لیپ ٹاپ سکیم انقلابی قدم، آئی ٹی سٹی میں ٹوئن ٹاور اسی سال مکمل ہونگے : مریم نواز
لاہور(دنیا نیوز،اے پی پی)وزیراعلیٰ پنجاب مریم نواز شریف نے کہا ہے پنجاب کے نوجوانوں کو جدید دنیا کے تقاضوں سے ہم آہنگ کرنے کے لئے ممکنہ مواقع فراہم کررہے ہیں۔ سی ایم لیپ ٹاپ سکیم پنجاب کے طلبہ کے لئے انقلابی قدم ثابت ہوگا۔
وزیراعلیٰ نے ڈیجیٹل لرننگ ڈے پر اپنے پیغام میں کہا ڈیجیٹل لرننگ کے دور میں ترقی ٹیکنالوجی اور جدید تعلیم سے مشروط ہے۔ انہوں نے کہا نوجوانوں کو مصنوعی ذہانت (AI)، سافٹ ویئر ڈیویلپمنٹ اور فری لانسنگ جیسے کورسز کے مواقع دے رہے ہیں۔وزیراعلیٰ نے کہا لاہور میں پاکستان کا پہلا منفرد نواز شریف آئی ٹی سٹی بنا رہے ہیں۔ آئی ٹی سٹی میں ٹوئن ٹاور اسی سال مکمل کر لئے جائیں گے ۔ پلگ اینڈ پلے کال سینٹر حب بھی قائم ہوگا۔علاوہ ازیں وزیراعلیٰ مریم کا کہنا ہے خواتین اور بچے ریڈ لائن ہیں کسی سطح پر کسی قسم کا تشدد قابل برداشت نہیں۔بسوں میں سفر کرنے والی خواتین کی حفاظت اور احترام ہر صورت یقینی بنایا جائے گا۔ وزیراعلیٰ نے کہا دیہی خواتین کے لئے مخصوص بس سروس کے اجرا کے لئے اقدامات کیے جارہے ہیں۔وزیراعلیٰ کے ویژن کے تحت سرگودھا میں بے کس خواتین پر تشدد میں ملوث بس ڈرائیور اور کنڈیکٹر کوگرفتارکر لیا گیا۔ جھاوریاں کے دیہی علاقے میں بس ڈرائیور اور کنڈیکٹرنے کرایہ کے تنازع پر خواتین سے جھگڑا کیا۔بس ڈرائیور شوکت اور کنڈیکٹر شمشیر نے خواتین کو وحشیانہ تشدد کا نشانہ بنایا تھا۔ ڈی پی او سرگودھا کی نگرانی میں ملزموں کے خلاف قانونی کارروائی کا آغازکر دیا گیا ۔وزیراعلیٰ نے شاہدرہ میں ڈور پھرنے سے بچی کے زخمی ہونے کے واقعہ کا نوٹس لیتے ہوئے واقعہ پر برہمی کا اظہار کیا ہے ۔ انہوں نے سی سی پی او لاہور سے رپورٹ طلب کر لی ۔وزیراعلیٰ نے زخمی بچی کو علاج کی بہترین سہولت فراہم کرنے کا حکم دیا ہے۔
