سول نافرمانی کی کال فیض حمید کیس پر دباؤ کیلئے دی گئی:واوڈا
کراچی (مانیٹرنگ ڈیسک)سینیٹر فیصل واوڈا نے کہا پی ٹی آئی نے فیض حمید کے کیس کی کارروائی پر دباؤ ڈالنے کیلئے سول نافرمانی کی کال دی۔ یہ سمجھتے ہیں فیض حمید کے خلاف قانونی کارروائی 14 دسمبر کے بعد ہوگی اور یہ دباؤ بڑھائیں گے ۔
پی ٹی آئی والوں کو بتا دوں کہ فیض حمید کے خلاف کارروائی 14 دسمبر سے پہلے شروع ہو جائے گی، پی ٹی آئی اگر حرکتیں صحیح کرلے تو اچھی بات ہے ۔سینیٹر فیصل واوڈا ایم کیو ایم کے مرکزی آفس بہادرآباد کراچی پہنچ گئے جہاں انہوں نے ایم کیو ایم کے رہنماؤں سے ملاقات کی۔ اس موقع پر مصطفی کمال نے میڈیا سے بات چیت کرتے ہوئے کہا فیصل واوڈا ون مین آرمی ہیں ہر طرف چھائے ہوئے ہیں، پاکستان کو جوڑنے اور سیاسی قوتوں کو ایک جگہ لانے کا کام بڑی سیاسی جماعتوں کی قیادت سے نہیں ہوا، یہ کام اکیلے فیصل واوڈا کررہے ہیں، ان کی پوری تائید اور سپورٹ کرتے ہیں، ان کیلئے جو کردار ادا کرسکیں گے کریں گے ۔فیصل واوڈا نے کہا کہ سیاسی جماعتوں کے پاس جانے کا قومی مقصد ہے ، مصطفی کمال اور میری یکساں فطرت ہے ، پیار سے بھی کام کرانا جانتے ہیں اور ہاتھ مروڑ کر بھی، ہمیں سب کا مینڈیٹ تسلیم کرنا ہوگا، روز لاشیں گرانا دھرنے اور ناانصافی اب پاکستان برداشت نہیں کرسکتا، تحریک انصاف کے مینڈیٹ کو تسلیم کرنا ہوگا اس کا احترام کرنا ہوگا۔تحریک انصاف کے بانی کی جان کو خطرہ ہے ، وزیر اعلیٰ کے پی کی غنڈہ گردی نہیں چلے گی، ایم کیو ایم کی قیادت فضل الرحمان سے ملاقات کریگی، مولانا کے بل کے حوالے سے ہم مل کر کوئی راستہ نکالیں گے ، میں وہ نہیں جو اندر خانے اسٹیبلشمنٹ کے پیر پڑے اور باہر آکر برا بھلا کہے ۔ تحریک انصاف میں بھی بہت اچھے لوگ ہیں، تحریک انصاف اگر اپنا قبلہ درست کرے تو بہتر ہوگا، بیگم اور ان کے حواریوں سے بانی تحریک انصاف کی جان بچانی ہے ، آج کہیں سب سے زیادہ مخلص کوئی عمران خان کے ساتھ ہے وہ ان کی بہنیں ہیں۔ پی ٹی آئی نے سول نافرمانی کی کال دی ہے ، 14 تاریخ فیض حمید کی پروسیڈنگ پر پریشر ڈالنے کیلئے مقرر کی لیکن یہ پروسیڈنگ اس سے پہلے شروع ہو جائیگی، اسٹیبلشمنٹ کوئی سودا نہیں کررہی، حکومت کے پاس جاؤں گا کہ وہ فیملی کارپوریشن کی طرح حکومت نہ چلائے ۔