2024:پنجاب کی عدالتوں میں 38 لاکھ مقدمات کے فیصلے
لاہور(کورٹ رپوٹر،اے پی پی)چیف جسٹس لاہور ہائیکورٹ جسٹس عالیہ نیلم کی زیرِ صدارت فل کورٹ اجلاس مرکزی لائبریری ہال میں ہوا، جسٹس علی باقر نجفی، جسٹس عابد عزیز شیخ، جسٹس صداقت علی خان، جسٹس شہباز رضوی اور جسٹس فیصل زمان خان ودیگر جج شریک ہوئے ۔
رجسٹرار لاہور ہائی کورٹ عبہر گل خان بھی موجود تھیں۔ اجلاس میں لاہور ہائیکورٹ، لاہور پرنسپل سیٹ و ملتان، بہاولپور اور راولپنڈی بنچزاور صوبہ بھر کی ضلعی عدلیہ میں زیر التوامقدمات خصوصاً پرانے کیسز کو جلد نمٹانے کیلئے متعدد تجاویز دی گئیں جنکی روشنی میں مربوط پالیسی بنانے کا فیصلہ کیا گیا تاکہ زیر التوا مقدمات میں کمی اور جلد و معیاری انصاف کی فراہمی کو یقینی بنایا جا سکے ۔ اجلاس میں لاہور ہائیکورٹ اورضلعی عدلیہ میں مقدمات بارے تفصیلی رپورٹ پیش کی گئی جسکے مطابق 2024 کے دوران عدالت عالیہ اور پنجاب بھر کی ضلعی عدلیہ میں 38 لاکھ سے زائد مقدمات کے فیصلے کئے گئے ۔ اعدادو شمار کے مطابق لاہور ہائیکورٹ پرنسپل سیٹ اور بینچز پر 1 لاکھ48 ہزار453 کیس دائر کئے گئے جبکہ 1 لاکھ44 ہزار122 کے فیصلے کئے گئے ۔ صوبہ بھر کی ضلعی عدالتوں میں 2024 کے دوران 37 لاکھ 89 ہزار639 نئے مقدمات دائر ہوئے جبکہ 36 لاکھ57 ہزار 102 کے فیصلے ہوئے ۔ اجلاس میں بتایاگیا کہ لاہور ہائیکورٹ اور علاقائی بینچز میں زیرالتوا مقدمات کی تعداد 1 لاکھ 98 ہزار ہے جبکہ ضلعی عدلیہ میں 14 لاکھ94 ہزار868 مقدمات زیر التوا ہیں۔
