فیصل مسجدمیں دہشتگردی کاخطرہ، امریکی سفارتخانے کااپنے شہریوں کوانتباہ
اسلام آباد (لیڈی رپورٹر )کالعدم تحریک طالبان پاکستان کی جانب سے فیصل مسجد کی ویڈیو جاری کرنے پر امریکی سفارتخانے نے اپنے عملے اور امریکی شہریوں کو انتباہ کر دیا ہے۔
اس معاملے کے پیش نظر امریکی سفارتخانے نے سکیورٹی الرٹ جاری کیا ہے جس میں بتایا گیا ہے کہ کالعدم ٹی ٹی پی کی جانب سے فیصل مسجد پر دہشتگردانہ کارروائی کی دھمکی دی گئی ہے اور ٹی ٹی پی کی طرف سے فیصل مسجد پر دہشت گرد کارروائی کا خدشہ ہے ، خطرات کے پیش نظر امریکی شہری ان مقامات سے دور رہیں۔سفارتخانے کا عملہ اور امریکی شہری اپنے ذاتی سکیورٹی عملے پربھی نظر رکھیں، الرٹ میں شہریوں کو بتایا گیا ہے کہ امریکی شہری کسی بھی قسم کی اپڈیٹس کے لیے مقامی میڈیا مانیٹر کریں اور نقل و حمل کرتے ہوئے اپنی شناختی دستاویزات ہمراہ رکھیں۔ امریکی سفارتخانے کی جانب سے شہریوں کیلئے خصوصی رابطہ نمبر بھی جاری کیے گئے ہیں تاکہ کسی بھی ناگہانی صورت میں رابطے کیا جاسکے ۔
