مہنگائی میں کمی محنت کا نتیجہ، ہروعدے پرقائم:شہبازشریف
اسلام آباد (مانیٹرنگ ڈیسک ،نیوزایجنسیاں) وزیرِ اعظم محمد شہباز شریف نے مہنگائی میں کمی پر پوری قوم کو مبارکباددیتے ہوئے کہاہے کہ یہ معاشی ٹیم کی محنت کا نتیجہ ہے ،میں عوام سے کئے گئے اپنے ہروعدے پر قائم ہوں ،پاکستان کی ترقی و خوشحالی کیلئے دی گئی ہماری سیاسی قربانیاں رائیگاں نہیں گئیں۔
پرائم منسٹر آفس پریس ونگ کی جانب سے ہفتہ کو جاری بیان میں وزیر اعظم نے ہفتہ وار مہنگائی کی شرح مزید کم ہو کر ساڑھے تین فیصد (3.57)پر آنے پر پوری قوم کو مبارکباد دی اور کہا کہ اﷲتعالٰی کے فضل و کرم اور معاشی ٹیم کی کاوشوں کی بدولت مہنگائی کی شرح گزشتہ چھ سال کی کم ترین سطح پر آگئی ہے ،4 اکتوبر 2018 کے بعد گزشتہ روز پرائس انڈیکس کم ترین سطح پر ریکارڈ کیا گیا۔ وزیرِاعظم نے کہا کہ گزشتہ برس میں رواں ہفتے کی نسبت آج مہنگائی کی شرح میں 39.11 فیصد کی بڑی کمی معاشی ٹیم کی دن رات محنت کا نتیجہ ہے ۔ انہوں نے کہا کہ عوام سے کئے گئے اپنے ہر وعدے پر قائم ہوں،عوام کی مشکلات کے ازالے کیلئے دن رات محنت کا عہد کیا تھا ،بطور خادم پاکستان اپنے کئے گئے ہر عہد پر قائم ہوں۔ وزیرِاعظم شہباز شریف نے کہا کہ روزگار کی فراہمی، ملکی صنعتی ترقی اور غیر ملکی سرمایہ کاری میں مزید اضافے کیلئے اقدامات کر رہے ہیں،ملک معاشی استحکام کے بعد ترقی کی جانب تیزی سے گامزن ہے ،بیرون ملک سے ترسیلات زر، دوست ممالک سے سرمایہ کاری میں اضافہ، سفارتی تعلقات میں استحکام پاکستان کی ترقی کے سفر کی عکاس ہے ،ملکی ترقی کے سفر میں تمام سٹیک ہولڈرز اپنا مثبت کردار ادا کر رہے ہیں۔
