پیرول پر رہا کریں ،افغانستان کا معاملہ امن کیلئے حل کرونگا :عمران خان
جمعہ کو کے پی کے میں احتجاج کی کال دیدی ،علیمہ اور نورین کی میڈیا سے گفتگو
راولپنڈی (خبرنگار)بانی پی ٹی آئی عمران خان نے کہاہے کہ مجھے پیرول پررہاکریں توپاکستان اور افغانستان میں امن قائم کروا سکتاہوں۔انکا یہ پیغام انکی بہنوں نے اڈیالہ جیل میں ملاقات کے بعد میڈیا سے گفتگو کرتے ہوئے دیا ۔ علیمہ خان نے کہا کہ ہماری نظر میں توشہ خانہ ٹو کیس میں بانی اور بشریٰ بی بی بے گناہ ثابت ہوچکے ہیں ،ہمارا خیال ہے جج صاحب اب اس کیس میں فیصلہ سنانے جارہے ہیں۔22 نومبر 2024 کو ہم نے احتجاج سے متعلق بانی کا پیغام دیا تھا اس پر اے ٹی سی پنڈی نے میرے اوپر فرد جرم عائد کردی ہے ۔فرد جرم پر نہ میرے دستخط ہیں نہ میرا انگوٹھا ،ہم عدالت سے درخواست کرینگے کہ اس پر نظر ثانی کریں۔نورین نیازی نے کہا کہ بانی نے لاہور میں قتل عام کی مذمت کی ہے ،بانی نے کہاکہ آئی جی اسلام آباد اور محسن نقوی کے خلاف تحقیقات کی جائیں۔بانی نے کے پی میں جمعہ کو احتجاج کی کال دی ہے ،انکا کہناتھاکہ ہم اپنے ہی ملک میں غیر محفوظ ہوگئے ہیں، افغانستان ہمارا ہمسایہ ملک ہے ،افغانوں کو تین نسلوں کے بعد پاکستان سے واپس بھیجا گیا ہے ۔ بانی نے آفر کی ہے انہیں پیرول پر رہا کیا جائے وہ امن کیلئے افغانستان سے بات چیت کرکے مسئلہ حل کرکے دینگے ۔
