اسرائیلی اقدامات غیر مستحکم خطے کیلئے خطرناک پیشرفت : دفتر خارجہ
اسلام آباد ( مانیٹرنگ ڈیسک ، نیوز ایجنسیاں ) پاکستان نے شام پر اسرائیلی جارحیت کی شدید الفاظ میں مذمت کرتے ہوئے اسے بین الاقوامی قانون کی سنگین خلاف ورزی قرار دے دیا۔ترجمان دفتر خارجہ نے اپنے بیان میں کہا کہ پاکستان شام پر اسرائیلی جارحیت کی شدید مذمت کرتا ہے۔
پاکستان شامی سرزمین پر اسرائیل کے غیر قانونی قبضے کی سخت ترین الفاظ میں مذمت کرتا ہے ۔دفتر خارجہ نے کہا کہ شام کی خودمختاری اور علاقائی سا لمیت پر حملہ بین الاقوامی قانون کی سنگین خلاف ورزی ہے ، اسرائیل کے اشتعال انگیز اقدامات پہلے سے ہی غیر مستحکم خطے میں خطرناک پیش رفت ہے ۔دفتر خارجہ نے کہا کہ اسرائیل نے بین الاقوامی قوانین اور سلامتی کونسل کی قراردادوں کی خلاف ورزی جاری رکھی ہوئی ہے ، پاکستان شام کی خودمختاری اور علاقائی سالمیت کی مکمل حمایت کا اظہار کرتا ہے ۔ترجمان نے کہا کہ پاکستان اسرائیل کی جانب سے طاقت کے ذریعے علاقے کے حصول کو مسترد کرتا ہے ، ہم اقوام متحدہ کی سلامتی کونسل کی قرارداد 497 کے لیے اپنی حمایت کا اعادہ کرتے ہیں۔ترجمان نے کہا کہ سلامتی کونسل کی قرارداد گولان کی پہاڑیوں پر اسرائیل کے الحاق کو مستردکرتی ہے ، سلامتی کونسل اور عالمی برادری اسرائیل کی خطے کے ممالک کے خلاف جارحیت کے خاتمے کے لئے فیصلہ کن اقدامات کرے ،پاکستان نے واضح کیا کہ مقبوضہ فلسطین اور شام کے گولان سمیت دیگر مقبوضہ علاقوں سے اسرائیل کے مکمل انخلا کے بغیر مشرق وسطیٰ میں امن قائم نہیں ہو سکتا۔
