زرداری کیخلاف پارک لین ریفرنس کے 2اہم کردار گرفتار
وحید اوراقبال پر 118کنال زمین زرداری کی کمپنی کے نام منتقل کرنے کا الزام
اسلام آباد(اپنے نامہ نگارسے )چیئرمین نیب کی ہدایت پر جعلی اکاؤنٹس کیسز میں اہم پیشرفت ہوئی ہے ،آصف علی زرداری کیخلاف پارک لین ریفرنس کے دو اہم کردار گرفتار کرلئے گئے ۔ہفتہ کو نیب کی جانب سے جاری بیان کے مطابق سابق ممبر ماحولیات میاں وحید الدین اور تحصیلدار اقبال کو گرفتار کرلیا گیا،گرفتار دونوں ملزمان کو احتساب عدالت کے ایڈمنسٹریٹو جج محمد بشیر کے سامنے پیش کیا گیا ۔ نیب کے حکام نے ملزمان سے تفتیش کیلئے ریمانڈ کی استدعاکی جس پر عدالت نے دونوں گرفتار ملزمان کو 14 روزہ جسمانی ریمانڈ پر نیب کے حوالے کردیا۔ ملزمان پر 118 کنال زمین غیر قانونی طور پر آصف زرداری کی کمپنی کے نام منتقل کرنے کا الزام ہے ۔