جاپانی سرمایہ کاروں کو پنجاب میں ہر ممکن سہولت اور تحفظ دینگے:مریم نواز

جاپانی سرمایہ کاروں کو پنجاب میں ہر ممکن سہولت اور تحفظ دینگے:مریم نواز

لاہور(دنیانیوز)وزیرِ اعلیٰ پنجاب مریم نواز شریف نے کہاہے کہ جاپانی سرمایہ کاروں کے لئے پنجاب میں ہر ممکن سہولت اور تحفظ فراہم کیا جائے گا۔ زراعت، معدنیات، آئی ٹی، اے آئی، روبوٹکس اور توانائی کے شعبوں میں جاپان کے ساتھ تعاون چاہتے ہیں۔

وزیراعلیٰ سے گزشتہ روز جاپان کے سفیر اکاماتسو شوئیچی نے ملاقات کی اورمریم نواز شریف کو دورہ جاپان کی دعوتِ دی،وزیر اعلیٰ مریم نواز شریف نے دورہ جاپان کی دعوت قبول کرلی۔دونوں نے ملاقات میں باہمی تعلقات، تجارتی تعاون اور مختلف شعبوں میں سرمایہ کاری کے فروغ پر زور دیا اوردونوں ممالک کے درمیان اقتصادی تعاون کو بڑھانے کے لئے نئے راستے تلاش کرنے کی ضرورت پر اتفاق کیاگیا۔مریم نواز شریف نے 2022 کے سیلاب کے دوران جاپان کی معاونت پر اظہار تشکر کیا اورکہاکہ پاکستان جاپان کے ساتھ تعلقات کو اہمیت دیتا ہے ،دونوں ممالک کے درمیان گہرے دوستانہ تعلقات موجود ہیں، جاپان نے ہمیشہ مشکل وقت میں پاکستان کا ساتھ دیا، جاپانی حکومت اور عوام کے شکرگزار ہیں۔ جاپانی سفیر نے وزیرِ اعلیٰ مریم نواز شریف کے ترقیاتی منصوبوں اور عوامی فلاح کے اقدامات کو سراہا۔جاپان کے سفیر نے محمد نواز شریف اور محمد شہباز شریف کے عوامی وفلاحی ایجنڈے کو آگے بڑھانے پر وزیراعلیٰ پنجاب کی کاوشوں کو بھی سراہا۔

روزنامہ دنیا ایپ انسٹال کریں