بجلی کے مزید جھٹکے،3.28روپے یونٹ مہنگی
اسلام آباد (دنیا نیوز، مانیٹرنگ ڈیسک)عوام کیلئے بجلی مزید جھٹکے ، نیشنل الیکٹرک پاور ریگولیٹری اتھارٹی (نیپرا)نے مہنگائی کی چکی میں پسے عوام پر پھربجلی گرا دی۔ سہ ماہی ایڈ جسٹمنٹ کی مد میں بجلی 3 روپے 28 پیسے فی یونٹ مہنگی کر دی گئی۔
نیپرا کے مطابق بجلی کی قیمت میں اضافہ سے ڈسکوز کے صارفین پر 159 ارب روپے کا اضافی بوجھ پڑے گا۔ اضافہ کا اطلاق یکم اکتوبر 2023ء سے مارچ 2024ء تک ہو گا، اضافہ کا اطلاق تمام صارفین پر ہوگا۔ یہ اضافہ مالی سال 23-2022 کی چوتھی سہ ماہی ایڈجسٹمنٹ کی مد میں کیاگیا۔ نیپرا کا کہنا ہے بجلی صارفین کو 6 ماہ میں اضافی ادائیگیاں کرنا ہوں گی۔ بجلی کی قیمتوں میں اضافے کا فیصلہ حکومت کو بھجوا دیا گیا ہے ۔ وفاقی حکومت کی منظوری کے بعد اطلاق ہوجائے گا۔ سہ ماہی ایڈجسٹمنٹ کا اطلاق کے الیکٹرک کے صارفین پر بھی ہو گا۔ نیپرا نے بجلی میں اضافہ کا نوٹیفکیشن جاری کردیا۔
