رازق سنجرانی گھرالاٹمنٹ کیس،نظر آرہاہے اندر کیا کچھ ہورہا:اسلام آباد ہائیکورٹ
اسلام آباد(اپنے نامہ نگارسے )اسلام آباد ہائیکورٹ کے جسٹس بابر ستار کی عدالت نے چیئرمین سینیٹ کے بھائی رازق سنجرانی کو سرکاری گھر کی غیرقانونی الاٹمنٹ کے خلاف کیس میں فیصلہ محفوظ کرتے ہوئے رازق سنجرانی کی تعیناتی اور گھر کی الاٹمنٹ سے متعلق وزارت ہاؤسنگ، پٹرولیم اور اسٹیبلشمنٹ ڈویژن سے مکمل ریکارڈ طلب کر لیا۔
رازق سنجرانی کے وکیل نے کہاکہ رازق سنجرانی کو الاٹ کیا گیا گھر سرنڈر کر دیا ،عدالت نے استفسار کیاکہ اُنہیں اب گھر سرنڈر کرنے کا خیال کیسے آگیا ؟ جسٹس بابر ستارنے وزارت پٹرولیم اور اسٹیبلشمنٹ ڈویژن سے استفسار کیاکہ آپ ریکارڈ ساتھ لائے ہیں؟،رازق سنجرانی کی تعیناتی کا ریکارڈ دکھائیں،عدالت نے اسٹیبلشمنٹ ڈویژن کے حکام سے کہاکہ رازق سنجرانی کی تعیناتی کی سمری پڑھیں،جو سمری بھیجی گئی اس پر وزیراعظم اور کیا کرتا،2008 میں 3 سالہ تعیناتی ہوئی اب 2023 چل رہا ہے ،ہم نے اس لئے ریکارڈ منگوایا تھا کہ معلوم ہو کس قانون کے تحت انہیں گھر ملا،عدالت نے کہاکہ یہاں سیکرٹری گھروں کیلئے دھکے کھا رہے ہیں اور آپ واؤچر ایشو کر رہے ہیں؟عدالت دوسرا نوٹس جاری کر رہی ہے توہین عدالت کی کارروائی شروع کرینگے ،اِس کیس سے نظر آ رہاہے کہ اندر اور کیا کچھ ہو رہا ہے ،عدالت اپنی آنکھیں بند نہیں کر سکتی، وکیل نے کہا گھر خالی کرنے کیلئے مزید وقت دیں،جسٹس بابر ستار نے کہاکہ سمجھنے کی کوشش کریں، بہتر ہو گا جلد گھر خالی کر دیں۔
