بیان دینے سے پہلے شیخ رشید کا انجام دیکھ لیں:راناثنا اللہ:نواز شریف کی واپسی سے لینا دینا نہیں:نگران وزیر داخلہ کا نیا موقف
لاہور(آئی این پی،صباح نیوز)مسلم لیگ ن پنجاب کے صدر،سابق وزیر داخلہ رانا ثنا اللہ نے کہا ہے نگران وزیر داخلہ بیان دینے سے قبل سابق وزیر داخلہ شیخ رشید کا انجام دیکھ لیں۔
سرفراز بگٹی کے بیان کو حد سے تجاوز قرار دیتے ہوئے انہوں نے کہا نواز شریف کے خلاف سازش کا خمیازہ عوام اور ملک نے بھگتا ہے سرفراز بگٹی نواز شریف کے بارے میں بیان بازی سے اپنا قد بڑھانے کی کوشش نہ کریں ان کی فکر چھوڑیں، اپنے کام پر توجہ دیں ۔نواز شریف ہمیشہ کی طرح عدالتوں میں قانون کے مطابق تقاضے پورے کریں گے ۔دریں اثنائترجمان مسلم لیگ (ن)مریم اورنگزیب نے کہا ہے نواز شریف وطن واپسی پر ایئر پورٹ سے کہاں جائیں گے یہ نگران حکومت کا مسئلہ نہیں ہے ،نگران وزیر داخلہ سرفراز بگٹی کے بیان پر ردعمل دیتے ہوئے مریم اورنگزیب نے کہا سرفراز بگٹی صاحب نواز شریف نے ایئر پورٹ سے کہاں جانا ہے یہ نہ آپ کا مسئلہ ہے اور نہ آپ کا فیصلہ، فورس اور تیاری عوام کو تحفظ اور امن فراہم کرنے کیلئے استعمال کریں۔انہوں نے کہا نواز شریف نے 21اکتوبر کو ایئرپورٹ سے کہاں جانا ہے یہ نواز شریف اور عوام کا فیصلہ ہوگا وہ اس ملک کے 3دفعہ کے منتخب وزیراعظم ہیں جن پر جھوٹے کیس بنا کر اور بے بنیاد الزام لگا کر ناحق سزا دی گئی۔ان کا کہنا تھا جس کرسی پر تھوڑی مدت کیلئے بیٹھے ہیں اسے تاحیات سمجھنے کی غلط فہمی سے باہر آ جائیں، نواز شریف کی نہیں ملک کی فکر کریں۔
اسلام آباد (خصوصی نیوز رپورٹر،خبر نگار )نگران وزیر داخلہ سرفراز بگٹی نے نیا موقف اپناتے ہوئے کہا ہے نواز شریف کی گرفتاری سے متعلق میرے بیان کو سیاسی رنگ دیا گیا حالانکہ نگران حکومت کا کوئی سیاسی ایجنڈا نہیں ہے ، وطن واپس پر نواز شریف کے ساتھ قانون کے مطابق سلوک کیا جائے گا،اس سے وزارت داخلہ کا کوئی لینا دینا نہیں ۔نواز شریف کی گرفتاری سے متعلق کل دئیے گئے بیان پر وضاحت دیتے ہوئے سرفراز بگٹی نے کہا میرے بیان کو درست انداز میں پیش نہیں کیا گیا، مجھ سے نواز شریف کی گرفتاری سے متعلق سوال کیا گیا تو اس کا میں نے جواب دیا جسے سیاق و سباق سے ہٹ کر پیش کیا گیا۔انہوں نے کہا کسی بھی ملزم کی وطن واپسی پر ریاست کا اپنا انتظام ہوتا ہے ، نواز شریف سابق وزیراعظم ہیں جو وطن واپس آرہے ہیں ان پر عدالتوں میں مقدمات زیر سماعت ہیں اس معاملے سے وزارت داخلہ کا کوئی لینا دینا نہیں ہے ۔سرفراز بگٹی نے کہا نواز شریف پاکستان کی سیاست میں واپس آنا چاہتے ہیں، عوام کا بڑا حصہ ان کے استقبال کی تیاریوں میں مصروف ہے ، وطن واپسی پر نواز شریف کے ساتھ قانون کے مطابق سلوک کیا جائے گا، ہمیں مفروضوں سے باہر نکل کر معاملات کو حقیقت کے آئینے سے دیکھنا ہوگا۔نگران حکومت اپنے مینڈیٹ کے مطابق کام کرے گی۔ نگران وزیر داخلہ سرفراز بگٹی نے گزشتہ روز کہا تھا کہ نوازشریف کو عدالت سے ضمانت نہ ملی تو گرفتار کریں گے ، میرے خیال میں نواز شریف خود بھی گرفتار ہونا ہی چاہیں گے ، ایک ملزم کو جہاز سے گرفتار کرنے کیلئے کوئی بڑی فورس نہیں چاہیے ہوتی۔
