان ، کمیٹی 25مارچ تک حتمی فیصلہ کر کے لائے ،چیئرمین،سیکرٹری نتائج بھگتنے کو تیار رہیں،کالجز کے الحاق کے کیس میں ریمارکس
لاہور (کورٹ رپورٹر،این این آئی)چیف جسٹس لاہور ہائیکورٹ محمدقاسم خان نے کہاکہ فضل خالد اچھے ایڈمنسٹریٹر نہیں،چیئرمین ہائرایجوکیشن نہیں رہ سکتے ،نجی یونیورسٹیزکیساتھ کالجز کا الحاق نہ کرنے کیخلاف درخواست پر لاہور ہائیکورٹ نے عدالتی احکامات پر عملدرآمد کیلئے چیئرمین ہائرایجوکیشن کو 25مارچ تک مہلت دیدی ،چیف جسٹس لاہورہائیکورٹ قاسم خان نے سماعت شروع کی تو چیئرمین ہائر ایجوکیشن ڈاکٹر فضل خالد اور سیکرٹری ہائرایجوکیشن عدالت میں پیش ہوئے ، چیف جسٹس قاسم خان بعض یونیورسٹیز کے ساتھ امتیازی سلوک کرنے پرچیئرمین اور سیکرٹری ہائر ایجوکیشن کمیشن پر برس پڑے اور کہا جس نے آپ کی گردن پر پاؤں رکھ دیا اس کا کام کر دیا، چیئرمین ہائر ایجوکیشن نے استدعا کی کہ ہمیں 3 ہفتوں کیلئے مہلت دے دی جائے ، چیف جسٹس نے کہاپہلے آپ کی تقرری کا نوٹیفکیشن معطل کرتا ہوں پھر مہلت دیتا ہوں۔ ڈاکٹر فضل خالد !آپ چیئرمین ہائر ایجوکیشن کے عہدہ پر نہیں رہ سکتے ، سرکاری وکیل نے کہاعدالتی حکم پر من وعن عمل ہوگا، چیف جسٹس نے کہاڈاکٹر فضل خالد صاحب ! آپ ادارہ چلانے کے قابل نہیں، چیف جسٹس نے 3 ہفتوں کی مہلت کی استدعا مسترد کرتے ہوئے حکم دیاکہ کمیٹی 25 مارچ تک حتمی فیصلہ کرکے لائے ، کمیٹی کا فیصلہ آئین اور قانون کے مطابق ہو،کسی سے امتیازی سلوک نہ کیا جائے ، چیئرمین اور سیکرٹری ہائر ایجوکیشن کو سمجھ آنی چاہیے میں کیا کہہ رہا ہوں، سیکرٹری ہائر ایجوکیشن آپ کیا جھک مارتے ہیں؟ اساتذہ کی تعداد مکمل نہ ہونا کوئی بڑا ایشو نہیں ،ایچ ای سی میں جتنے لوگ بیٹھے ہیں کسی کو عقل نہیں ایچ ای سی کا اپنا کوئی دماغ نہیں ہے ، حکومت نے اداروں کی تباہی کر دی ،چیئرمین اور سیکرٹری ہائر ایجوکیشن آپ نتائج بھگتنے کو تیار رہیں،جو ادارے کام کر رہے ہیں ان کو بھی کام کرنے سے روکا جا رہا ہے ، آپ کو اچھے انسانوں کی قدر نہیں، چیف جسٹس نے حکم دیا کہ تمام فریق آئندہ سماعت پر خود پیش ہوں کسی کو حاضری معافی نہیں ملے گی، چیف جسٹس نے گورنر پنجاب کے پرنسپل سیکرٹری کو بھی طلب کر لیا اور کہا ہر روز اجلاس کرکے سیکرٹری ہائر ایجوکیشن کو میٹنگ منٹس جمع کروائیں۔ چیف جسٹس قاسم خان نے کہاکہ پوری دنیا میں ہر کام ایک منٹ میں ہو جاتا ہے ،عدالت نے کارروائی 25مارچ تک ملتوی کرتے ہوئے عمل درآمد رپورٹ طلب کرلی ۔