قائداعظم یونیورسٹی میں طلبہ یونین بحال کرنیکا فیصلہ:کسی کو مداخلت نہ کرنے دیں:چیف جسٹس
اسلام آباد(خصوصی رپورٹر)چیف جسٹس آف پاکستان جسٹس قاضی فائز عیسیٰ نے گزشتہ روز قائداعظم یونیورسٹی سنڈیکیٹ اجلاس میں بحیثیت رکن شرکت کی،اس موقع پریونیورسٹی سنڈیکیٹ نے جامعہ میں طلبہ یونین کی بحالی کا فیصلہ کیا۔
اجلاس کی صدارت وائس چانسلر پروفیسر ڈاکٹر نیاز احمد نے کی،اجلاس میں سیکرٹری تعلیم وسیم اجمل کی سربراہی میں طلبہ یونین کے قواعد طے کرنے کیلئے کمیٹی قائم کی گئی،چیف جسٹس قاضی فائز عیسیٰ نے قائد اعظم یونیورسٹی میں اسلحہ بردار پولیس، رینجرز اور سکیورٹی اہلکاروں کی موجودگی پر ناراضگی کا اظہار کیا،انہوں نے کہاطلبہ یونین غیر جماعتی ہو، فرقہ واریت اور لسانی تقسیم سے پاک ہو، یونیورسٹی کو اسلحے اور منشیات سے پاک رکھیں،چیف جسٹس نے مزید کہا کہ قائد اعظم یونیورسٹی کے پہلے قانون میں یونین موجود تھی، جنرل ضیاء الحق کے مارشل لاء کے پہلے حکم میں یونیورسٹی یونین ختم کی گئی،ان کا کہنا تھا کہ کسی کو بھی یونیورسٹی معاملات میں مداخلت کی اجازت نہ دیں، ایجنسیوں کو بھی یونیورسٹی معاملات سے پرے رکھیں، یہاں اعلیٰ تعلیم پر توجہ دی جائے ۔یادرہے کہ قائداعظم یونیورسٹی میں آخری بار چیف جسٹس بھگوان داس نے دورہ کرکے اجلاس میں شرکت کی تھی جبکہ سابق چیف جسٹس عمر عطا بندیال ایک بار آن لائن اجلاس میں شریک ہوئے تھے ۔
