الیکشن کمیشن:انتخابات کیلئے ضابطہ اخلاق جاری،4اکتوبر کو مشاورت ،سیاسی جماعتوں کو دعوت
اسلام آباد(این این آئی، وقائع نگار)الیکشن کمیشن نے عام انتخابات کے لیے 88 نکات پر مشتمل مجوزہ ضابطہ اخلاق جاری کردیا۔ جاری کردہ ضابطہ اخلاق کے مطابق صدر، وزیراعظم، وزرا اور عوامی عہدیدار انتخابی مہم میں حصہ نہیں لے سکیں گے۔
سینیٹرز و بلدیاتی نمائندے انتخابی مہم چلا سکیں گے اور ترقیاتی سکیموں کے اعلانات پر پابندی ہوگی۔ الیکشن کمیشن کے مطابق عدلیہ، نظریہ پاکستان کے خلاف گفتگو اور مہم پر پابندی ہوگی ، سیاسی جماعتیں5 فیصد خواتین امیدواروں کو ٹکٹس دینگی۔ جلسے جلوسوں اور عوامی اجتماعات میں اسلحہ کی نمائش، سرکاری خزانہ سے سیاسی و انتخابی مہم چلانے اور سرکاری ذرائع ابلاغ پر جانبدارانہ کوریج پر پابندی ہوگی، جلسوں کی اجازت انتظامیہ سے مشروط ہوگی ، فرقہ وارانہ، لسانیت پر مبنی گفتگواور کسی شہری کے گھر کے سامنے احتجاج یا دھرنے کی اجازت نہیں ہوگی، امیدوار ہر پولنگ بوتھ پر ایک پولنگ ایجنٹ حلقہ کیلئے 3 الیکشن ایجنٹ مقرر کرسکتا ہے ، الیکشن ایجنٹ کا متعلقہ حلقہ سے ہونا لازمی ہوگا ، سرکاری املاک پر سیاسی جماعتوں کے پرچم لگانے پر پابندی ہوگی۔علاوہ ازیں الیکشن کمیشن نے ضابطہ اخلاق پر مشاورت کیلئے سیاسی جماعتوں کا اجلاس 4 اکتوبر کو 2 بجے دوپہر طلب کرلیا ۔ اس سلسلے میں ڈرافٹ ضابطہ اخلاق کی ایک کاپی بھی سیاسی پارٹیوں کے سربراہان کو بھیجی گئی ہے تاکہ مشاورت کے وقت وہ ضابطہ اخلاق پر بہتر انداز میں اپنا فیڈ بیک دے سکیں۔
