دور دراز اضلاع کے دوروں کا آغاز گوادر میں پہلا اجلاس: عدلیہ کا وقار مجروع نہیں ہونے دینگے: چیف جسٹس
اسلام آباد(کورٹ رپورٹر)چیف جسٹس پاکستان جسٹس یحیی آفریدی انصاف کی جلد فراہمی کے مشن پر نکل پڑے، دور دراز اضلاع کے دورے کرینگے، گوادر کے پہلے دورے کے دوران جیل ریفارمز سے متعلق ذیلی کمیٹی تشکیل دے دی۔ ذیلی کمیٹی اصلاحات کا جامع پیکیج پیش کرے گی۔
تفصیلات کے مطابق چیف جسٹس یحیی آفریدی نے گوادر بلوچستان کا پہلا سرکاری دورہ کیا، سپریم کورٹ کے اعلامیے کے مطابق انصاف کی جلد فراہمی کو یقینی بنانے کیلئے چیف جسٹس یحیی آفریدی نے دور دراز اضلاع کے دوروں کا فیصلہ کیا ہے ، ضلعی عدلیہ کو بہتر بنانے اور درپیش چیلنجز سے نمٹنے کیلئے چیف جسٹس ذاتی دورے کریں گے اور موقع پر پہنچ کر مسائل کا تدارک کریں گے ،گزشتہ روز چیف جسٹس نے گوادر کا دورہ کیا، تربت، پنجگور ، چاغی اور دیگر اضلاع کے ڈسٹرکٹ اینڈ سیشن ججز نے چیف جسٹس سے ملاقات کی، ملاقات میں چیف جسٹس نے مسائل کے حل کی یقین دہانی کرائی، چیف جسٹس یحیی آفریدی نے عدالتی افسروں کے وقار کو مقدم رکھنے کا عزم کیا اور کہا پورے ملک کی عدلیہ کا وقار مجروح نہیں ہونے دیں گے ، دور دراز علاقوں کی عدلیہ خصوصی توجہ کی متقاضی ہے ۔ چیف جسٹس نے متعلقہ ہائیکورٹس کو دور دراز کی ضلعی عدلیہ پر توجہ مرکوز کرنے کی ہدایت کی۔ عدالتی اصلاحات پر چیف جسٹس یحیی آفریدی کی زیر صدارت گوادر میں اجلاس میں اصلاحی نظام سے متعلق اہم امور پر غور کیا گیا اور بلوچستان کیلئے ذیلی کمیٹی کے قیام کی منظوری دی گئی،ذیلی کمیٹی مختلف جیلوں کا دورہ کرے گی، کمیٹی نظام کو بہتر بنانے کے مقصد سے اصلاحات کا ایک جامع پیکیج پیش کرے گی، اجلاس میں چیف جسٹس بلوچستان ہائیکورٹ جسٹس ہاشم خان کاکڑ بھی شریک ہوئے ۔ مانیٹرنگ جج برائے جیل خانہ جات جسٹس عبداللہ بلوچ نے بھی اجلاس میں شرکت کی۔
