لوگوں کی مشکلات میں کمی آرہی: نواز شریف، کارکردگی پر سب سے بڑا چیک عوام: وزیراعلیٰ مریم

لاہور(دنیا نیوز،خبر ایجنسیاں)مسلم لیگ (ن)کے صدر نواز شریف اور وزیراعلیٰ پنجاب مریم نواز سے راولپنڈی، اٹک، مری، چکوال، وزیرآباد، حافظ آباد اور منڈی بہاؤ الدین سے پنجاب اسمبلی کے ارکان نے ملاقات کی۔
ملاقات میں ملک کی مجموعی صورتحال، عوام کے مسائل اور حلقوں میں ترقیاتی کاموں پرتبادلہ خیال کیا گیا۔ نوازشریف نے ارکان اسمبلی سے گفتگو کرتے ہوئے کہا آپ سب میری طاقت اور عزت ہیں۔ الحمدللہ! لوگوں کی مشکلات میں کمی آ رہی ہے ۔ مریم نواز کی محنت سے پنجاب میں بہتری نظر آ رہی ہے ۔ وزیراعلیٰ مریم نواز نے گفتگو کرتے ہوئے کہا پنجاب واحد صوبہ ہے جہاں روٹی 12سے 14روپے میں مل رہی ہے ۔ہماری کارکردگی پر سب سے بڑا چیک عوام اور نوازشریف ہیں۔ وزیراعلیٰ نے راولپنڈی رنگ روڈ دسمبر تک مکمل کرنے ،راولپنڈی اور گوجرانوالہ ڈویژن کے ترقیاتی منصوبے بروقت مکمل کرنے کی ہدایت کی۔ ارکان اسمبلی نے وزیراعلیٰ مریم نواز کو صوبے میں بہترین کارکردگی پر خراج تحسین پیش کرتے ہوئے کہا مریم نواز نے نواز شریف اور شہباز شریف کے دور اور کارکردگی کی یاد تازہ کر دی سیاسی تعصبات سے پاک شفافیت اور میرٹ پر ترقیاتی کاموں کی تکمیل خوش آئند اور مثبت سیاسی روایت ہے۔ کسان کارڈ کی وجہ سے آڑھتیوں سے چھٹکارا ملنے پر کاشتکار خوشحال ہوا۔اجتماعی شادیوں کے دھی رانی پروگرامکو عوام میں بہت پذیرائی ملی ہے۔