پنجاب کا بینہ:پولیس ڈپٹی سپرنٹنڈنٹس سروس رولز میں ترامیم کی منظوری
لاہور(سیاسی رپورٹرسے )نگران وزیراعلیٰ پنجاب محسن نقوی نے شاہدرہ فلائی اوورز پراجیکٹ کا دورہ کیا ،شاہدرہ فلائی اوورز پراجیکٹ کاتقریباً 88فیصدکام مکمل کر لیا گیا ۔
وزیراعلیٰ نے پراجیکٹ کے تعمیراتی کاموں کا معائنہ کیا اور پیشرفت کا جائزہ لیا ۔ وزیراعلیٰ نے دورے کے دوران تعمیراتی کاموں کی رفتار مزید تیز کرنے کی ہدایت کی۔پلوں پر جاری کام کا بھی جائزہ لیا ۔محسن نقوی نے مقررہ مدت میں پراجیکٹ کی تکمیل کیلئے کنٹریکٹر کو ضروری ہدایات دیں ۔محسن نقوی کا کہنا تھا کہ پنجاب حکومت کی تمام سپورٹ آپ کے ساتھ ہے ۔منصوبے کو ہر صورت اگلے ماہ کے وسط میں مکمل ہونا چاہیے ۔ بارشوں کے باعث ہونے والی تاخیر کا ازالہ اضافی وسائل لگا کر کیا جائے ۔بعد ازاں محسن نقوی گوجرانوالہ پہنچ گئے ۔لاہور،سیالکوٹ موٹروے کے ساتھ گوجرانوالہ کو لنک کرنے کے پراجیکٹ کا تفصیلی دورہ کیا ،وزیراعلیٰ نے 15.2کلومیٹر بے نظیر چوک سے واہنڈو تک پورے روٹ کا معائنہ کیا، دورے کے دوران وزیر اعلی ٰنے ارتھ ورک اور سٹرک پر پتھر ڈالنے کے کام کی رفتار چیک کی۔ زیر تعمیر پلوں کا معائنہ کیا ،محسن نقوی نے 2 ۔15 کلو میٹر زیر تعمیر دو رویہ سٹرک پر جاری تعمیراتی سرگرمیوں کا جائزہ لیا ، وزیراعلیٰ کاکہناتھاکہ منصوبے کی تکمیل سے گوجرانوالہ کا لاہور کا سفر 45 منٹ رہ جائے گا۔ نگران وزیر اعلیٰ پنجاب محسن نقوی سے فنکاروں کے وفد نے ملاقات کی۔ فنکاروں کے مسائل سنے او ران کے حل کیلئے یقین دہانی کرائی۔ محسن نقوی نے فنکاروں کے وفد سے خطاب کرتے ہوئے کہاکہ آرٹسٹ کی کوئی پنشن نہیں،بڑھاپے میں بھی وہ محنت کرتاہے ،جلدہی آرٹسٹ اورفنکاروں کے لئے ا نڈوومنٹ فنڈ کے لئے رقم جاری کرد ی جائے گی۔فنکاروں کے وفد میں ریشم، اورنگ زیب لغاری، راشد محمود، کلیم پرویز، شہزاد رفیق، حسن مراد، افتخار ٹھاکر، گوشی خان، عارف لوہار، وارث بیگ، ترنم ناز، ایوب خاور، ناصر ادیب، نعیم طاہر، جاوید رضوی، روحی خان، پرویز رضا، ذوالفقار علی اور دیگر شامل تھے ۔محسن نقوی سے نیزہ بازی کے عالمی مقابلے میں سلور میڈل جیتنے والے کھلاڑی ارشد ندیم نے ملاقات کی-وزیر اعلیٰ نے 30لاکھ روپے کا چیک دیا۔نگران وزیراعلیٰ محسن نقوی کی زیر صدارت وزیراعلیٰ آفس میں پنجاب کابینہ کا26واں اجلاس ہوا۔اجلاس میں 9نکاتی ایجنڈے کی منظوری دی گئی۔ اجلاس میں پنجاب پولیس ڈپٹی سپرنٹنڈنٹس(اپوائنٹمنٹ بائی پرموشن) سروس رولز 2020 میں ترامیم اور پنجاب سپورٹس انڈومنٹ فنڈمینجمنٹ کمیٹی کے قیام ،ٹیکسلا میوزیم کی بحالی اور اپ گریڈیشن کے لئے جاپانی گرانٹ استعمال کرنے اورپنجاب پبلک سروس کمیشن اورصوبائی محتسب کی سالانہ رپورٹس برائے 2022 کی منظوری دی گئی۔کابینہ سٹینڈنگ کمیٹی برائے قانونی امور و نجکاری کے 6 ویں اجلاس کے فیصلوں کی توثیق کی گئی۔ بہاولپور سے لودھراں تک سپیڈو بسوں کے آپریشن میں توسیع ،پنجاب ایگریکلچر، فوڈ اینڈ ڈرگ اتھارٹی کے ٹیکنیکل ممبر کی تقرری ۔پنجاب انفارمیشن ٹیکنالوجی بورڈ کے ساتھ آئی سی ٹی بیسڈ سسٹم کے معاہدے کی تجدید ،پنجاب وائلڈ لائف مینجمنٹ کمیٹی رولز 2023 کی منظوری دی گئی۔کابینہ سٹینڈنگ کمیٹی برائے امن و امان کے 10 ویں اور 11 ویں اجلاس کے فیصلوں کی توثیق کی گئی۔محسن نقوی نے اکبر چوک فلائی اوورز پراجیکٹ کا دورہ کیا۔زیر تعمیر پل پر مشینری کے ذریعے بھاری گارڈر رکھنے کے عمل کا مشاہدہ کیا۔پراجیکٹ کی سائٹ کا معائنہ کیا اورٹریفک کی روانی کے لئے یوٹرنز کو بہتر بنانے کی ہدایت کی۔وزیراعلیٰ نے اکبر چوک فلائی اوور پراجیکٹ کی تعمیرات کو تیز تر کرنے کی ہدایت کی۔
