لکھو ڈیرمیں سسرالیوں کے تشدد سے 18سالہ لڑکی جاں بحق
زینب کو باندھ کر تشدد کیا گیا:والد،ملزم غلام عباس اور شکیلہ بی بی گرفتار
لاہور (خبر نگار سے )لکھو ڈیر کے علاقہ میں سسرالیوں نے ظلم کی انتہا کر دی ، 18سالہ لڑکی کو تشدد کا نشانہ بنا کر موت کی نیند سلا دیا ۔ پولیس نے لاش پوسٹ مارٹم کیلئے مردہ خانے منتقل کر دی۔ تفصیلات کے مطابق باٹا پور کے علاقے لکھو ڈیر میں سسرالیوں نے 18سالہ زینب کو تشدد کا نشانہ بنا کر موت کی نیند سلا دیا ۔ لڑکی کی والد کا کہنا ہے کہ میں نے اپنی بیٹی کی شادی اپنے سگے بھائی کے گھر کی تھی ۔ ملزم غلام عباس اور اس کی والدہ بے انتہاتشدد کرتے تھے ، گزشتہ روز ملزمان نے رسیوں سے باندھ کر زنیب کو تشدد کا نشانہ بنایا جس سے اس کی موت واقع ہو گئی ۔ اطلاع ملنے پر پولیس موقع پر پہنچ گئی ،پولیس نے جائے وقوعہ سے شواہد اکٹھے کرکے لاش کو مردہ خانے منتقل کر دیا ۔واقعہ کا مقدمہ مقتولہ زینب کے والد کی مدعیت میں شوہر غلام عباس اور ساس شکیلہ بی بی کے خلاف درج کرلیا گیا ۔ پولیس کا کہنا ہے کہ ملزمان کو گرفتار کر لیا گیا ہے ،تفتیش جاری ہے ۔
