چین سے کینسر کا جدید طریقہ علاج اور مشینری لانے پر اتفاق: ہیلتھ سسٹم کو مریض دوست بنائینگے: مریم نواز
لاہور(دنیا نیوز)وزیر اعلیٰ مریم نوازشریف نے دورہ چین کے پہلے روزبیجنگ میں مصروفیت سے بھرپوردن گزارا،وزیراعلی مریم نوازشریف نے ایک ہی دن میں 5وزٹ اور5ملاقاتیں کیں،3ایم او یو پر دستخط بھی کئے گئے۔
وزیراعلیٰ نے ہائی جیا میڈیکل ٹیکنالوجی اور شی جی تان ہسپتال کے دورے کئے ،انہوں نے بیجنگ میونسپل کمیشن آف ٹرانسپورٹ کا دورہ بھی کیا۔ وزیراعلیٰ نے پنجاب میں کینسر کے علاج کی جدید ترین ٹیکنالوجی متعارف کرانے کا فیصلہ کیا ہے ،اس ضمن میں چین سے کینسر کا جدید طریقہ علاج اور مشینری لانے پر اتفاق کیاگیا،جس سے سرجری اور کیمو تھراپی کے بغیر کینسر کا علاج ممکن ہو سکے گا۔ مریم نواز نے ہائی جیا میڈیکل ٹیکنالوجی کے صدر ڈاکٹر لیو فولیانگ سے ملاقات کی ،جس میں اس حوالے سے امورطے پاگئے اورہائی جیا میڈیکل ٹیکنالوجی سے ایم او یو پر دستخط کئے گئے جبکہ سی جی تان ہسپتال کیساتھ ٹیلی میڈیسن لنک قائم کرنے کی تجویز کا جائزہ لیاگیا۔وزیراعلیٰ کاکہناتھاکہ پنجاب میں ہیلتھ سسٹم کو جدید ٹیکنالوجی کی مدد سے پیشنٹ فرینڈلی اور موثر بنانا چاہتے ہیں ۔قبل ازیں وزیراعلیٰ نے سب سے پہلے روبوٹک زرعی آلات بنانے والی کمپنی اے آئی فور س ٹیک ہیڈ آفس کا دورہ کیا،چینی کمپنی پنجاب میں روبوٹک زرعی آلات مینوفیکچرنگ پلانٹ لگائے گی،مریم نوازشریف کی موجودگی میں محکمہ زراعت حکومت پنجاب اور اے آئی فورس ٹیک کے درمیان ایم او یو پر دستخط کردئیے گئے ۔
وزیر اعلیٰ نے پنجاب میں جدید روبوٹک زرعی مشینری مینوفیکچرنگ کیلئے تعاون کی یقین دہانی کرائی،ان سے اے آئی فور س ٹیک کے بانی ڈاکٹرہان اور سی ای اونے ملاقات کی ۔ مریم نوازکاکہناتھاکہ پنجاب میں زراعت کی جدید ٹیکنالوجی اپنا کر کاشتکار کو خوشحال بنانا ہمارا عزم ہے ،وزیراعلیٰ کی دعوت پر اے آئی فور س ٹیک کے ماہرین پنجاب میں روبوٹک زرعی آلات کا مینوفیکچرنگ پلانٹ لگا نے کے لئے جلد دورہ کرینگے ۔انہوں نے بلیو ٹیک کلین ایئر الائنس ڈیپارٹمنٹ کا دورہ کیا چیئرمین زی ہونگ شنگ سے ملاقات کی،ملاقات میں موسمیاتی تبدیلی کی وجہ سے فضائی آلودگی کے سدباب کے جدید ترین طریقہ کار پر گفتگو کی گئی۔ اس موقع پرمحکمہ ماحولیات حکومت پنجاب اور بلیو ٹیک کلین ایئر الائنس کے درمیان ایم او یو پر دستخط ہوئے ، بلیو ٹیک کلین ایئر الائنس پنجاب میں ماحولیاتی بہتری کے لئے اشتراک کار کر ے گا۔ مریم نواز نے بیجنگ میں میونسپل کمیشن آف ٹرانسپورٹ کا بھی دورہ کیا، ڈپٹی ڈائریکٹر جنرل شانگ وانگ یو نے تفصیلی بریفنگ دی ۔وزیراعلی ٰ نے کہاکہ لاہور اور دیگر شہروں میں میٹرو ٹرین نیٹ ورک کو بڑھائیں گے ،پنجاب کے بڑے شہروں میں ماحول دوست پبلک ٹرانسپورٹ سسٹم کے قیام کے لئے پرعزم ہیں، لاہور میں اورنج لائن اور میٹر وبس پاک چین دوستی کا چلتا پھرتا ثبوت ہے ۔ لاہور،ملتا ن، اسلام آباداورراولپنڈی میں میٹر وبس سسٹم کیلئے چینی تعاون ناقابل فراموش ہے ۔
