خوشگوار زندگی گزاریں ۔۔۔یہ اصول اپنائیں
صحت مند ذہن اور جسم سے ہی صحت مند زندگی جنم لیتی ہے۔ لہٰذا جسمانی، ذہنی اور سماجی، تینوں طرح کی صحت برابر اہمیت کی حامل ہے۔ آج کی خواتین کو مختلف سماجی کردار نبھانے پڑتے ہیں۔ اس لیے انہیں اکثر کام اور خاندان کے حوالے سے دباؤ کا سامنا رہتا ہے۔ ان میں سے ہر کردار کی ذمہ داریاں نبھانا اور اس کے ساتھ صحت مند زندگی گزارنا آسان کام نہیں۔ خواتین کو اپنی ذہنی صحت کے ساتھ جسمانی صحت پر بھی توجہ دینی چاہیے تاکہ وہ اچھی صحت اور خوشی سے بھرپور زندگی گزار سکیں۔
اچھی ذہنی صحت کیا ہے؟
اچھی ذہنی صحت کی حامل خواتین چُست اور بااعتماد ہوتی ہیں۔ وہ منفی جذبات ( ذہنی اضطراب، ڈپریشن، غصہ، ناراضگی، نفرت اور حسد) یا پریشان کرنیوالے احساسات کو خاطر میں نہیں لاتیں۔ زندگی کو بامقصد اور خوبصورت سمجھتی ہیں اور مسائل کو سلجھانے کی صلاحیت رکھتی ہیں۔ ان کے خیال میں، حالات کیسے بھی ہوں انہیں قابو میں لایا جا سکتا ہے اور مسائل و حالات ان کی صلاحیتوں کو دنیا کے سامنے لے کر آتے ہیں۔
اپنی سوچ مثبت رکھیں: ہر قسم کے حالات کو ایک مثبت سوچ کے ساتھ قبول کریں اور اپنی ناکامیوں سے سبق سیکھیں۔ خوشگوار زندگی کے یہی راستے ہیں۔ بہت زیادہ مت سوچیں۔ صحیح وقت آنے پر سب کچھ صحیح ہو گا۔ زندگی دکھ اور سکھ کا نام ہے دکھ آنے پر زندگی سے ناراض ہونے کی ضرورت نہیں۔
اپنی بہترین کوشش کریں: بیشتر ملازمت پیشہ خواتین ایک ہی وقت میں اپنی ملازمت اور گھر کو سنبھالنے کو تھکا دینے والا کام سمجھتی ہیں۔ جبکہ گھریلو خواتین بھی اپنی ساتھیوں کی کامیابیوں پر یہ سوچ کر رنجیدہ ہو جاتی ہیں کہ وہ ابھی تک گھر کا ہی تھکا اور اکتا دینے والا کام کر رہی ہیں۔ مگر حقیقت یہ ہے کہ آپ نے اپنے لیے جو کردار بھی منتخب کیا ہے اس میں اپنی بہترین کوشش کریں۔ اپنا موازنہ دوسروں سے کرنے کی ضرورت نہیں۔اپنی شخصیت کے مثبت پہلوؤں کی حوصلہ افزائی کریں۔ کامیابیوں پر اپنی تعریف خود کریں۔
بات چیت کا سلسلہ جاری رکھیں : آجکل زندگی بہت مصروف ہے اس کا مطلب ہے کہ ہم اپنوں کے ساتھ کم وقت گزارتے ہیں لہٰذا آپ کو چاہیے کہ اپنوں کیساتھ مشترکہ دلچسپی کے موضوعات پر گفتگو کریں۔ زندگی کے ہر لمحے کو خوشگوار بنائیں! خوشی کے لمحات پیدا کریں ہر وقت کام میں مصروف مت رہیں۔ زندگی تھکا دینے والی چیز ہے۔ خواتین اکثر خود کو اپنے کیرئیر اور گھر والوں کیلئے وقف کر دیتی ہیں اور ایسے میں سہیلیوں کی اہمیت نظر انداز ہو جاتی ہے۔ اس صورتحال میں کوئی پریشانی آن پڑے تو کوئی ایسا نہیں ہوتا جس سے آپ اپنے تاثرات بانٹ سکیں۔ سہیلیوں آپ کی زندگی کے بکھرے ٹکڑوں کو جوڑتی ہیں۔ آپ پر کوئی پریشانی یا برا وقت آ جائے تو سہیلیاں مدد اور سہارا دیتی ہیں۔ پرانے دوستوں کے ساتھ جڑے رہیں اور نئے بھی بنائیں۔ آپ کو ایک نہ ایک دن دوستیوں کا فائدہ ضرور ہو گا۔نئی سہیلیاں بنانا شروع کریں اور اپنا سپورٹ نیٹ ورک قائم کریں۔
فارغ وقت میں اپنے مشغلوں پر عمل کریں: آپ باقاعدگی کے ساتھ مصروف معمولات میں سے کچھ وقت نکال کر وہ کام کریں جو آپ بے پناہ مصروفیت میں بھی کرنا چاہتی ہیں۔ ایسے کام جو آپ کی تخلیقی صلاحیتوں کو ابھاریں جیسا کہ باغبانی، بُنائی، ہاتھ سے ڈیکوریشن کی اشیاء بنانا۔ ایسے کام نہ صرف آپ کے اندر ٹھہراؤ لاتے ہیں بلکہ ٹی وی دیکھنے سے کہیں زیادہ بہتر ہیں۔ مطالعہ کرنے اور تعلیم جاری رکھنے سے آپ نئے علوم سے آگاہ رہ سکتی ہیں۔
کامیاب ہونے کا احساس : اس احساس کوپانے کیلئے آپ رضاکارانہ کام یا خیرات بھی جمع کر سکتی ہیں۔ آپ چاہے جو مرضی کریں لیکن یہ یاد رکھیں کہ خود کو بے تحاشا مصروف کرنے سے گریز کریں۔ مشغلوں کو ذمہ داری مت بننے دیں،زندگی میں فعال کردار ادا کریں، اپنی شخصیت کو نکھارنے کی خود کوشش کریں تفریح کیلئے وقت نکالیں خود کو کام یا خاندان کا غلام مت سمجھیں۔
اپنی ذہنی صحت کا جائزہ لیں: آپ کس قسم کی شخصیت ہیں؟ اگر آپ کی شخصیت میں صحت مند عادات کی بجائے منفی عادات زیادہ ہیں تو اپنی زندگی کو خوشگوار بنانے کے لیے ابھی سے خود کو بہتر کریں۔ہر حال میں خوش رہیں اس سے آپ کی صحت اور زندگی دونوں پر اچھا اثر پڑے گا ۔