مہاجرین سیٹوں کا خاتمہ کشمیریوں کی تقسیم کے مترادف:دانیال عزیز
اسلام آباد(اپنے رپورٹرسے )سابق وفاقی وزیردانیال عزیز نے آزاد کشمیر قانون ساز اسمبلی میں پاکستان میں مقیم مہاجرین کی نشستوں کے خاتمے کی مخالفت کر دی اور کہا عوامی ایکشن کمیٹی مہاجرین سے انکی شناخت چھیننے کی کوشش نہ کرے۔
اشرافیہ نے پاکستان کا بیڑا غرق کیا انکی مراعات کے خاتمے کے حق میں ہوں۔ نیشنل پریس کلب پر پولیس گردی کی شدید مذمت کرتا ہوں۔ ان خیالات کا اظہارانہوں نے نیشنل پریس کلب اسلام آباد میں پریس کانفرنس کرتے ہو ئے کیا۔ دانیال عزیز کا کہنا تھا کہ کشمیری مہاجرین ستائے ہوئے لوگ ہیں، ان کی نشستیں ختم کرنا کشمیریوں کو تقسیم کرنے کے مترادف ہے ، پی ٹی آئی آزاد کشمیر نے عوامی ایکشن کمیٹی کے اس مطالبے کی حمایت کی ہے جبکہ مسلم لیگ(ن)اور پیپلز پارٹی سپریم کورٹ میں ان نشستوں کو برقرار رکھنے کیلئے لکھ کر دے چکے ہیں۔ انہوں نے کہا عوامی ایکشن کمیٹی کو اپنے اس مطالبے پر نظر ثانی، پی ٹی آئی کو اپنا رویہ تبدیل کرنے ، مسلم لیگ(ن)اور پیپلز پارٹی کو اپنے وعدے کی پاسداری کرنے کی ضرورت ہے ، بھارت نے مقبوضہ کشمیر کی خصوصی آئینی حیثیت کے خاتمے کے بعد وہاں پر مہاجرین کیلئے مخصوص 24 نشتیں بحال کی ہیں اور ہم یہاں پر الٹی طرف جا رہے ہیں، مہاجرین کی نشستوں پر کامیاب ہونے والے اراکین کے فنڈز اور دیگر مراعات معطل کرنا اس بات کا اشارہ ہے کہ حکومت نے انہیں سنے بغیر ہی عوامی ایکشن کمیٹی کا مطالبہ تسلیم کر لیا ہے ۔
