پختونخوا میں فورسز کے آپریشن،8خوارج ہلاک،اسلحہ ،بارو دبر آمد
اسلام آباد،راولپنڈی (خصوصی نیوز رپورٹر، دنیا نیوز)خیبرپختونخوا میں سکیورٹی فورسز کے دو الگ الگ آپریشنز میں 8 خوارج ہلاک ہوگئے ۔
پاک فوج کے شعبہ تعلقات عامہ (آئی ایس پی آر)کے مطابق 12 اور 13جنوری کو خیبرپختونخوا میں فورسز نے دو کارروائیاں کیں۔ ضلع ٹانک میں خوارج کی موجودگی کی اطلاع پر انٹیلی جنس بیسڈ آپریشن کیا ،خوارج کے ٹھکانے کو مؤثر طریقے سے تلاش کیا گیا، آپریشن میں 6 خوارج ہلا ک ہوگئے ۔ ضلع خیبر کے علاقے وادی تیراہ میں کارروائی کے دوران دوخوارج مارے گئے ، ہلاک ہونے والے خوارج سے اسلحہ، گولیاں،بارود و دیگر سامان برآمد کر لیا گیا ۔ علاقے میں کسی اور خارجی کی موجودگی کو ختم کرنے کیلئے کلیئرنس کی کارروائیاں کی جا رہی ہیں، سکیورٹی فورسز ملک سے دہشتگردی کی لعنت کو ختم کرنے کیلئے پرعزم ہیں۔صدر آصف زرداری نے خیبر پختونخوا میں 8 خوارج ہلاک کرنے پر فورسز کو خراج تحسین پیش کیا اور کہا ہے کہ فتنہ الخوارج کے مکمل خاتمے کیلئے پوری قوم اپنی بہادر سکیورٹی فورسز کے ساتھ کھڑی ہے ۔وزیراعظم شہباز شریف نے ضلع ٹانک اور وادی تیراہ میں دہشتگردوں کیخلاف آپریشن میں 8 خوارج کی ہلاکت پر بیان میں کہا دہشتگردوں کے مذموم عزائم کو اسی طرح خاک میں ملاتے رہیں گے ،قوم کو سکیورٹی فورسز کے نڈر نوجوانوں پر فخر ہے ۔ حکومت اور سکیورٹی فورسز ملک سے دہشتگردی کے مکمل سد باب کیلئے متحرک ہیں ۔
