سیاسی قوتوں میں بات چیت چیلنجز سے نمٹنے کا واحدحل :بلاول
کراچی (سٹاف رپورٹر،دنیا نیوز)پاکستان پیپلزپارٹی کے چیئرمین بلاول بھٹو زرداری نے کہا ہے کہ کچھ لوگ پاکستان کے نوجوانوں کو انتہا پسندی کی طرف دھکیلنا چاہتے ہیں۔
جمعہ کو لیاری کے فٹبال گراؤنڈ میں سندھ سپورٹس اینڈ یوتھ ڈیپارٹمنٹ کے تحت سندھ پنک فٹ بال ٹورنامنٹ کی افتتاحی تقریب سے خطاب کرتے ہوئے ان کا کہنا تھا کہ میں اپنے نوجوانوں کو ترقی کرتے ہوئے دیکھنا چاہتا ہوں، موجودہ ملکی حالات میں سیاسی قوتوں کے درمیان بات چیت ہی درپیش چیلنجز سے نمٹنے کا واحد اور مؤثر حل ہے ۔انہوں نے کہا کہ خیبرپختونخوامیں صورت حال مخدوش ہے ، خیبرپختونخوا کے عوام کی مشکلات دورکرنے کی ضرورت ہے ،تمام سیاسی جماعتوں کو سیاسی ہم آہنگی پیدا کرنے ضرورت ہے ،اس وقت ملک میں معاشی اورسیاسی استحکام کے لیے ضروری ہے کہ ملک میں سیاسی ہم آہنگی پیدا کی جائے ۔چیئرمین پیپلزپارٹی کا کہنا تھا کہ خیبرپختونخوا میں امن کے قیام کے لیے صوبائی حکومت کواقدامات کرنے چاہئیں تھے ، خیبرپختونخوا حکومت عوامی مسائل کے حل کی بجائے انتہا پسندانہ سیاست میں مصروف ہے ، خیبرپختونخواکے عوام کا پیسہ ان کوریلیف فراہم کرنے کے لیے خرچ ہوناچاہیے ۔بلاول بھٹو نے کہا کہ خیبرپختونخوا حکومت کوآل پارٹیز کانفرنس میں شرکت کے لیے دعوت دی گئی مگر وہ نہیں آئے ، ہم خیبرپختونخوا کے عوام کے مسائل کے حل کے لیے جدوجہد کرتے رہیں گے ۔ان کا کہنا تھا کہ آج لیاری کے فٹبال گراؤنڈ میں آکر بہت خوشی محسوس کررہاہوں، لیاری میں بین الاقوامی طرز کا فٹبال گراؤنڈ قائم کیاگیاہے ، یہ ہمارے لیے اعزاز ہے کہ سندھ بھرسے کھلاڑی لیاری آئے ہیں۔
انہوں نے کہا کہ فخر ہے کہ صوبے بھر کے نوجوان اور خواتین کھلاڑی یہاں موجود ہیں، حکومت سندھ نے کراچی کی عوام کے لیے یہ منصوبہ شروع کیا، افسوس ہے کہ کچھ ایسی سوچ بھی موجود ہے جوخواتین کو آگے نہیں بڑھنے دیتی، ایسی سوچ کے کچھ لوگ ہمارے ملک اورکچھ پڑوسی ملک میں موجود ہیں،خواتین ملک کی وزیراعظم بنناچاہیں تو ایک نہیں دوبار بن سکتی ہیں، وہ دن دور نہیں جب لیاری، گھوٹکی، لاڑکانہ، شہید بینظیر آباد، حیدرآباد، میرپورخاص اور تھر پارکر کی خواتین کھلاڑی عالمی سطح پر پاکستان کی نمائندگی کریں گی، سب جانتے ہیں کہ پاکستان کا مستقبل اس ملک کے نوجوان ہیں۔انہوں نے مزید کہا کہ ایسی سوچ والے لوگ موجود ہیں جو نوجوانوں کے مستقبل کوتباہ کرنا چاہتے ہیں،میں اور آپ مل کراس ملک کے نوجوانوں کی ترقی کا بندوبست کریں گے ،صدرآصف زرداری نے کراچی سمیت ملک بھر کے لیے کام کیا، مسائل ہیں لیکن بہتری کی گنجائش بھی ہے ، کراچی پر پوری توجہ دی جارہی ہے ، آپ کی محنت کی وجہ سے تاریخ میں پہلی بار ایک جیالا میئربن گیا، اس میں پوری جماعت کا کردار ہے لیکن لیاری کا کردار سب سے زیادہ ہے ، محنت،جدوجہد، قربانیوں اورشہادت قبول کرنے کے لیے لیاری والے سب سے آگے ہیں، لیاری میں سب سے زیادہ کام ہونا چاہیے ، وزیراعلیٰ سندھ یہاں لائٹ کا بھی بندوبست کریں۔
