مریم نوازسب سے زیادہ منصوبے مکمل کرنیوالی وزیر اعلیٰ: عظمیٰ
پنجاب میں الیکٹرک بسوں کا فیز ٹو شروع کیا جا رہا ،200 نئی بسیں فراہم ہوں گی کاش کوئی ایسی عینک ہوجو کے پی کے حکمرانوں کو صورتحال دکھا سکے ، پریس کانفرنس
لاہور (سٹاف رپورٹر )وزیر اطلاعات و ثقافت پنجاب عظمٰی بخاری نے کہا ہے کہ وزیراعلیٰ پنجاب مریم نواز صوبے کی تاریخ کی سب سے زیادہ منصوبے شروع اور مکمل کرنے والی وزیر اعلیٰ ہیں۔ انہوں نے کہا کہ پنجاب حکومت کے تمام منصوبے شفافیت، میرٹ اور عوامی خدمت کا مظہر ہیں،جن پر کرپشن کا کوئی داغ نہیں۔کسان کارڈ پروگرام کے تحت 10لاکھ سے زائد کسانوں میں 100ارب روپے تقسیم کیے گئے ۔وزیر اطلاعات نے بتایا کہ وزیراعلیٰ مریم نواز کے 16 فلاحی اور ترقیاتی منصوبوں سے متعلق عوام کو آگاہ کرنے کا فیصلہ کیا گیا ہے تاکہ عوام جان سکیں کہ ان کے ٹیکس کا پیسہ کہاں لگ رہا ہے ۔ان خیالات کا اظہار انہوں نے الحمرا ہال میں پریس کانفرنس کرتے ہوئے کیا۔ عظمٰی بخاری نے بتایا کہ پنجاب میں ‘ستھرا پنجاب’ پروگرام کے تحت ایک لاکھ 40 ہزار ورکرز اور دو ہزار افسر صفائی کے نظام میں مصروف ہیں۔ اب تک 94 لاکھ ٹن سے زائد ویسٹ ٹھکانے لگایا جا چکا ہے۔
انہوں نے کہا کہ پنجاب میں الیکٹرک بسوں کا فیز ٹو شروع کیا جا رہا ہے ، جس کے تحت 200 نئی بسیں فراہم ہوں گی، جبکہ دسمبر تک 1100 الیکٹرک بسیں 42 شہروں میں چلائی جائیں گی۔وزیر اطلاعات نے اپنا گھر اپنی چھت پروگرام کو مریم نواز کا فخر قرار دیا اور بتایا کہ 1 لاکھ 4 ہزار 800 خاندانوں کو قرضے دئیے جا چکے ہیں، 30 ہزار گھر مکمل ہو چکے اور 90 فیصد تعمیرات آخری مراحل میں ہیں۔انہوں نے کہا کہ صحت کارڈ اب سرکاری ہسپتالوں میں ضروری نہیں، علاج مکمل طور پر فری ہے ، جبکہ کینسر ہسپتال اگلے ماہ مکمل ہو کر ایمرجنسی خدمات کا آغاز کرے گا۔عظمٰی بخاری نے بتایا کہ بلاسود ای بائیکس سکیم کے تحت 27 ہزار طلبہ و طالبات کو بائیکس فراہم کی جا چکی ہیں، جن میں 8200 الیکٹرک بائیکس طالبات کے پاس ہیں، جبکہ یتیم بچوں کے لیے خصوصی ای بائیکس سکیم مریم نواز نے متعارف کروائی ہے ۔انہوں نے کہا کہ کاش کوئی ایسی عینک بن جائے جو کے پی کے حکمرانوں کو محرومیاں، خراب سڑکیں، خالی سکول اور بگڑتی امن و امان کی صورتحال دکھا سکے ، اگر ایسی عینک بنانے میں مدد چاہیے تو پنجاب حکومت تیار ہے ۔ایک سوال کے جواب میں وزیر اطلاعات پنجاب نے واضح کیا کہ وزیراعلیٰ مریم نواز اور حمزہ شہباز کا نام لے کر جھوٹا پروپیگنڈا کرنے والے تیار ہوجائیں، معاملہ ہتکِ عزت کی عدالت میں لے کر جا رہے ہیں۔
