عمران نے کہا مجھے سزا اس لیے سنائی گئی کہ کوئی ڈیل کرلوں: علیمہ خان

راولپنڈی( خبر نگار ، نیوز ایجنسیاں )تحریک انصاف کے بانی عمران خان نے کہا ہے کہ مجھے سزا اس لیے سنائی گئی کہ کوئی ڈیل کرلوں۔
اڈیالہ جیل کے باہر میڈیا سے گفتگو کرتے ہوئے بانی پی ٹی آئی کی بہن علیمہ خان نے بتایا کہ عمران خان کا کہنا ہے کہ کوئی ڈیل نہیں کررہا ہے ۔ جتنی دیر جیل میں رکھنا ہے جتنے مرضی ایسے ججز لا کر بٹھا دیں میں ڈیل نہیں کروں گا مقدمات کا سامنا کروں گا۔ اس فیصلے کا مذاکراتی کمیٹی سے کوئی تعلق نہیں ۔علیمہ خان کا کہنا تھا کہ بانی پی ٹی آئی چاہتے تھے کہ یہ کیس ہائی کورٹ میں جائے اور اب یہ کیس ہائی کورٹ میں جائے گا۔ انہوں نے 2 مطالبات پر بات کرنے کو کہا ہے۔ بشریٰ بی بی کو سہولت کاری پر 7 سال کی سزا سنائی گئی۔ یہ بھی تو بتائیں کہ یہ کون سی سہولت کاری ہے ۔ اس کیس میں زرداری اور نواز شریف نہیں لیکن بانی اور بشریٰ کو سزا دے دی گئی۔علیمہ خان نے مزید کہا کہ ہائیکورٹ میں جاکر یہ سارا کیس مزید کھلے گا اور یہ سارے نام آپ پھر سے سنیں گے۔