ہسپتالوں کی حالت بہتر بنانے کیلئے ننشیا حکومت کی مہارت سے فائدہ اٹھائینگے:محسن نقوی
لاہور(سیاسی رپورٹرسے )نگران وزیر اعلیٰ پنجاب محسن نقوی نے چین کے شہر ین چوان میں صوبہ ننشیا کے سب سے بڑے جنرل ہسپتال کا دورہ کیا۔ننشیا ہسپتال کے حکام نے وزیر اعلیٰ کو دستیاب سہولتوں اور طریق کار پربریفنگ دی۔
ننشیاکا سب سے بڑا جنرل ہسپتال 3500 بستروں پر مشتمل ہے ۔محسن نقوی نے ننشیا جنرل ہسپتال کے ڈاکٹرز اور پیرامیڈیکل سٹاف سے بھی گفتگو کی۔محسن نقوی نے ننشیا جنرل ہسپتال کے استقبالیہ،وارڈز اور شعبوں کا معائنہ کیا۔ ڈاکٹرز اور پیرامیڈیکل سٹاف کے ریسٹ روم بھی دیکھے ۔وزیراعلی ٰنے بلڈ سیپمل کولیکشن روم،میڈیکل سٹوراور ایمرجنسی وارڈ کا جائزہ لیااور جدید ترین طبی آلات سے لیس ایمبولینس گاڑیوں کا مشاہدہ بھی کیا۔ علاج معالجے کے لئے موجود جدید مشینری اور آلات بھی دیکھے ۔وزیراعلٰی ٰنے کہا کہ ننشیا کے سب سے بڑے جنرل ہسپتال کا مینجمنٹ سسٹم لائق تحسین اور قابل تقلید ہے ۔ ازبکستان کے بعد چین کے دورہ میں دوسرے غیر ملکی ہسپتال میں سہولتوں کا جائزہ لیا۔انہوں نے کہا کہ پنجاب کے ہسپتالوں میں مریضوں کے لیے اسی طرز پر طبی سہولتوں کو بہتر بنانے کی پوری کوشش کررہے ہیں۔ہسپتالوں کی حالت بہتر بنانے کے لئے ننشیا حکومت کی مہارت سے فائدہ اٹھائیں گے ۔
محسن نقوی نے ننشیا جنرل ہسپتال میں کام کرنے والے پاکستانیوں سے بھی ملاقات کی اور تبادلہ خیال کیا۔ محسن نقوی ٹویٹر ٹرینڈ ٹاپ پر آ گئے ۔ وزیراعلیٰ محسن نقوی گزشتہ تین دن میں دوسری دفعہ ٹرینڈز میں ٹاپ پر رہے ۔محسن نقوی ان چائنہٹاپ ٹرینڈز میں پہلے نمبر پر آرہا ہے ۔وزیراعلیٰ کے دورہ چین کو ننشیا کے مقامی ذرائع ابلاغ میں بھی خصوصی کوریج حاصل ہوئی۔ادھر چین کے صوبے ننشیا کے دارالحکومت ین چوان میں 6ویں چین،عرب ایکسپو میں شریک غیر ملکی مندوبین کے اعزاز میں استقبالیہ تقریب ہوئی۔صوبائی وزرا ایس ایم تنویر، اظفر علی ناصر، ابراہیم حسن مراد اور سیکرٹری خزانہ مجاہد شیر دل پر مشتمل پنجاب حکومت کے وفد نے 6ویں چین،عرب ممالک ایکسپوتقریب میں خصوصی شرکت کی۔صوبائی وزرا ایس ایم تنویر، اظفر علی ناصر، ابراہیم حسن مرادنے ننشیا کے حکام اور کیمونسٹ پارٹی کے عہدیداروں سے ملاقات کی۔ صوبائی وزرا نے ایکسپو میں شریک عرب ممالک کے وفود سے ملاقاتیں کیں۔ صوبائی وزیر ایس ایم تنویر نے کہاکہ دورہ چین پنجاب کے عوام کو مزید بہتر سہولتوں کے مواقع فراہم کرنے کے لئے معاون ثابت ہو گا۔ استقبالیہ تقریب میں چین کا ثقافتی شو بھی پیش کیا گیا اورچینی فنکاروں نے ثقافتی پرفارمنس سے شرکا کو مَحظوظ کیا۔
