خبردار!میک اپ کے ساتھ ورزش نہیں کریں،کاسمیٹکس سے چہرے کے مسام بند ہوجاتے ہیں
بہت سی لڑکیاں اور خواتین اپنے چہرے پر مکمل میک اپ کے ساتھ ورزش کرتی ہیں اور جلد پر اس کے منفی اثرات اور نتائج سے واقف نہیں ۔ طبی ماہرین منع کرتے ہیں کہ ورزش کے دوران چہرے پر کاسمیٹکس کا استعمال نہیں کرنا چاہئے۔اس کی بنیادی وجہ یہ ہے کہ کاسمیٹکس سے چہرے کے مسام بند ہو جاتے ہیں ۔
پسینہ آنے سے رک جاتا ہے اور یہ چیز جلد کے لیے نہایت نقصان دہ ہے۔ڈاکٹروں کے مطابق انسانی جسم کو ورزش کے دوران پسینہ آنے کی ضرورت ہوتی ہے تا کہ جسم مسلسل طور پر ٹھنڈا رہے۔ تاہم ورزش کے دوران جلد کے مسام کھلتے ہیں، اس پر میک اپ کی تہہ کی موجودگی میں غیرضروری کثافت باہر نہیں آ پاتی اور مسام پر گندگی جمع ہو کر سیاہ مہاسوں کی شکل اختیار کر لیتی ہے۔لندن میں ڈاکٹرز کلینک کی میڈیکل ڈائریکٹر ڈاکٹر بریتھی ڈینیئل کا کہنا ہے "پسینے کو تبخیر کی ضرورت ہوتی ہے تا کہ جسم ٹھنڈا رہے اور کثافتوں سے چھٹکاراحاصل ہو سکے۔ تاہم مسامات بند ہونے کے باعث اس عمل کا رک جانا دانوں ، کیل اور مہاسوں کے جراثیم کو جنم دیتا ہے"۔ڈاکٹر ڈینیئل نے خواتین کو ہدایت کی ہے کہ وہ ورزش سے قبل اپنا میک اپ اتار دیا کریں اور ورزش کے اختتام کے بعد ایک بار پھر چہرے کو دھولیا کریں۔