مولوی نے دوکشتیوں پر پائوں رکھا اور دریاپار :فضل الرحمن

 مولوی نے دوکشتیوں پر پائوں رکھا اور دریاپار :فضل الرحمن

ملتان ( کرائم رپورٹر)قائد جمعیت علما اسلام مولانا فضل الرحمن نے کہا ملکی سیاست اسلامی اصولوں پر نہیں توکیاجدوجہد چھوڑ دیں؟،مسلم حکمرانوں سے اسلام کے نفاذ کا تقاضا کرنا سب سے مشکل کام،سیاست میں نہ آتا تو عقیدہ ختم نبوت کی جنگ لڑنا ناممکن ہوتا،پہلی بار حکومت، اپوزیشن ہمارے قصیدے پڑھ رہے تھے۔

 مولوی نے دوکشتیوں پر پائوں رکھا اور دریاپار ہوگیا، ان خیالات کا اظہار انہوں نے ملتان کے \" خیرالمدارس \" میں ختم بخاری کی تقریب سے خطاب کرتے ہوئے کیا۔ فضل الرحمن نے مزیدکہا کہ ہم نے پہلی بار دیکھا حکمران اور حزب اختلاف ہمارے قصیدے پڑھ رہے تھے ، اسی لیے ایسے مواقع پر فائدہ اٹھاتے ہیں،عقیدہ ختم نبوت کی جنگ لڑنا ممکن نہ ہوتا اگر میں سیاست میں نہ جاتا۔قومی اسمبلی میں تعداد میں کم ہونے کے باوجود ہم نے جدوجہد نہیں چھوڑی۔ عقل ، اللہ کی اعلیٰ نعمت ہے ،دنیا اس عقل کی روشنی کو مٹانا چاہتی ہے ،ہماری زیادہ تر مصروفیات ا س ملک کی سیاست میں ہوتی ہے ،ہمارا روزانہ سیاست دانوں سے پالا پڑتا ہے ،ہم پر تو بہت سے سوالات اٹھتے ہیں،ہم نے سیاست سے کیا حاصل کیا پر یہ سب فضول سوالات ہیں جبکہ سیاست دان سے کچھ بھی منوانا مشکل نہیں ہے ۔ انسان عقل سے بات سمجھتا ہے ، انسانوں کے معاشرے میں اللہ نے انبیاء کو چنا، مدارس میں علوم کی حفاظت ہوتی ہے ، جمعیت علما اسلام قومی اسمبلی میں آٹھ ممبران کے ساتھ ہے ، تعداد میں کم ہونے کے باوجود ہم نے جدوجہد نہیں چھوڑی، اللہ نے ہم پر جدوجہد لازم قرار دی ہے ، نتیجہ اللہ کے ہاتھ میں ہے ۔سربراہ جمعیت علما اسلام کا مزید کہنا تھا کہ ہمارے اکابرین نے ہمیں مدارس کی سیاست کا راستہ بتایا، ہم اپنے اکابرین کے بتائے گئے راستے پر چل کر کامیاب ہوں گے ۔

روزنامہ دنیا ایپ انسٹال کریں